رواں سال صرف ایک ہزار مقامی افراد حج کر سکیں گے
سعودی عرب کے وزیرِ حج نے کہا ہے کہ کرونا وائرس کے سبب رواں سال فریضۂ حج کی ادائیگی کے لیے محدود لوگوں کو اجازت دی جائے گی اور صرف ایک ہزار کے لگ بھگ مقامی لوگ حج کر سکیں گے۔
سعودی وزیرِ حج نے کہا کہ لوگوں کی صحت جانچنے کا معیار سخت کیا جائے گا۔ صرف صحت مند افراد کو حج کی اجازت دی جائے گی جب کہ 65 برس سے زائد عمر کے لوگ اس سال حج نہیں کر سکیں گے۔
گزشتہ روز سعودی حکام نے حج پالیسی جاری کرتے ہوئے کہا تھا کہ صرف سعودی عرب کے شہری اور اقامہ رکھنے والے لوگ حج کر سکیں گے۔ کرونا وائرس کے باعث بیرونِ ملک سے لوگوں کو آنے کی اجازت نہیں دی جائے گی۔
خیال رہے کہ سعودی عرب میں ہر سال تقریباً 25 لاکھ عازمین حج کی ادائیگی کے لیے آتے ہیں۔
بیجنگ: دس روز میں 30 لاکھ افراد کا کرونا ٹیسٹ
چین کے دارالحکومت بیجنگ کے ایک حکومتی عہدے دار نے کہا ہے کہ کرونا وائرس کے مریضوں کی تشخیص کے لیے انتظامیہ بڑے پیمانے پر کی جانے والی ٹیسٹنگ کا عمل مزید تیز کرے گی۔
بیجنگ کے ہیلتھ کمیشن کے ڈپٹی ڈائریکٹر ژینگ ہوا نے کہا کہ انتظامیہ نے شہر میں ٹیسٹنگ کی استعداد بڑھا لی ہے اور اب بڑے پیمانے پر کرونا ٹیسٹنگ کا عمل مزید تیز کیا جائے گا۔
انہوں نے کہا کہ بیجنگ اب روزانہ تین لاکھ 'نیوکلک ایسڈ ٹیسٹس' کر سکتا ہے جب کہ مارچ میں ایک دن میں صرف 40 ہزار ٹیسٹس کی گنجائش تھی۔
ژینگ ہوا نے کہا کہ 12 جون سے 22 جون تک شہر میں لگ بھگ 30 لاکھ افراد کے کرونا ٹیسٹس کیے گئے ہیں۔
روس میں کرونا وائرس کے مریضوں کی تعداد چھ لاکھ تک پہنچ گئی
روس میں کرونا وائرس کے مریضوں کی تعداد چھ لاکھ تک پہنچ گئی ہے جب کہ آٹھ ہزار سے زائد افراد عالمی وبا سے ہلاک ہو چکے ہیں۔
روس میں پیر کو 7425 نئے کیسز رپورٹ ہوئے جس کے بعد کرونا کے مریضوں کی مجموعی تعداد پانچ لاکھ 99 ہزار 705 ہو گئی ہے۔ روس دنیا میں کرونا وائرس سے سب سے زیادہ متاثر ہونے والا تیسرا ملک ہے۔
گزشتہ 24 گھنٹوں کے دوران ملک میں 153 ہلاکتیں ہوئی ہیں جس کے بعد کل اموات 8359 تک پہنچ گئی ہیں۔
دوسری جانب دارالحکومت ماسکو میں پابندیاں نرم کردی گئی ہیں اور جمنازیم، ریستوران، بازار اور دیگر عوامی مقامات کھول دیے گئے ہیں۔