ویکسین کی تیاری میں اولیت کی کوشش، چین امریکہ تنازع کی ایک اور وجہ
چین نے کہا ہے کہ وہ امریکہ کے اس مقام کو چھیننے کی کوشش نہیں کر رہا جو اسے ٹیکنالوجی کی سپر پاور کے طور پر حاصل ہے، لیکن وہ اپنے خلاف واشنگٹن کی جانب سے کینے پر مبنی کسی بھی تہمت اور الزامات کا پوری قوت سے مقابلہ کرے گا۔
چین کی وزارت خارجہ کی ترجمان نے یہ بیان جمعے کے روز ٹرمپ انتظامیہ کی جانب سے چین پر لگائے گئے الزامات کے جواب میں دیا۔
ہوا چن ینگ نے کہا کہ چین کے لیے سب سے اہم بات اپنے شہریوں کے ذرائع آمدنی اور معاش کو بہتر بنانا اور عالمی امن و استحکام کو برقرار رکھنا ہے، جب کہ ناقدین کا کہنا ہے کہ چین کی خارجہ پالیسی مسلسل جارحانہ ہو رہی ہے جسے وہ چین کی فوج، ٹیکنالوجی، اقتصادی اور دوسرے شعبوں میں بڑھتے ہوئے اثر و رسوخ میں دیکھ رہے ہیں۔
چین کی وزارت خارجہ کی ترجمان کے یہ تبصرے امریکی اٹارنی جنرل ولیم بار کی جمعرات کے روز کی جانے والی اس تقریر کے ردعمل میں سامنے آئے ہیں جس میں انہوں نے کہا کہ چین نے عالمی وبا کرونا وائرس کے آغاز پر نہ صرف مارکیٹ پر اپنے مفاد میں غلبہ حاصل کرنے اور بیجنگ پر امریکہ کے انحصار کو اجاگر کرنے کے لیے استعمال کیا بلکہ اس نے ان ملکوں کے لیے مصنوعات کی برآمدات روکنے اور ذخیرہ اندوزی کے لیے بھی استعمال کیا جنہیں اس کی ضرورت تھی۔
بار نے یہ الزام بھی لگایا کہ چین کی حکومت سے منسلک ہیکرز نے امریکی یونیورسٹیوں اور کاروباروں کی کرونا وائرس کی ویکسین کی تیاری سے متعلق ریسرچ چرانے کی کوشش کی۔ انہوں نے بیجنگ کے خلاف یہ الزامات، مغربی ملکوں کی جانب سے روس کے خلاف اسی نوعیت کے الزامات عائد کیے جانے کے کئی گھنٹوں کے بعد لگائے۔
ان کا کہنا تھا کہ اب چین کی حکومت بلکہ اس کا پورا معاشرہ عالمی معیشت پر کنٹرول حاصل کرنے اور ٹیکنالوجی کے شعبے میں دنیا کی سپرپاور پر سبقت حاصل کرنے مہم چلا رہا ہے۔
ہوا نے سائبر حملوں سے متعلق بار کے الزامات کو مسترد کرتے ہوئے ویکسین سے متعلق ان کے الزامات کو مضحکہ خیز قرار دیا۔
انہوں نے دعویٰ کیا کہ ہر شخص یہ جانتا ہے کہ کرونا وائرس کی ویکسین کی تیاری میں چین قیادت کر رہا ہے۔ ہمارے پاس عالمی معیار کے ریسرچ سائنس دان ہیں، اور ہمیں چوری کے ذریعے قائدانہ پوزیشن حاصل کرنے کی ضرورت نہیں ہے۔
چین ویکسین بنانے کے لیے تیزی سے کام کر رہا ہے نئی ویکسین کے سلسلے میں اس وقت کئی ملکوں کے درمیان مسابقت جاری ہے، کیونکہ شہرت و وقار اور منافع اس کی جھولی میں آئے گا جو سب سے پہلے کرونا وائرس سے بچاؤ کی مؤثر ویکسین متعارف کرانے میں کامیاب ہو گا۔
