- By روشن مغل
پاکستان کے زیر انتظام کشمیر میں مزید 14 افراد میں وائرس کی تصدیق
پاکستان کے زیر انتظام کشمیر میں گزشتہ 24 گھنٹوں کے دوران مزید 14 افراد میں کرونا وائرس کی تصدیق ہوئی ہے جب کہ وائرس سے متاثرہ نو مریض صحت یاب ہوئے ہیں۔
کشمیر میں اب تک 7613 افراد کے ٹیسٹ کیے گئے ہیں جن میں سے 7560 کے نتائج آ چکے ہیں۔ 299 افراد میں کرونا وائرس کی تصدیق ہوئی ہے جن میں سے 182 افراد صحت یاب ہو چکے ہیں اور انہیں اسپتالوں ڈسچارج کیا چکا ہے۔
حکام کے مطابق 110 مریض اب بھی اسپتالوں میں موجود ہیں جب کہ وائرس سے سات افراد کی موت ہوئی ہے۔
ہلاک ہونے والوں میں سے پانچ کا تعلق مظفر آباد جب کہ دو کا تعلق میر پور سے تھا۔
اسلام آباد: احتیاطی تدابیر پر عمل نہ کرنے پر دکانداروں کے خلاف ایکشن
اسلام آباد میں کرونا وائرس کے پھیلاؤ کے باعث اور تاجروں کی طرف سے احتیاطی تدابیر پر عمل نہ کرنے پر ضلعی انتظامیہ نے بھارہ کہو مارکیٹ اور نیو آب پارہ مارکیٹ کو مکمل طور پر سیل کر دیا۔
اسلام آباد کے ڈپٹی کمشنر حمزہ شفقات کے مطابق اس علاقے میں ایس او پیز پر کوئی عمل درآمد نہیں کر رہا تھا۔ شدید رش کے باعث فیصلہ کیا کہ بازار کو سیل کیا جائے۔
ضلعی انتظامیہ کے مطابق بھارہ کہو کے علاقے میں اب تک 145 کرونا وائرس کے کیسز سامنے آچکے ہیں جب کہ ایک شخص ہلاک بھی ہوچکا ہے۔
پاکستان میں 22 ہزار سے زیادہ ٹیسٹ، 4 ہزاد سے زائد کیسز رپورٹ
پاکستان میں جوں جوں کرونا وائرس ٹیسٹ کی استعداد بڑھائی جا رہی ہے ویسے ویسے کیسز کی تعداد میں بھی مسلسل اضافہ ہوتا جا رہا ہے۔
سرکاری اعداد و شمار کے مطابق گزشتہ 24 گھنٹوں کے دوران پہلی مرتبہ 22 ہزار 812 ٹیسٹ کیے گئے جن میں سے چار ہزار 896 افراد میں وائرس کی تشخیص ہوئی ہے۔ ایک روز کے دوران نئے کیسز کی یہ سب سے بڑی تعداد ہے۔
پاکستان میں اب تک چھ لاکھ سے زیادہ افراد کے کرونا وائرس کے ٹیسٹ کیے جا چکے ہیں۔
عالمی وبا سے پاکستان میں چوبیس گھنٹوں میں 68 اموات ہوئی ہیں جس کے بعد ہلاکتوں کی کل تعداد 1838 تک پہنچ چکی ہے۔
حکام کے مطابق ملک بھر میں اب تک 86 ہزار 457 افراد میں وائرس کی تشخیص ہوئی ہے جن میں سے 31 ہزار 198 افراد شفایاب ہو چکے ہیں۔
