اموات میں کمی سے یہ نہ سمجھیں کہ سب اچھا ہو گیا: ڈاکٹر فاؤچی
امریکہ میں وبائی امراض کے ماہر اور اعلیٰ ترین طبی مشیر ڈاکٹر انتھونی فاؤچی نے لوگوں کو خبردار کیا ہے کہ کرونا وائرس سے روزانہ کی بنیاد پر ہونے والی اموات میں قدرے کمی سے وہ یہ ہر گز نہ سمجھیں کہ سب اچھا ہو گیا ہے۔
انہوں نے یہ بات سماجی رابطے کی ویب سائٹ 'فیس بک' پر امریکی سینیٹر ڈگ جونز کے ساتھ سوال و جواب کے سلسلے کے دوران کہی۔ ڈاکٹر انتھونی فاؤچی نے کہا کہ بہت سے معاملات بے حد خراب ہو گئے ہیں۔ لوگوں کو کسی خوش فہمی میں مبتلا نہیں ہونا چاہیے۔
امریکی صدر ڈونلڈ ٹرمپ نے منگل کی شام اپنے ایک ٹویٹ میں کہا تھا کہ کرونا وائرس سے ہونے والی ہلاکتوں کا تناسب کم ہو رہا ہے۔ تاہم ڈاکٹر فاؤچی کا کہنا ہے کہ امریکہ اب بھی کرونا وائرس کے پہلے حملے کے شدید اثرات کی لپیٹ میں ہے۔
کرکٹ کے میدانوں میں کھلاڑیوں کی واپسی
عمان میں کرونا کیسز 50 ہزار سے متجاوز
عمان کی وزارتِ صحت کے مطابق ملک میں کرونا وائرس کے کیسز کی تعداد 50 ہزار سے زیادہ ہو گئی ہے۔
عمان میں گزشتہ 24 گھنٹوں کے دوران 1210 نئے کیسز رپورٹ ہونے کے بعد ملک میں کرونا کے مریضوں کی مجموعی تعداد 50 ہزار 207 تک پہنچ گئی ہے جب کہ اموات 233 ہو چکی ہیں۔
ایک ہفتہ قبل عمان کے وزیرِ صحت نے خبردار کیا تھا کہ ملک میں گزشتہ چھ ہفتوں کے دوران کرونا کے کیسز میں تیزی سے اضافہ ہوا ہے، لہٰذا شہری احتیاط سے کام لیں۔
روس میں کرونا وائرس کے کیسز سات لاکھ سے زیادہ
روس میں کرونا وائرس کے کیسز کی تعداد سات لاکھ کا ہندسہ عبور کر گئی ہے۔ ملک میں 6562 نئے کیسز رپورٹ ہونے کے بعد کیسز کی مجموعی تعداد سات لاکھ 792 ہو گئی ہے۔
گزشتہ 24 گھنٹوں کے دوران روس میں 173 افراد کرونا سے ہلاک ہوئے۔ روس میں اموات کی مجموعی تعداد 10 ہزار 667 تک پہنچ گئی ہے۔