دہلی میں پلازمہ بینک کا قیام
دارالحکومت دہلی میں بھارت کا پہلا پلازمہ بینک جمعرات کو قائم کردیا گیا ہے۔
اس بینک کے منتظم اور عام آدمی پارٹی کے عہدے دار ایف آئی اسمٰعیلی کے مطابق پلازمہ تھراپی کے تحت کرونا وائرس سے صحت یاب ہونے والے افراد کا خون دوسرے مریض کو لگایا جاتا ہے جس سے اس کی قوت مدافعت میں اضافہ ہوتا ہے اور اس کے ٹھیک ہونے کے امکانات بڑھ جاتے ہیں۔
ایف آئی اسمٰعیلی نے وائس آف امریکہ سے بات کرتے ہوئے کہا کہ دہلی میں اب تک 84 مریضوں کا علاج بذریعہ پلازمہ تھراپی کیا گیا جن میں سے 80 مریض صحت یاب ہو چکے ہیں۔
دریں اثنا کنٹونمنٹ زونز کے علاوہ دیگر علاقوں میں لاک ڈاؤن میں مزید نرمی کی گئی ہے۔
حکومت کی جانب سے یکم جولائی سے نافذ کردہ ہدایات کے مطابق اب بھی میٹرو ریل، سنیما ہالز، جمنازیم، سوئمنگ پول اور ہر قسم کی عوامی سرگرمیوں پر پابندی ہے۔ اسکول، کالجز اور تمام تعلیمی ادارے بھی رواں ماہ 31 جولائی تک بند رہیں گے۔
وزیر اعظم نریند رمودی نے 80 کروڑ افراد کو مفت راشن دینے کی اسکیم کی میعاد میں رواں سال کے اختتام تک توسیع کر دی ہے۔
بھارتی ریاستوں اترپردیش، بہار اور مغربی بنگال کے یومیہ مزدور جو کہ بے روزگاری سے متاثر ہیں۔ بنگلور، ممبئی اور احمد آباد کو لوٹنے لگے ہیں۔
برطانیہ میں ریستوران، بارز اور سیلون کھل گئے
برطانیہ میں لاک ڈاؤن میں نرمی کے ساتھ ہی تین ماہ کی بندش کے بعد ہفتے کو بارز، ریستوران اور سیلون کھل گئے۔ برطانوی وزیراعظم بورس جانسن نے اپنے پیغام میں کہا ہے کہ ہرفرد کو ذمہ داری کا مظاہرہ کرتے ہوتے سماجی دوری برقرار رکھنا ہوگی تاکہ کرونا وائرس کی دوسری لہر کا خطرہ کم کیا جا سکے۔
ادھر پولیس کی جانب سے جاری ہدایات میں کہا گیا ہے کہ صرف محدود تعداد میں ہی لوگ بار میں داخل ہو سکیں گے جب کہ بارز کے باہر رش کی اجازت نہیں ہو گی۔
برطانیہ میں اب تک تین لاکھ 14 ہزار سے زائد کیس رپورٹ ہو چکے ہیں جب کہ اب تک 44 ہزار سے زائد افراد ہلاک ہو چکے ہیں۔
امریکہ کا پاکستان کو 100 وینٹی لیٹر کا تحفہ
امریکہ نے پاکستان کو کرونا وائرس کے خلاف لڑنے کیلئے 100 میڈیکل وینٹی لیٹر عطیہ کئے ہیں۔ جمعہ کے روز امریکی سفارتخانے سے جاری ہونے والے ایک بیان میں کہا گیا ہے کہ یہ امداد صدر ٹرمپ کی طرف سے پاکستان کیلئے ایک فراخدلانہ پیشکش ہے جو اس مرض سے نمٹنے کیلئے ضروری اور اہم ہے۔ اور یہ کہ امریکہ عالمی وبا کے خلاف پاکستان کی ہنگامی کاوشوں کی حمایت کرتا ہے۔
پاکستان میں کرونا وائرس کی لپیٹ میں آنے والوں کی کُل تعداد دو لاکھ بائیس ہزار ہے، جب کہ اس وبا سے اب تک 4600 کے قریب افراد ہلاک ہو چکے ہیں۔
امریکہ میں تعینات پاکستانی سفیر اسد مجید نے جمعرات کے روز ایک آن لائین فورم پر بات کرتے ہوئے کہا کہ امریکہ کرونا وائرس سے نمٹنے کی کوششوں میں ہمیشہ فراخدلانہ امداد کرتا رہا ہے اور پاکستان امریکہ کے دس ترجیحی ملکوں میں شمار ہوتا ہے۔
امریکہ پہلے ہی پاکستان کو کرونا وائرس کی لیبارٹریوں میں جانچ، مرض کی تشخیص اور مریضوں کی دیکھ بھال کی صلاحیت بڑھانے اور وبا سے متعلق دیگر چیلنجوں کا مقابلہ کرنے کیلئے، تقریباً 27 ملین ڈالر کی امداد دے چکا ہے۔
امریکی سفارتخانے کے بیان میں کہا گیا ہے کہ امریکہ میں کرونا وائرس سے نمٹنے کیلئے، پاکستان کی جانب سے دواؤں اور دیگر اشیا کے عطیہ کا بھی امریکہ شکر گزار ہے۔
امریکی شہریت کے لیے حلف برداری کی ڈرائیو تھرو تقریبات، ایک انوکھا تجربہ
امریکہ میں نئے امریکی شہریوں کے لئے حلف برداری کی تقریب کا موقع ایک نہایت یادگار لمحہ ہوتا ہے۔ وہ برسوں اس کے لئے جتن کرتے ہیں اور اس بات کے متمنی ہوتے ہیں کہ انھیں امریکہ کی باضابطہ شہریت حاصل ہوجائے۔
ان میں بہت سے وہ لوگ ہوتے ہیں جو نہایت نامساعد حالات میں اپنے آبائی وطن کو چھوڑنے پر مجبور ہوتے ہیں اور پناہ لینے کے لئے نئی جگہ کی تلاش میں سرگرداں ہوتے ہیں۔
ایسے لوگوں میں لاکھوں کی تعداد میں وہ شامل ہیں جو دنیا کے مختلف علاقوں، خاص کر مشرق وسطیٰ میں خانہ جنگی اور جنگ و جدل کی وجہ سے اپنا گھر بار لٹانے اور جانی نقصان اٹھانے کے بعد در بدر ہوگئے ہیں۔ ان میں سے بہت سے بے خانماں افراد نے جن میں عورتیں اور بچے شامل ہیں، امریکہ کا بھی رخ کیا ہے۔
نئے امریکی شہریوں کے لئے حلف برداری کی تقریب جو لاس اینجلس میں منعقد ہوتی ہے، وہ امریکہ میں سب سے بڑی شمار کی جاتی ہے۔
کرونا کی عالمی وبا نے، جہاں زندگی کے تمام شعبوں کو متاثر کیا ہے اور بدستور اس کی تباہ کاریاں جاری ہیں، امریکی شہریت کے لئے حلف برداری کی تقریبات بھی اس سے متثنیٰ نہیں ہیں۔ وائرس کے پھیلاؤ کے خطرات کی وجہ سے تارکین وطن کے دفاتر کو ایسی تقریبات ملتوی کرنے پر مجبور ہونا پڑا ہے۔