کرونا وائرس کے پھیلاؤ میں کوئی کردار نہیں: بل گیٹس
ارب پتی امریکی تاجر اور مائیکرو سافٹ کمپنی کے مالک بل گیٹس نے کہا ہے کہ وبائی مرض کرونا وائرس پھیلاؤ میں اُن کا کوئی کردار نہیں ہے۔ سوشل میڈیا اُن کے خلاف سازشی نظریات پھیلانے میں مصروف ہے۔
بل گیٹس نے جمعرات کو امریکی نشریاتی ادارے 'سی این این' کو دیے گئے ایک انٹرویو میں کہا کہ وبائی مرض کے پھیلنے کے بعد سوشل میڈیا پر ان سے متعلق طرح طرح کی باتیں کی جا رہی ہیں اور ان سازشی نظریات کا ایک طویل سلسلہ جاری ہے۔
انہوں نے کہا کہ سوشل میڈیا فلیٹ فارمز پر ان کے خلاف من گھڑت خبریں، مضامین اور توڑ مروڑ کر بنائی گئی تصاویر ہزاروں بار شیئر کی گئی ہیں۔
بل گیٹس کے بقول متعدد زبانوں میں پیغام رسانی کے لیے استعمال کی جانے والی ایپس کے ذریعے اُنہیں تنقید کا نشانہ بنایا جا رہا ہے اور یہ سلسلہ اسی وقت سے جاری ہے جب سے کرونا وائرس دنیا بھر میں پھیلا ہے۔
افغانستان: کرونا کے مریض 36 ہزار کے قریب، 24 ہزار سے زائد صحت یاب
افغانستان کی وزارتِ صحت نے گزشتہ 24 گھنٹوں کے دوران 'کووڈ 19' کے 60 نئے کیسز رپورٹ کیے ہیں۔ ملک میں کرونا وائرس کے مریضوں کی کل تعداد 35 ہزار 988 ہو گئی ہے۔
وزارتِ صحت کے مطابق ملک میں وائرس سے مرنے والوں کی تعداد 1225 ہو گئی ہے جب کہ 24 ہزار 573 مریض صحت یاب ہو چکے ہیں۔
افغانستان میں اقوامِ متحدہ کے فلاحی امور کے رابطہ کار دفتر نے افغان حکومت پر زور دیا ہے کہ وہ طبّی عملے کے تحفظ کے لیے موزوں اقدامات کرے۔
چین میں کرونا وائرس کے 34 نئے کیس
چین میں کرونا وائرس کی دوسری لہر کے دوران ہفتے کو مزید 34 نئے کیسز رپورٹ ہوئے ہیں جن میں سے 20 کا تعلق صوبہ سنکیانگ سے ہے۔ ہیلتھ کمیشن کے مطابق چین میں ایک روز قبل بھی 21 کیسز رپورٹ ہوئے تھے۔
نیشنل ہیلتھ کمیشن کے ایک بیان کے مطابق نئے انفیکشن کیسز میں سے 20 کا تعلق صوبہ سنکیانگ کے انتہائی مغربی علاقے سے ہے۔ نو افراد کا تعلق شمال مشرقی صوبے لیاؤننگ سے ہے۔
چین کے ہیلتھ کمیشن کا کہنا ہے کہ ملک بھر میں اب تک 83 ہزار 789 کیسز کی تصدیق ہوچکی ہے جب کہ اس مرض سے ہلاکتوں کی مجموعی تعداد چار ہزار 634 ہو چکی ہے۔