نیوزی لینڈ کو وائرس کی دوسری لہر کے لیے تیار رہنا چاہیے: وزیرِ اعظم
نیوزی لینڈ کی وزیرِ اعظم جیسنڈا آرڈرن نے عوام کو خبردار کیا ہے کہ انہیں کرونا وائرس کی دوسری لہر کے لیے تیار رہنا چاہیے۔
ویلنگٹن میں بدھ کو صحافیوں سے گفتگو کرتے ہوئے جیسنڈا آرڈرن نے کہا کہ دنیا بھر میں کرونا وائرس کے کیسز میں ایک مرتبہ پھر اضافہ ہو رہا ہے۔ اگر نیوزی لینڈ میں اس وبا کی مقامی سطح پر منتقلی سامنے آئی تو وبا کے خاتمے کی حکمتِ عملی پر عمل درآمد کیا جائے گا۔
انہوں نے کہا کہ حکومت نے ایک فریم ورک جاری کیا ہے جس کے تحت نئے کیسز سامنے آنے کی صورت میں کرونا وائرس کا مقابلہ کیا جائے گا۔
اُن کے بقول دنیا بھر میں کرونا وائرس پر قابو پانے کے لیے کوئی بھی نظام سو فی صد کارآمد نہیں ہے۔
یاد رہے کہ نیوزی لینڈ میں ڈھائی ماہ قبل مقامی سطح پر رپورٹ ہونے والا آخری کیس سامنے آیا تھا۔ ملک بھر میں اب تک اس وبا سے 22 اموات اور 1200 کیسز رپورٹ ہوئے تھے۔
میکسیکو میں سات ہزار سے زائد نئے کیسز
لاطینی امریکہ کے ملک میکسیکو میں گزشتہ چوبیس گھنٹوں کے دوران کرونا وائرس کے مزید 7051 کیسز رپورٹ ہوئے ہیں۔
دنیا بھر میں کرونا وائرس سے سب سے زیادہ متاثر ہونے والے ملکوں کی فہرست میں میکسیکو کا ساتواں نمبر ہے جہاں گزشتہ چوبیس گھنٹوں میں مزید 836 اموات رپورٹ ہوئی ہیں۔
وزارتِ صحت کے مطابق ملک بھر میں کرونا وائرس کے کیسز کی تعداد تین لاکھ 11 ہزار 486 اور 36 ہزار 327 اموات ہو چکی ہیں۔
ملتان: نشتر یونیورسٹی کے وائس چانسلر چل بسے
کرونا وائرس کے شکار ملتان کی نشتر میڈیکل یونیورسٹی کے وائس چانسلر ڈاکٹر مصطفیٰ کمال پاشا انتقال کر گئے ہیں۔
مصطفیٰ کمال گزشتہ 14 جون سے نجی اسپتال میں زیرِ علاج تھے جن کا کرونا ٹیسٹ مثبت آیا تھا۔
مرحوم کی نمازِ جنازہ بعد بدھ کو بعد نمازِ عصر نشتر گراؤنڈ میں ادا کی جائے گی۔
بھارت میں ایک روز میں ریکارڈ ٹیسٹ اور کیسز
بھارت میں ایک روز کے دوران ریکارڈ تین لاکھ کرونا ٹیسٹ کیے گئے ہیں جس کے بعد 29 ہزار 429 افراد میں وائرس کی تشخیص ہوئی ہے۔
بھارت میں کرونا کیسز کی تعداد نو لاکھ سے تجاوز کر گئے ہیں جب کہ اس وبا سے اب تک ملک میں ہلاکتوں کی کل تعداد 24 ہزار 309 ہو گئی ہے۔
سرکاری اعداد و شمار کے مطابق گزشتہ چوبیس گھنٹوں میں کرونا وائرس کے شکار مزید 582 مریض ہلاک ہو گئے ہیں۔
انڈین کونسل آف میڈیکل ریسرچ نے منگل کو تین لاکھ سے زیادہ افراد کے کرونا ٹیسٹ کیے ہیں جو اب تک ایک روز کے دوران کیے جانے والے ٹیسٹ کی تعداد سب سے زیادہ ہے۔