آسٹریلیا: صرف 20 منٹ میں کرونا کا پتا لگانے والا ٹیسٹ دریافت کرنے کا دعویٰ
آسٹریلیا کے محقیقن نے صرف 20 منٹ میں کرونا وائرس کی موجودگی کا پتا لگانے والا ٹیسٹ دریافت کرنے کا دعویٰ کیا ہے۔ یہ ٹیسٹ خون کے نمونوں سے کیا جاتا ہے جس سے انفیکشن ہونے یا نہ ہونے کی موجودگی کا تعین ہوتا ہے۔
موناش یونیورسٹی کے محققین کا کہنا ہے کہ ٹیسٹ اس بات کا بھی تعین کرسکتا ہے کہ کرونا کے جراثیم جسم میں موجود ہیں یا نہیں اور کیا متاثرہ شخص کو ماضی میں بھی انفیکشن ہو چکا ہے۔
'اے سی ایس سنسرز' نامی اخبار میں شائع ہونے والے ایک مقالے میں کہا گیا ہے کہ اس نئے ٹیسٹ سے کرونا وائرس کے مریضوں کا پتا لگانے میں تیزی لائی جاسکے گی اور کم وقت میں زیادہ سے زیادہ ٹیسٹس کیے جاسکیں گے۔
محققین کا کہنا ہے کہ اس ٹیسٹ سے ہر گھنٹے سیکڑوں نمونوں کی جانچ کی جاسکتی ہے۔
آسٹریلیا میں اب تک کرونا کے 11 ہزار سے زائد کیسز رپورٹ ہو چکے ہیں جب کہ اس مرض سے 116 افراد ہلاک ہوئے ہیں۔
کمبوڈیا میں دو امریکی سفارت کاروں میں کرونا وائرس کی تصدیق
کمبوڈیا کی وزارتِ صحت نے رپورٹ کیا کہ ہے کہ جمعے کو صرف پانچ افراد میں کرونا وائرس کی تشخیص ہوئی ہے جن میں سے دو امریکی سفارت کار ہیں۔
وزارتِ صحت کے بیان کے مطابق جن پانچ افراد میں وائرس کی تشخیص ہوئی، وہ تمام افراد امریکہ کا سفر کر کے بدھ کو کمبوڈیا پہنچے تھے۔
کرونا وائرس: احتجاج کے باوجود اسرائیل میں پابندیاں سخت کرنے کا اعلان
اسرائیل میں کرونا وائرس کے باعث نافذ پابندیوں پر احتجاج کے باوجود حکام نے ویک اینڈ پر پابندیاں مزید سخت کرنے کا اعلان کیا ہے۔
اسرائیل میں کرونا کی وبا کا پھیلاؤ روکنے کے لیے ویک اینڈ پر شہریوں کے گھروں سے باہر نکلنے پر پابندی ہے جس کے خلاف شہری سراپا احتجاج ہیں۔
شہریوں کا کہنا ہے کہ پابندیوں کے باعث اُنہیں معاشی مشکلات کا سامنا ہے۔ بعض عوامی حلقے اور حزبِ اختلاف کی جماعتیں وزیرِ اعظم بن یامین نیتن یاہو کی کرونا پالیسی پر بھی عدم اطمینان کا اظہار کرتے رہے ہیں۔
جمعرات کو حکام نے اعلان کیا کہ شہری اس ویک اینڈ پر جمعے سے اتوار تک گھروں سے باہر نکل سکتے ہیں البتہ آئندہ ہفتے سے دوبارہ ویک اینڈ پر گھروں سے باہر نکلنے پر پابندی عائد کی جاسکتی ہے۔
اسرائیل کے سرکاری ریڈیو کے مطابق حکومت نئی پابندیوں کے نفاذ کی پارلیمنٹ سے منظوری لے گی۔
لوگوں کو گھروں سے نکلنے کی اجازت دیے جانے کے باوجود ویک اینڈ پر شاپنگ مالز، دکانیں، سوئمنگ پولز، چڑیا گھر اور میوزیم بند رکھنے کا فیصلہ کیا گیا ہے۔
اسرائیلی حکومت نے اعلان کیا ہے کہ وائرس کا پھیلاؤ روکنے کے لیے ہفتے کے سات دن چار دیواری کے اندر 10 سے زائد افراد اور عوامی مقامات پر 20 سے زائد افراد کے اکٹھے ہونے پر پابندی ہو گی۔
افغانستان میں کرونا کے 35 ہزار سے زائد مریض، تین ماہ بعد پروازیں بحال
افغانستان کی وزارتِ صحت کے مطابق گزشتہ 24 گھنٹوں کے دوران ملک میں 'کووڈ 19' کے 159 نئے کیسز سامنے آئے ہیں جس کے بعد کرونا سے متاثرہ افراد کی مجموعی تعداد 35 ہزار 229 ہو گئی ہے۔
افغان وزارتِ صحت کے اعداد و شمار کے مطابق ملک میں کرونا وائرس سے ہونے والی اموات کی تعداد 1147 ہے جس میں طبی عملے کے 54 افراد بھی شامل ہیں۔
اسی دوران افغانستان میں شہری ہوا بازی کے ادارے نے اندرونِ ملک اور بین الاقوامی پروازوں کا سلسلہ بحال کرنے کا اعلان کیا ہے جسے کرونا کی عالمی وبا کی وجہ سے تین ماہ قبل معطل کیا گیا تھا۔
اقوام متحدہ کی فلاحی فضائی سروس نے افغانستان میں پروازوں کو پانچ روز کے بجائے چار روز کرنے کا فیصلہ کیا ہے۔ تاہم یہ سروس ملک میں انخلا اور منتقلی کے لیے ہفتے میں پانچ دن امداد کی فراہمی جاری رکھے گی۔
ادھر 'ایمیریٹس ایئر لائن' نے کابل کے لیے پروازوں کا سلسلہ شروع کر دیا ہے جب کہ ترک ایئر لائنز نے اپنی پروازیں معطل رکھنے کا اعلان کیا ہے۔