بیجنگ میں مزید 13 کیسز رپورٹ، ٹیسٹنگ کی استعداد میں اضافہ
چین کے دارالحکومت بیجنگ میں کرونا وائرس پر مکمل طور پر قابو پانے کے لیے ٹیسٹنگ کی استعداد میں اضافہ کیا جا رہا ہے۔ بیجنگ میں اب ایک دن میں تین لاکھ سے زائد افراد کے کرونا ٹیسٹس کیے جا رہے ہیں جب کہ اس سے قبل ٹیسٹنگ کی استعداد صرف 40 ہزار ٹیسٹ یومیہ تھی۔
دوسری جانب جمعرات کو چین میں 19 نئے کیسز سامنے آئے ہیں جن میں سے 13 مریض بیجنگ میں پائے گئے ہیں۔
ڈزنی لینڈ دوبارہ کھولنے کا معاملہ تاخیر کا شکار
امریکی ریاست کیلی فورنیا میں واقع ڈزنی لینڈ دنیا کا دوسرا مقبول ترین تھیم پارک ہے جو کرونا وائرس کے باعث مارچ سے بند ہے اور اسے دوبارہ کھولنے کا معاملہ تاخیر کا شکار ہوتا دکھائی دے رہا ہے۔
ڈزنی لینڈ کی انتظامیہ کا کہنا ہے کہ تھیم پارک دوبارہ 17 جولائی کو کھولا جانا تھا لیکن حکام نے اسے کھولنے کے لیے تاحال کوئی گائیڈ لائنز جاری نہیں کی ہیں۔ لہٰذا ان کے پاس 17 جولائی تک پارک کھولنے کے لیے انتظامات کرنے کا وقت نہیں ہے۔ انتظامیہ نے یہ واضح نہیں کیا کہ تھیم پارک دوبارہ کب کھولا جائے گا۔
آسٹریلیا میں گزشتہ دو ماہ کے ریکارڈ یومیہ کیسز رپورٹ
آسٹریلیا میں گزشتہ 24 گھنٹوں کے دوران 33 نئے کیسز رپورٹ ہوئے ہیں جو گزشتہ دو ماہ کے دوران رپورٹ ہونے والے یومیہ کیسز کی سب سے بڑی تعداد ہے۔ یہ مسلسل نواں دن ہے جب آسٹریلیا میں رپورٹ ہونے والے کیسز کی تعداد دو ہندسوں میں ہے۔
آسٹریلیا میں کرونا وائرس کے مریضوں کی مجموعی تعداد 7500 سے زائد ہو چکی ہے جب کہ 104 اموات ہوئی ہیں۔
امریکہ: کرونا سے متاثرہ ریاستوں کا سفر کرنے والوں کو قرنطینہ کرنے کا حکم
امریکہ کی تین ریاستوں نیویارک، نیو جرسی اور کنیٹیکٹ کے گورنروں نے بدھ کو حکم دیا ہے کہ دیگر آٹھ امریکی ریاستوں سے آنے والے شہریوں کو دو ہفتوں کے لیے قرنطینہ میں رکھا جائے۔
جن ریاستوں کے شہریوں کو 14 دن کے لیے قرنطینہ میں رکھنے کا حکم دیا گیا ہے ان میں الاباما، ارکنساس، ایریزونا، فلوریڈا، شمالی کیرولائنا، جنوبی کیرولائنا، ٹیکساس اور یوٹا شامل ہیں۔ قرنطینہ کا حکم ان لوگوں پر بھی نافذ ہو گا جو ان ریاستوں کا حال ہی میں سفر کر کے آئے ہوں۔
نیویارک کے گورنر اینڈریو کومو نے کہا ہے کہ جو قرنطینہ کے احکامات کی خلاف ورزی کرے گا اسے ایک ہزار ڈالر اور جو بار بار خلاف ورزی کرے گا اسے پانچ ہزار ڈالرز تک جرمانہ ہو سکتا ہے۔