کرونا وائرس کے اثرات صحت یابی کے بعد کتنا عرصہ باقی رہتے ہیں؟
فی الحال کوئی بھی یقین سے نہیں بتا سکتا کہ کرونا وائرس میں مبتلا ہونے کے بعد اس کے اثرات کتنے عرصے تک باقی رہ سکتے ہیں۔ یہ ایک نئی وبا ہے اور سائنس دانوں کے پاس اس کے متعلق زیادہ معلومات نہیں ہیں۔ وہ ابھی تک اس کا مشاہدہ کر رہے ہیں اور اس کے مختلف پہلوؤں پر نظر رکھے ہوئے ہیں۔
اب تک اس عالمی وبا کے بارے میں جو کچھ سامنے آیا ہے وہ ان لوگوں کی جانب سے آیا ہے جو اس میں مبتلا ہوئے۔ کوویڈ 19 سے نجات پانے کے بعد اور کرونا ٹیسٹ نیگیٹو آنے بعد بھی ان میں کئی علامتیں ہفتوں اور مہینوں تک برقرار رہیں اور کرونا سے صحت یابی کے بعد اکثر لوگوں کا تجربہ ایک دوسرے سے مختلف ہے۔
زیادہ تر لوگ وائرس کی لپیٹ میں آنے کے چند ہفتوں کے اندر تندرست ہو جاتے ہیں۔ لیکن کچھ لوگوں میں مرض کی علامتیں کافی دنوں اور ہفتوں تک برقرار رہتی ہیں، جس میں سب سے زیادہ عام تھکاوٹ، سردرد، انجانے خوف اور پریشانی کی کیفیت اور پٹھوں کا درد ہے، جو مرض ختم ہو جانے کے بعد بھی کئی ہفتوں تک جاری رہ سکتا ہے۔
صحت یاب ہونے والے ایسے افراد جنہیں مرض کی شدت سے گزرنا پڑا اور انہیں انتہائی نگہداشت کے یونٹ اور وینٹی لیٹر پر جانے کی ضرورت پڑی یا انہیں ڈائلاسس پر ڈالا گیا، انہیں بعد ازاں سنجیدہ نوعیت کے مسائل کا سامنا رہا۔
بعض واقعات میں یہ بھی سامنے آیا ہے کہ جن لوگوں کو وبا کے دوران نمونیا ہوا تھا، ان کے پھپھڑوں میں زخم پڑ گئے۔ اسی طرح دل کے امراض، گردوں میں خرابیاں اور جگر کے افعال میں پیچیدگیاں پیدا ہوئیں۔ کرونا سے صحت یابی کے بعد جن لوگوں میں یہ پیچیدگیاں پیدا ہوئیں، ان میں سے بہت سوں میں یہ خرابیاں برقرار ہیں اور ان پیچیدگیوں کا علاج جاری ہے۔ اس کے متعلق اس وقت کچھ نہیں کہا جا سکتا کہ وہ اس سے کب چھٹکارہ حاصل کر سکیں گے یا ان کے ساتھ ہی گزارہ کرنا پڑے گا۔
گیارہ لاکھ آنجہانی امریکیوں کو بھی کرونا وائرس کے امدادی چیک بھیجے گئے، نگراں ادارہ
امریکی حکومت کے ایک نگران ادارے نے کہا ہے کہ حکومت نے کرونا وائرس پھوٹ پڑنے کے بعد کم آمدنی والے افراد کی امداد کے لیے جو فنڈ جاری کیا تھا، اس میں سے ایک ارب 40 کروڑ ڈالر سے زیادہ مالیت کے چیک ایسے افراد کے بھیج دیے گئے، جن کا انتقال ہو چکا ہے۔ ان کی تعداد 11 لاکھ کے لگ بھگ ہے۔
یہ انکشاف کرونا وائرس کے پھیلاؤ پر حکومتی اقدامات کی نگرانی سے متعلق کانگرس کی ایک غیر جماعتی آزاد ایجنسی نے کیا۔ یہ رپورٹ 269 ارب ڈالر کی 16 کروڑ سے زیادہ ادئیگیوں کے بارے میں محکمہ خزانہ اور انٹرنل ریونیو سروس کے عمل کی تصویر پیش کرتی ہے، جس پر ناقدین سوال اٹھا رہے ہیں۔
