'پالتو جانوروں سے انسان میں کرونا کی منتقلی کا رسک کم ہوتا ہے'
عالمی ادارۂ صحت کی چیف سائنس دان سومیا سوامینتھن نے کہا ہے کہ پالتو جانوروں سے انسانوں میں کرونا وائرس کی منتقلی کا بہت کم خطرہ ہوتا ہے۔
انہوں نے جنیوا میں پریس کانفرنس کے دوران بتایا کہ اب تک تیندوے، فیریٹ بلی نما جانور اور شیر میں کرونا وائرس کی تصدیق ہوئی ہے۔
ان کے بقول پالتو جانوروں سے کرونا وائرس کی منتقلی سے متعلق تشویش پائی جاتی ہے لیکن ایسا بہت کم کیسز میں ہوتا ہے۔
امریکہ میں ریکارڈ 55 ہزار سے زیادہ کیسز
امریکہ میں مسلسل دوسرے روز کرونا وائرس کے ریکارڈ کیسز سامنے آئے ہیں جس کے بعد متعدد ریاستوں کے گورنرز نے معمولاتِ زندگی بحال کرنے کا فیصلہ منسوخ کرنے پر غور شروع کر دیا ہے۔
امریکہ میں جمعرات کو 55 ہزار 274 افراد میں وائرس کی تشخیص ہوئی ہے۔ عالمی وبا کے آغاز سے اب تک امریکہ یا دنیا کے کسی بھی ملک میں ایک روز کے دوران رپورٹ ہونے والے کیسز کی یہ سب سے زیادہ تعداد ہے۔
امریکہ میں اس وبا کا شکار ہونے والے تقریباً ایک لاکھ 29 ہزار شہری ہلاک ہو چکے ہیں اور 27 لاکھ سے زیادہ افراد متاثر ہوئے ہیں۔
عالمی سطح پر ایک روز کے دوران اب تک برازیل میں 19 جون کو 54 ہزار 771 ریکارڈ کیسز رپورٹ ہوئے تھے۔ تاہم اب جمعرات کو امریکہ میں یومیہ کیسز کا ریکارڈ بنا ہے۔
امریکہ: ٹیکساس میں ماسک پہننا لازم قرار
امریکہ کی ریاست ٹیکساس میں جمعرات کو لگ بھگ آٹھ ہزار افراد میں وائرس کی تشخیص ہوئی ہے جس کے بعد گورنر گریگ ایبٹ نے شہریوں کو ماسک پہننے کی سختی سے تاکید کی ہے۔
گورنر گریگ نے جمعرات کو ایک ایگزیکٹو آرڈر بھی جاری کیا ہے جس کے مطابق جن کاؤنٹیز میں کرونا وائرس کے 20 کیسز رپورٹ ہوئے ہیں وہاں ہر شخص پر ماسک پہننا لازم ہے۔
امریکہ میں کرونا وائرس کی نئی لہر کو دیکھتے ہوئے متعدد ریاستوں کے گورنرز نے ایک ماہ کے سخت لاک ڈاؤن کے بعد نئے کیسز میں اضافے کے بعد ریاستوں کو کھولنے کے فیصلے پر نظر ثانی پر غور شروع کر دیا ہے۔
انڈونیشیا اپنے استعمال کے لیے ویکسین تیار کرے گا
ایشیائی ملک انڈونیشیا کرونا وائرس کی غیر ملکی تیار شدہ ویکسینوں کی عالمی تقسیم سے متعلق خدشات کے پیش نظر اپنے خود کے استعمال کے لیے کرونا وائرس ویکسین تیار کرے گا۔
انڈونیشیا میں کووڈ-19 کے لیے بنائی گئی ریسرچ ٹیم کا کہنا ہے کہ کرونا وائرس سے بچاؤ کے لیے تیار کردہ ویکسین انڈونیشیا کی تیار کردہ ہوگی جو کہ مقامی افراد کے لیے ہی ہو گی۔
کرونا وائرس سے بچاؤ کے لیے انڈونیشیا کی سرکاری ‘بائیو فارما کمپنی’ اور چین کی بائیو فارما سوٹیکل کمپنی ‘سائینو ویک بائیو ٹیک’ مل کر ویکسین کی تیاری پر کام جاری رکھے ہوئے ہیں۔
ویکسین کی ریسرچ ٹیم کے سربراہ علی غفرون مکتی کا کہنا ہے کہ ویکسین کے ٹرائل اگلے سال کی دوسری سہ ماہی میں شروع کر دیے جائیں گے۔
یاد رہے کہ انڈونیشیا میں اب تک کرونا وائرس کے 59 ہزار سے زائد مصدقہ کیسز رپورٹ ہو چکے ہیں جب کہ اس وبا سے ہلاکتوں کی تعداد 2900 سے زائد ہے۔