کرونا وائرس کا خطرہ: ویسٹ انڈیز کے تین کھلاڑیوں کی دورۂ انگلینڈ سے معذرت
ویسٹ انڈیز کرکٹ بورڈ نے دورۂ انگلینڈ کے لیے 14 رکنی اسکواڈ کا اعلان کر دیا ہے تاہم تین کھلاڑی ایسے بھی ہیں جنہوں نے کرونا وائرس کے خطرے کے پیشِ نظر انگلینڈ جانے سے انکار کر دیا ہے۔
ویسٹ انڈیز کرکٹ ٹیم کو اگلے ہفتے انگلینڈ کا دورہ کرنا ہے جس میں وہ انگلینڈ کے خلاف تین ٹیسٹ میچز پر مشتمل سیریز کھیلے گی۔
اس دورے کے لیے ویسٹ انڈین کرکٹ بورڈ نے بدھ کو 14 کھلاڑیوں کے ناموں کا اعلان کیا ہے۔
کرکٹ بورڈ کے حکام کے مطابق ڈیرن براوو، شمرون ہیٹمیر اور کیمول پال نے انگلینڈ نہ جانے کا فیصلہ کیا ہے جس کے بعد 11 ریزرو کھلاڑیوں میں سے تین کو ٹیم کا حصہ بنایا گیا ہے۔
ویسٹ انڈیز کرکٹ بورڈ کے مطابق تین کھلاڑیوں کی جانب سے انگلینڈ نہ جانے کے فیصلے کا احترام کرتے ہیں۔
امریکہ میں دیگر امراض میں مبتلا مریضوں کی اسپتال آمد میں کمی
امریکہ میں بیماریوں کے کنٹرول اور بچاؤ کے ادارے کی ایک رپورٹ میں بتایا گیا ہے کہ اپریل میں کرونا وائرس کے کیسز میں شدت آنے کے دوران اسپتالوں میں ہنگامی خدمات کے لیے آنے والے دیگر بیماریوں کے مریضوں کی تعداد میں بڑے پیمانے پر کمی واقع ہوئی۔
بدھ کو جاری ہونے والی تجزیاتی رپورٹ کے مطابق ایسے مریضوں کی کمی زیادہ تر 14 سال سے کم عمر کے بچوں، عورتوں اور شمال مشرقی علاقے کے مریضوں کی تھی۔
رپورٹ میں بتایا گیا کہ سب سے زیادہ کمی ایسے مریضوں کی تھی جنہیں دل کا دورہ پڑنے سمیت سینے میں درد کی شکایت تھی۔ یا پھر سانس کی بیماری میں مبتلا بچوں کو ہنگامی خدمات کے لیے اسپتال نہیں لایا گیا۔
اس وقت کرونا وائرس کے مریضوں کی سب سے زیادہ تعداد امریکہ میں ہے جہاں اب تک 18 لاکھ سے زائد افراد کے کرونا وائرس میں مبتلا ہونے کی تصدیق ہو چکی ہے۔
اس وائرس سے ہونے والی ہلاکتوں کی تعداد بھی 107,175 سے بڑھ چکی ہے۔ نیویارک ٹائمز کے مطابق صدر ٹرمپ نے کرونا وائرس کی ویکسین کی تیاری کے سلسلے میں پانچ کمپنیوں کا انتخاب کیا ہے۔ ان کمپنیوں میں ماڈرنا، آسٹرا زینیکا،، جانسن اینڈ جانسن، مرک اور فائیزر شامل ہیں۔
اخبار کے مطابق صدر ٹرمپ ان کمپنیوں کے ناموں کا اعلان آئندہ چند ہفتوں میں کریں گے۔
امریکہ میں اعلی ترین طبی مشیر ڈاکٹر اینتھونی فاؤچی نے جرنل آف میڈیکل ایسوسی ایشن کو بتایا ہے کہ وہ پر امید ہیں کہ یہ ویکسین 2021 کے آغاز تک تیار کر لی جائے گی۔ انہوں نے امید ظاہر کی کہ اس وقت تک اس ویکسین کی لاکھوں خوراک دستیاب ہوں گی۔ تاہم انہوں نے کہا کہ اس بات کی کوئی ضمانت نہیں دی جا سکتی۔
افغانستان میں کرونا کے مزید 787 کیس رپورٹ
افغانستان کی وزارتِ صحت نے جمعرات کو ملک میں کرونا کے 787 نئے کیسز کی خبر دی ہے جس کے ساتھ ملک میں کرونا کیسز کی کل تعداد 18054 ہو گئی ہے۔
وزارت صحت کے مطابق گزشتہ چوبیس گھنٹوں میں چھ اموات کے ساتھ مرنے والوں کی کل تعداد 300 ہو گئی ہے۔