کانگریس نے کوویڈ 19 کی صورت حال کے مقابلے کے لیے مارچ میں دو ٹریلین ڈالر کے ایک بہت بڑے پیکیج کی منظوری دی تھی، جسے سی اے آر ای ایس ایکٹ کا نام دیا گیا ہے۔ اس کا مقصد امریکی کارکنوں اور کاروباروں پر عالمی وبا کا دباؤ کم کرنا تھا۔
اس پروگرام کے تحت مستحق امریکی، امدادی چیک وصول کرنے کے اہل تھے۔ اہلیت کے لیے 2018 اور 2019 میں لوگوں کی جانب سے فائل کی جانے والی انکم ٹیکس ریٹرن کو معیار بنایا گیا تھا۔
پروگرام کے تحت 75 ہزار ڈالر سالانہ کمانے والے افراد کو 1200 ڈالر تک امدادی چیک اور شوہر اور بیوی کی ڈیڑھ لاکھ ڈالر تک کی مشترکہ ٹیکس ریٹرن کے لیے حد 2400 ڈالر مقرر کی گئی ہے، جب کہ اہلیت کے معیار پر پورا اترنے والے ہر بچے کے لیے 500 ڈالر کی اضافی امداد دی گئی ہے۔ اس سے زیادہ آمدنی پر امدادی رقم میں کٹوتی ہوتی ہے اور ایک خاص حد تک پہنچنے پر امدادی رقم صفر ہو جاتی ہے۔
امریکہ میں ایک روز کے دوران ریکارڈ کیسز، ٹیکساس کو کھولنے کا فیصلہ ملتوی
امریکہ میں ایک روز کے دوران کرونا وائرس کے ریکارڈ کیسز سامنے آئے ہیں جس کے بعد بعض ریاستوں نے معمولاتِ زندگی بحال کرنے کا عمل روک دیا ہے۔
امریکہ میں جمعرات کو 39 ہزار 818 افراد میں کرونا وائرس کی تشخیص ہوئی ہے۔ ایک روز کے دوران نئے کیسز کی یہ اب تک کی سب سے زیادہ تعداد ہے۔
بدھ کو بھی امریکہ میں 36 ہزار سے زیادہ کیسز رپورٹ ہوئے تھے جب کہ آخری مرتبہ 24 اپریل کو امریکہ میں 36 ہزار 426 کیسز کی ریکارڈ تعداد نوٹ کی گئی تھی۔
رواں ہفتے ریاست ایریزونا، کیلی فورنیا، فلوریڈا، میسوری، نیواڈا، جنوبی کیرولائنا، اوکلاہوما اور الباما میں ریکارڈ کیسز رپورٹ ہوئے ہیں۔
کرونا وائرس کے کیسز میں اضافے کی وجہ ٹیسٹس کی استعداد بڑھانے کو بھی قرار دیا جا رہا ہے۔
ٹرمپ انتظامیہ نے کرونا وائرس کے پھیلاؤ سے متعلق خدشات کو کم کرنے کی کوشش کی ہے۔ البتہ ایک ہفتے کے دوران ایک درجن سے زائد ریاستوں میں نئے کیسز کی تعداد میں تشویش ناک حد تک اضافہ ہوا ہے۔
روس میں اپریل کے بعد سے ایک دن کے کم ترین کیسز رپورٹ
روس میں جمعے کو کرونا وائرس کے 6800 نئے کیسز رپورٹ ہوئے ہیں جو اپریل کے بعد سے ملک میں ایک دن میں رپورٹ ہونے والے کیسز کی کم ترین تعداد ہے۔ روس میں اپریل کے اواخر سے اب تک روز سات ہزار سے زائد کیسز سامنے آ رہے تھے۔
روس میں کووڈ 19 کا شکار مریضوں کی کل تعداد چھ لاکھ 20 ہزار 794 ہو گئی ہے۔ گزشتہ 24 گھنٹوں کے دوران ملک میں کرونا سے 176 اموات ہوئی ہیں جس کے بعد ہلاکتوں کی مجموعی تعداد 8781 تک پہنچ گئی ہے۔