امیتابھ بچن کا آئسولیشن وارڈ سے مداحوں کے لیے محبت بھرا پیغام
کرونا وائرس کے شکار ہونے والے بالی وڈ نگری کے لیجنڈ اداکار امیتابھ بچن نے اپنے مداحوں کے نام اسپتال کے کرونا وارڈ سے پیغام بھیجا ہے۔
انہوں نے صحت یابی کی دعائیں اور نیک خواہشات کا اظہار کرنے والوں کا شکریہ ادا کیا۔
امیتابھ بچن نے اپنی ایک انسٹاگرام پوسٹ میں شاعرانہ انداز اپناتے ہوئے کہا کہ دعائیں اور نیک تمنائیں مجھ تک ایسے پہنچ رہی ہیں جس طرح طوفان کے دوران نہ رکنے والی بارش ہوتی ہے۔ محبت کے اس بندھن نے تمام بند توڑ دیے ہیں اور میں اس پیار میں بھیگ گیا ہوں۔
بھارت میں کرونا کیسز نو لاکھ سے متجاوز
بھارت میں کرونا وائرس کے مریضوں کی تعداد مسلسل بڑھ رہی ہے اور اب مجموعی کیسز کی تعداد نو لاکھ سے تجاوز کر چکی ہے۔
گزشتہ 24 گھنٹوں کے دوران ملک میں 28 ہزار 498 افراد میں کرونا کی تشخیص ہوئی جب کہ 553 افراد کی موت ہوئی ہے۔ بھارت میں کرونا وائرس سے اموات کی کل تعداد 23 ہزار 727 تک پہنچ گئی ہے۔
بھارت میں صحت یاب مریضوں کی تعداد بھی بڑھ رہی ہے اور یہ کرونا سے صحت یابی کی شرح 63.02 فی صد ہو گئی ہے۔ اس وقت بھارت میں کرونا کے زیرِ علاج مریضوں کی کل تعداد تین لاکھ 11 ہزار ہے جب کہ پانچ لاکھ 70 ہزار سے زائد افراد شفایاب ہو چکے ہیں۔
دارالحکومت نئی دہلی میں حالات اب کافی بہتر ہو رہے ہیں۔ دہلی میں یومیہ 20 ہزار سے 25 ہزار نمونوں کی جانچ ہو رہی ہے۔ دہلی کے وزیرِ اعلیٰ اروند کیجری وال نے منگل کو 'لوک نائک اسپتال' میں دوسرے پلازمہ بینک کا بھی افتتاح کیا ہے۔
پاکستان میں کرونا کیسز میں کمی
پاکستان میں گزشتہ کئی دنوں سے کرونا وائرس کے یومیہ کیسز کی تعداد میں کمی آ رہی ہے۔ گزشتہ 24 گھنٹوں کے دوران ملک میں صرف 1979 کیسز رپورٹ ہوئے ہیں جب کہ اس دوران 21 ہزار افراد کے کرونا ٹیسٹ کیے گئے تھے۔ اس گراف میں دیکھا جا سکتا ہے کہ ہر گزرتے دن کے ساتھ نئے کیسز کی تعداد کم ہو رہی ہے۔
کرونا کا پھیلاؤ روکنے کے لیے ہانگ کانگ میں سخت پابندیاں عائد کرنے کا فیصلہ
ہانگ کانگ میں کرونا وائرس کے نئے کیسز سامنے آنے کے بعد مقامی حکام نے سخت ترین پابندیاں عائد کرنے کا فیصلہ کیا ہے۔
ماہرین صحت نے خبردار کیا ہے کہ عالمی وبا کے ہانگ کانگ میں پھیلنے کا خطرہ بہت زیادہ ہے ج سکے باعث مقامی حکام نے فیصلہ کیا ہے کہ پبلک ٹرانسپورٹ میں سفر کرنے والے ہر شخص کو فیس ماسک لازمی پہننا ہوگا جب کہ ریستوران شام چھ بجے کے بعد صرف 'ٹیک اوے' سروس مہیا کریں گے۔
جو شخص پبلک ٹرانسپورٹ میں سفر کرتے ہوئے فیس ماسک نہیں پہنے گا اس پر پانچ ہزار ہانگ کانگ ڈالرز تک کا جرمانہ عائد کیا جائے گا۔ اس کے علاوہ ایک مقام پر چار سے افراد کے جمع ہونے پر پابندی ہو گی جب کہ جیمنازیم اور اِن ڈور تفریحی مقامات بھی بند رہیں گے۔
خیال رہے کہ پیر کو ہانگ کانگ میں 52 نئے کیسز رپورٹ ہوئے ہیں جن میں سے 41 مقامی منتقلی کے ہیں۔ گزشتہ ایک ہفتے کے دوران ہانگ کانگ میں کرونا کے 181 کیسز سامنے آ چکے ہیں۔