آسٹریلیا: کرونا کیسز میں کمی آنے میں مزید ایک ہفتہ لگ سکتا ہے
آسٹریلیا میں کرونا وائرس سے اب تک 123 اموات اور 11 ہزار 800 کیسز رپورٹ ہو چکے ہیں۔ حکام نے خدشہ ظاہر کیا ہے کہ کیسز میں کمی آنے میں مزید ایک ہفتہ لگ سکتا ہے۔
آسٹریلوی ریاست وکٹوریا کے شہر میلبورن میں جزوی لاک ڈاؤن ہے جہاں پیر کو مزید 275 افراد میں وائرس کی تشخیص ہوئی ہے۔
آسٹریلیا کے قائم مقام چیف میڈیکل افسر پال کیلی نے کہا ہے کہ کرونا وائرس کے کیسز کی سطح جون میں سامنے آنے والے کیسز کی سطح پر آنے میں مزید ایک ہفتہ لگ سکتا ہے۔
جون میں آسٹریلیا کی سب سے زیادہ متاثرہ ریاست وکٹوریا میں یومیہ سنگل یا ڈبل ڈیجٹ کیسز سامنے آ رہے تھے۔
برسلز: یورپی یونین کے لیڈروں کی کرونا پیکج پر کانفرنس، رہنما اپنے اپنے مؤقف پر قائم
کرونا وائرس سے متعلقہ اقتصادی بحالی کے منصوبے پر یورپی یونین کے لیڈروں کا تیسرے روز بھی اجلاس جاری رہا۔ 27 لیڈروں کے درمیان اب تک کثیر بجٹ پر اتفاق نہیں ہو سکا ہے۔
جرمنی کی چانسلر آنگیلا مرخیل نے انتباہ کیا ہے کہ سربراہی اجلاس کسی سمجھوتے کے بغیر ختم ہو سکتا ہے۔
مذاکرات کے اضافی دن کے اجلاس میں شرکت کے بعد جرمنی کی چانسلر نے کہا کہ "مجھے یقین نہیں ہے کہ ہم کسی متفقہ سمجھوتے تک پہنچ پائیں گے، کیوں کہ خیر سگالی کے جذبے کے باوجود لیڈر اپنے اپنے مؤقف پر ڈٹے ہوئے ہیں۔"
مرخیل، فرانس کے صدر ایمانوئیل میخواں اور یورپی یونین کے صدر چارلز مائیکل اب مشترکہ طور پر ایک نئی پیش کش پر غور کر رہے ہیں تاکہ یہ تعطل ٹوٹے اور کسی نتیجے تک پہنچا جا سکے۔
چین میں مزید 22 کیسز رپورٹ
چین میں کرونا وائرس کے مزید 22 کیسز رپورٹ ہوئے ہیں جب کہ 13 افراد میں وائرس کی علامات پائی گئی ہیں۔
چین کے ہیلتھ کمیشن نے پیر کو جاری بیان میں کہا ہے کہ ملک بھر میں گزشتہ چوبیس گھنٹوں میں 22 افراد میں وائرس کی تشخیص ہوئی ہے جب کہ 17 کیسز صوبے سنکیانگ کے مغربی حصے سے رپورٹ ہوئے ہیں۔
چین میں اب تک مصدقہ کیسز کی تعداد 83 ہزار 682 ہو گئی ہے جب کہ اس وبا سے چین میں 4634 افراد ہلاک بھی ہو چکے ہیں۔
فرانس: عوامی مقامات پر ماسک نہ پہننے والوں کو جرمانہ
فرانس میں کرونا وائرس کی دوسری لہر کے خدشے کے پیشِ نظر عوامی مقامات پر ماسک پہننے کو لازم قرار دیا ہے اور اس کی خلاف ورزی پر جرمانہ ہو گا۔
حکام کی جانب سے جاری حکم نامے کے مطابق ایسے افراد جو عوامی مقامات پر ماسک نہیں پہنیں گے انہیں 135 یورو کا جرمانہ ادا کرنا ہو گا۔
فرانس کے وزیرِ صحت کے مطابق حکم نامے کا اطلاق، دکانوں، سپر اسٹورز، بینکوں اور ان کاروباری مراکز پر ہو گا جہاں لوگوں کی بڑی تعداد جمع ہوتی ہے۔
فرانس کرونا وائرس سے یورپ کے متاثرہ ترین ملکوں میں شامل ہے جہاں پبلک ٹرانسپورٹ پر پہلے ہی ماسک پہننے کو لازم قرار دیا گیا تھا۔ حال ہی میں ملک بھر میں لاک ڈاؤن کو ختم کیا ہے تاہم وبا کی دوسری لہر کا خدشہ بھی ظاہر کیا جا رہا ہے۔