شمالی کوریا نے کرونا وائرس کے پہلے کیس کا اقرار کر لیا
شمالی کوریا کئی ماہ سے انکار کرتا آیا ہے کہ اس کے ملک میں کرونا سے متاثرہ کوئی مریض نہیں۔ اب بالآخر اس نے ایک کیس کی موجودگی کا اقرار کر ہی لیا ہے۔ اس کا کہنا ہے کہ وائرس کا انکشاف حال ہی میں واپس آنے والے ایک بھگوڑے میں ہوا ہے۔
سیول سے ہمارے نامہ نگار بل گیلو نے خبر دی ہے کہ شمالی کوریا نے کہا ہے کہ ان کے ملک میں کرونا وائرس کا ایک مریض پایا گیا ہے جو تین سال پہلے جنوبی کوریا بھاگ گیا تھا اور اب واپس آیا ہے۔
سرکاری میڈیا نے الزام لگایا ہے کہ مبینہ بھگوڑا 19 جولائی کو غیر قانونی طور پر سرحد پار کر کے شمالی کوریا پہنچا ہے۔
شمالی کوریا کے لیڈر کم جانگ ان نے ہنگامی حالات کا اعلان کر دیا ہے اور اس سرحدی علاقے کی ناکہ بندی کر دی ہے، جہاں سے اس مبینہ بھگوڑے کے واپس آنے کی اطلاع موصول ہوئی ہے۔
شمالی کوریا ایک طویل عرصے تک یہی کہتا رہا ہے کہ وہاں کرونا وائرس میں ایک شخص بھی مبتلا نہیں ہے، جب کہ دنیا بھر کے صحت کے ماہرین اس دعوے پر شک کا اظہار کرتے ہیں۔ ان کا خیال ہے یہ ناممکن ہے کہ وہاں کرونا کا کوئی مریض نہ ہو۔
چین اور شمالی کوریا کی طویل مشترک سرحد ہے اور یہ چین ہی ہے جہاں یہ وبا پھوٹی اور پوری دنیا میں پھیل گئی۔
بہرحال اس ایک مریض کے انکشاف کے بعد شمالی کوریا نے فوری طور پر اپنی سرحدیں بند کر دی ہیں۔ تاہم سرحدی علاقوں پر کمزور کنٹرول کی وجہ سے لوگوں کی آمد و رفت بلا روک ٹوک جاری رہتی ہے۔
ماہرین کہتے ہیں کہ شمالی کوریا میں کرونا وبا کا پھوٹنا اس لیے اور بھی خطرناک ہے کہ اس کے اکثر علاقے شدید غربت کا شکار ہیں اور اس ملک کا صحت کا نظام کمزور اور ناقص ہے۔
پاکستان میں 20 اموات، 1176 نئے کیسز رپورٹ
پاکستان میں گزشتہ چوبیس گھنٹوں میں کرونا وائرس کے شکار 20 مریض انتقال کر گئے ہیں جب کہ 1176 افراد میں وائرس کی تشخیص ہوئی ہے۔
سرکاری اعداد و شمار کے مطابق ملک بھر میں کرونا سے ہلاکتوں کی کل تعداد 5842 اور کیسز کی تعداد دو لاکھ 74 ہزار 289 تک پہنچ گئی ہے جن میں سے دو لاکھ 41 ہزار سے زیادہ مریض صحت یاب بھی ہو چکے ہیں۔
امریکہ: ریاست فلوریڈا ملک کی دوسری بدترین متاثرہ ریاست بن گئی
امریکہ کی ریاست فلوریڈا میں کرونا وائرس کے ریکارڈ 9300 نئے کیسز رپورٹ ہوئے ہیں۔ اس کے ساتھ ریاست فلوریڈا امریکہ کی کووڈ 19 سے متاثرہ دوسری بڑی ریاست بن گئی ہے۔
اتوار کو فلوریڈا میں 9300 نئے کیسز رپورٹ ہوئے جب کہ اس سے قبل نئے کیسز کی اتنی بڑی تعداد صرف نیویارک میں ریکارڈ کی گئی تھی۔
فلوریڈا میں کووڈ 19 کیسز کی مجموعی تعداد چار لاکھ 23 ہزار 855 ہو گئی ہے۔ نیویارک اب بھی اموات کے لحاظ سے سب سے آگے ہے۔ یہاں مجموعی طور پر مرنے والوں کی تعداد 32 ہزار سے تجاوز کر گئی ہے جب کہ فلوریڈا میں یہ تعداد چھ ہزار ہے۔
آسٹریلیا: ریاست وکٹوریہ میں ریکارڈ کیسز، دوبارہ لاک ڈاؤن پر غور
آسٹریلیا کی ریاست وکٹوریہ میں پیر کو کرونا وائرس کے سب سے زیادہ کیسز ریکارڈ ہوئے ہیں۔ اس اچانک اضافے کے بعد ریاست کو مزید چھ ہفتوں تک لاک ڈاؤن کرنے پر غور کیا جا رہا ہے۔
وکٹوریہ، آسٹریلیا کی سب سے گنجان آباد ریاست ہے جہاں پیر کو 532 نئے کیسز رپورٹ ہوئے جو ایک دن میں ہونے والا سب سے بڑا اضافہ ہے۔
حکام نے عندیہ دیا ہے کہ اگر لوگوں نے بیماری کے باوجود گھروں سے بلاضرورت نکلنا ختم نہیں کیا تو ریاست کو چھ ہفتوں تک کے لیے لاک ڈاؤن کر دیا جائے گا۔
ریاست وکٹوریہ میں اب تک ایک دن میں چھ ہلاکتوں کے بعد مرنے والوں کی مجموعی تعداد 77 ہو گئی ہے۔