دنیا میں پہلی بار 100 گھنٹوں کے دوران 10 لاکھ سے زائد کیس رپورٹ
دنیا بھر میں کرونا وائرس کا پھیلاؤ تیزی سے جاری ہے، اعداد و شمار کے مطابق گزشتہ 100 گھنٹوں میں دنیا بھر میں ریکارڈ 10 لاکھ سے زائد کیس رپورٹ ہوئے ہیں جب کہ مجموعی کیس ایک کروڑ 40 لاکھ سے بڑھ گئے ہیں۔
امریکہ میں تصدیق شدہ کیسز کی تعداد 36 لاکھ سے زیادہ ہو گئی ہے جب کہ اس تعداد میں ہر گزرتے دن کے ساتھ اضافہ ہو رہا ہے۔
دنیا بھر میں مہلک وبا کے باعث اب تک پانچ لاکھ 90 ہزار سے زائد افراد ہلاک ہو چکے ہیں۔
امریکہ میں یومیہ چار کروڑ 64 لاکھ ٹیسٹ کیے جا رہے ہیں جب کہ روس میں یہ تعداد دو کروڑ 43 لاکھ ہے۔
آسٹریلیا میں پارلیمان کا اجلاس موخر
آسٹریلیا کے وزیراعظم اسکاٹ موریسن نے پارلیمنٹ کا اجلاس مزید کئی ہفتوں تک موخر کردیا ہے۔ یہ فیصلہ ملک میں کرونا وائرس کے پھیلاؤ کو روکنے کی غرض سے کیا گیا ہے جس نے ملک کی سب سے گنجان آباد دو ریاستوں کو اپنی لپیٹ میں لے لیا ہے۔
وزیراعظم نے اسپیکر سے چار اگست سے شروع ہونے والے پارلیمنٹ سیشن کو موخر کرنے کے لیے کہا ہے۔ شیڈول کے مطابق پارلیمنٹ سیشن چار اگست سے شروع ہو کر دو ہفتوں تک جاری رہنا تھا۔
اس حوالے سے جاری وزیراعظم کے تحریری بیان میں کہا گیا ہے کہ حکومت اراکین پارلیمنٹ اور اس کے عملے کی صحت سے متعلق کوئی رسک نہیں لے سکتی۔
وزیراعظم کا کہنا تھا کہ یہ فیصلہ طبی ماہرین کی مشاورت کے بعد کیا گیا ہے۔ آسٹریلیا میں مارج میں آخری مرتبہ پارلیمنٹ کا اجلاس ہوا تھا جس کے بعد سیشنز کو اگست تک کے لیے موخر کر دیا گیا تھا۔
جمعے کو ریاست وکٹوریہ میں مزید 217 نئے کیسز رپورٹ ہوئے ہیں جب کہ اس سے ملحقہ ریاست نیو ساؤتھ ویلز میں بھی 15 نئے کیسز سامنے آئے ہیں۔
چین میں کرونا کے مزید 22 کیس رپورٹ
چین میں جمعے کو کرونا وائرس کے 22 نئے کیسز رپورٹ ہوئے ہیں جن میں سے 16 کا تعلق ملک کے مغربی علاقے سنکیانگ کے دارالحکومت اُرمچی سے ہے جہاں کرونا وائرس کے کیسز پر قابو پانے کے لیے ہنگامی منصوبہ بندی کا اعلان کردیا گیا ہے۔
علاقائی حکومت کا کہنا ہے کہ حالیہ تمام نئے کیسز مقامی طور پر ایک فرد سے دوسرے فرد تک منتقل ہوئے ہیں۔
اُرمچی کا شمار چین کے اُن شہروں میں ہوتا تھا جو اب تک اس وبا سے بچے ہوئے تھے۔ اس علاقے میں وائرس کے شبہے میں 269 افراد کی نگرانی بھی کی جا رہی ہے۔