پاکستان میں وینٹی لیٹر اور آکسیجن پر موجود مریضوں کی تعداد میں 28 فی صد کمی
پاکستان کے وزیر برائے منصوبہ بندی اسد عمر کا کہنا ہے کہ اسمارٹ لاک ڈاؤن اور لوگوں کے تعاون کی وجہ سے کرونا وبا میں کمی آ رہی ہے۔
اُنہوں نے دعویٰ کیا کہ 20 جون کے بعد وینٹی لیٹرز اور آکسیجن پر انحصار کرنے والے مریضوں کی تعداد میں 28 فی صد کمی آئی ہے۔
اپنی ایک ٹوئٹ میں اسد عمر نے بتایا کہ 20 جون کہ پاکستان میں 2969 مریض آکسیجن جب کہ 546 وینٹی لیٹرز پر تھے۔ لیکن 1762 مریض آکسیجن اور 394 وینٹی لیٹرز پر ہیں۔
امیتابھ اور ابھیشیک کا کرونا ٹیسٹ مثبت آ گیا، ممبئی کے اسپتال میں داخل
بالی ووڈ کے سپر اداکار، امیتابھ بچن اور ان کے بیٹے اور معروف اداکار ابھیشیک دونوں ہی کا کرونا ٹیسٹ مثبت آنے کے بعد انھیں ہفتے کی رات اسپتال داخل کرا دیا گیا ہے۔
وائس آف امریکہ کی نامہ نگار نے نئی دہلی سے خبر دی ہے کہ امیتابھ ممبئی کی ''نانوتی اسپتال میں داخل ہو گئے ہیں''۔
فلم اسٹار نے اس بات کی تصدیق اپنے ایک ٹوئٹ میں کی تھی، جو انھوں نے بھارتی وقت کے مطابق، رات کو 10 بج کر 52 منٹ پر جاری کی۔
امیتابھ نے بتایا کہ ''میرا کرونا ٹیسٹ مثبت آ گیا ہے۔ مجھے اسپتال منتقل کیا گیا ہے۔ اسپتال نے حکام کو آگاہ کر دیا ہے۔ اہل خانہ اور عملے کے بھی ٹیسٹ کیے جا رہے ہیں۔ نتائج کا انتظار ہے''۔
ایک مائیکرو بلاگنگ سائٹ پر امیتابھ نے ان سب پرستاروں سے، جو پچھلے 10 دن کے دوران ان سے رابطے میں رہے، کہا ہے کہ وہ بھی اپنے ٹیسٹ کرا لیں۔
جوں ہی امیتابھ بچن کے بارے میں یہ خبر عام ہوئی، لوگوں کی جانب سے ان کی جلد صحت یابی کے لیے نیک تمناؤں پر مبنی پیغام کا ایک سلسلہ شروع ہو گیا۔
فلم اسٹار کنگنا رنوٹ سے لے کہ بپشا باسو اور کرکٹر عرفان پٹھان کے فوری پیغام موصول ہوئے، اور سب شائقین نے ان کی جلد صحت یابی کے لیے نیک خواہشات اور دعائیں کیں ہیں۔
سچین ٹنڈولکر سمیت متعدد بھارتی کرکٹرز اور سیاست دانوں نے بھی اپنے ٹوئیٹس میں امیتابھ کی جلد صحتیابی کے لیے نیک تمنائوں کا اظہار کیا ہے۔
پاکستان سے بھی، شائقین نے امیتابھ بچن کے لیے نیک تمناؤں کا اظہار کیا ہے۔
پاکستان کرکٹ کے سابق فاسٹ بالر، شعیب اختر نے ایک ٹوئٹ میں کہا ہے: ''امیت جی، جلد صحت یاب ہوں۔ سرحد پار تمام شائقین آپ کی صحت و تندرستی کے لیے دعاگو ہیں''۔
77 برس کے امیتابھ بچن نے 'گلابو ستابو' میں کام کیا ہے، جو 12 جون سے نمائش کے لیے ریلز ہوئی، جسے نیٹ فلیکس کے ویب اسٹریمنگ پلیٹ فارم کے توسط سے پیش کیا گیا۔
وائرس کی ویکسین بن بھی جائے تب بھی سماجی چیلنج باقی رہے گا؟
