انڈونیشیا میں ریکارڈ یومیہ کیسز رپورٹ
انڈونیشیا کی وزارتِ صحت کے حکام نے رپورٹ کیا ہے کہ گزشتہ 24 گھنٹوں کے دوران ملک میں 'کووڈ 19' میں مبتلا 1624 نئے مریض سامنے آئے ہیں جو ملک میں اب تک ایک دن میں رپورٹ ہونے والے کرونا کیسز کی سب سے زیادہ تعداد ہے۔
اس اضافے کے بعد انڈونیشیا میں کرونا وائرس سے متاثرہ مریضوں کی مجموعی تعداد 59 ہزار 394 ہو گئی ہے جب کہ گزشتہ روز 53 مزید اموات کے بعد ملک میں وائرس سے کل ہلاکتیں 2987 تک پہنچ گئی ہیں۔
چین میں کرونا وائرس کے پانچ نئے کیسز رپورٹ
چین میں جمعرات کو کرونا وائرس کے پانچ کیسز رپورٹ ہوئے ہیں جن میں سے دو کیسز بیرونِ ملک سے چین آنے والوں کے ہیں۔
بیجنگ میں گزشتہ 24 گھنٹوں کے دوران صرف ایک کیس رپورٹ ہوا ہے جب کہ دارالحکومت میں روزانہ ہزاروں افراد کے کرونا ٹیسٹ کیے جا رہے ہیں۔
چین میں وبا پھیلنے کے بعد سے اب تک 'کووڈ 19' کے 83 ہزار 537 کیسز رپورٹ ہوئے ہیں جب کہ 4 ہزار 634 اموات ہوئی ہیں۔
کرونا وائرس سے نمٹنے کے 'ناقص اقدامات' پر نیوزی لینڈ کے وزیرِ صحت مستعفی
نیوزی لینڈ میں کرونا وائرس سے نمٹنے کے حکومتی اقدامات میں کمزوریاں سامنے آنے کے بعد وزیرِ صحت ڈیوڈ کلارک نے استعفیٰ دے دیا ہے۔
انہوں نے پارلیمننٹ میں ایک نیوز کانفرنس کرتے ہوئے کہا کہ مجھ پر یہ واضح ہو چکا ہے کہ میرے اس عہدے پر کام جاری رکھنے سے کرونا وائرس کی عالمی وبا سے نمٹنے کے حکومتی اقدامات متاثر ہو سکتے ہیں۔ اس لیے وہ عہدے سے مستعفی ہو گئے ہیں۔
ڈیوڈ کلارک نے کہا کہ ان کا استعفیٰ وزیرِ اعظم جسینڈا آرڈرن نے منظور کر لیا ہے۔
اسرائیل میں ایک دن کے سب سے زیادہ کیسز
اسرائیل میں جمعرات کو کرونا وائرس کے 966 نئے کیسز رپورٹ ہوئے ہیں۔ ملک میں 21 فروری کو پہلا کیس رپورٹ ہوا تھا جس کے بعد سے ایک دن میں سامنے آنے والے کیسز کی یہ سب سے بڑی تعداد ہے۔
اسرائیل میں کرونا وائرس کے مریضوں کی کل تعداد 26 ہزار 452 ہے جب کہ اموات 324 ہو چکی ہیں۔
اسرائیل کے وزیرِ صحت کا کہنا ہے کہ ملک میں کرونا وائرس کی دوسری لہر آئی ہے جس کے بعد مختلف پابندیاں بھی نافذ کی جا رہی ہیں۔ اسرائیل میں اس وقت کرونا کے 8647 مریض زیرِ علاج ہیں۔