ماہرین کا کہنا ہے کہ جب تک کرونا وائرس کی ویکسین دستیاب نہیں ہو جاتی، معیشت مکمل طور پر بحال نہیں ہو سکتی۔ لیکن، جب ویکسین تیار ہو بھی جائے تب بھی، رائے عامہ کے حالیہ جائزوں کے مطابق، ایک چوتھائی سے لے کر تین میں سے ایک امریکی ویکسین لگانے کے لیے تیار نہیں ہو گا۔
اس کا مطلب یہ ہوا کہ یہ ایک دوہرا چیلنج ہے۔ وبا کا خاتمہ لانے اور لوگوں کو پھر سے کام کاج میں مشغول کرنا نہ صرف ایک طبی چیلنج ہے، بلکہ یہ ایک سماجی چیلنج کی سی صورت اختیار کر چکا ہے۔
ایک نئی رپورٹ کے مطابق، ایسے میں جب طبی معاملات حل کرنے کی غرض سے اربوں ڈالر مختص کیے جا رہے ہیں، سماجی الجھنیں دور کرنے کی جانب کوئی توجہ مبذول نہیں کی جا رہی۔
جانز ہاپکنز سینٹر فار ہیلتھ سیکیورٹی کے محکمے میں علم بشریات کے شعبہ ثقافت سے وابستہ ایک سینئر دانشور اور اس رپورٹ کی معاون مصنفہ، مونیکا سوک سپانا نے کہا ہے کہ ''آپ کو محض ایک کامیاب طبی آزمائش کے نتیجے میں تیار ہونے والی ویکسین پر اکتفا نہیں کرنا، بلکہ ہمیں سماجی طور پر قابل قبول ویکسین بنانی ہے''۔
سوک سپانا نے کہا کہ سائنس دان کوویڈ 19 کے علاج کے لیے فقید المثال تیزی کے ساتھ ایک محفوظ اور مؤثر ویکسین تیار کرنے کی جستجو میں لگے ہوئے ہیں۔ لیکن، انسانی سوچ کے دھارے کو ذہن نشین کرنے کے حوالے سے کوتاہی برتی جا رہی ہے۔
اس لیے، بشمول ان کے، رپورٹ کے 22 مصنفین کا کہنا ہے کہ دھیان دینے کہ بات یہ ہے کہ اس کا مداوا کیسے ہو؟ مصنفین میں وبائی امراض، ویکسین تیار کرنے والے اور سماجی سائنس دان شامل ہیں۔
بقول ان کے '' شدید خدشات اور درپیش سماجی ماحول کے پیش نظر ضرورت اس بات کی ہے کہ ضروری اقدامات کیے جائیں''۔
پاکستان میں کرونا وائرس سے ہلاکتوں کی تعداد 5197 ہو گئی
پاکستان میں گزشتہ 24 گھنٹوں کے دوران کرونا وائرس سے متاثرہ افراد میں مزید 2521 کیسز کا اضافہ ہوا ہے جس کے بعد متاثرین کی مجموعی تعداد اتوار کی صبح تک 2 لاکھ 48 ہزار 872 ہو گئی ہے۔
وبائی مرض سے مزید 74 افراد ہلاک ہوئے ہیں۔ حکام نے کرونا وائرس سے اب تک 5197 افراد کی ہلاکت کی تصدیق کی ہے۔
سرکاری اعداد و شمار کے مطابق 2118 افراد کی حالت اب بھی تشویش ناک ہے اور وہ مختلف اسپتالوں میں زیرِ علاج ہیں۔
اتوار کی صبح جاری سرکاری اعداد و شمار کے مطابق اب تک ایک لاکھ 56 ہزار 700 افراد مکمل طور پر صحت یاب ہو چکے ہیں۔
سندھ میں کرونا وائرس سے ایک لاکھ 3236، پنجاب میں 86 ہزار 556، خیبر پختونخوا میں 30 ہزار 78، بلوچستان میں 11 ہزار 157 اور اسلام آباد میں 14 ہزار افراد کرونا وائرس سے متاثر ہوئے۔
حکام کے مطابق 24 گھنٹوں کے دوران 24 ہزار 211 افراد کے ٹیسٹ کیے گئے جس کے بعد ٹیسٹس کی مجموعی تعداد 15 لاکھ 62 ہزار 638 ہو گئی ہے۔