کرونا وائرس میں مبتلا صدور، وزرائے اعظم اور شہزادے
بیلاروس کے صدر الیگزینڈر لوکاشینکو نے کہا ہے کہ اُن کا کرونا وائرس کا ٹیسٹ مثبت آیا تھا لیکن اس کی علامات ظاہر نہیں ہوئیں اور اب وہ اس سے صحت یاب ہو چکے ہیں۔
کم از کم چار ملکوں کے وزرائے اعظم اس وبا کی زد میں آ چکے ہیں جن میں برطانیہ کے بورس جانسن، گنی بساؤ کے نونو گومز نابیام، روس کے میخائل میشوسٹن اور آرمینیا کے نکول پشینیان شامل ہیں۔
اسی طرح تین ملکوں کے شاہی خاندانوں کے ارکان کو کرونا وائرس لاحق ہو چکا ہے جن میں موناکو کے حکمران شہزادہ البرٹ دوم، برطانیہ کے ولی عہد شہزادہ چارلس اور بیلجیم کے شاہ فلپس کے بھتیجے شہزادہ یوچم شامل ہیں۔
کرونا وائرس کی دو ممکنہ ویکسینز کی حتمی آزمائش
امریکہ میں کرونا وائرس کی دو ممکنہ ویکسینز کی وسیع پیمانے پر حتمی آزمائش کا آغاز کر دیا گیا ہے تاکہ اُن کے محفوظ اور مؤثر ہونے کا یقین کیا جا سکے۔
امریکہ میں مجموعی طور پر 30 ہزار صحت مند رضاکاروں کو یہ ویکسین کئی ہفتوں کے وقفے سے دو بار لگائی جائے گی۔
نیشنل انسٹی ٹیوٹ آف الرجی اینڈ انفیکشس ڈیزز کے سربراہ ڈاکٹر انتھونی فاؤچی نے صحافیوں کو بتایا کہ آخری مرحلے کی آزمائش کے ابتدائی نتائج نومبر تک معلوم ہوجائیں گے۔ اگر آزمائش کامیاب رہی تو موڈرنا ہر سال ویکسین کی 50 کروڑ خوراکیں فراہم کرے گی، جبکہ اسے امید ہے کہ وہ سالانہ ایک ارب خوراکیں بنانے کے قابل ہوجائے گی۔
افغانستان میں نئے کیسز کی شرح میں کمی
افغانستان کی وزارتِ صحت نے بدھ کے روز کرونا وائرس کے مزید 105 کیسز کے اضافے کی تصدیق کی ہے۔
افغانستان میں کرونا وائرس کے مریضوں کی کل تعداد 36473 ہو گئی ہے۔
وزارتِ صحت کے مطابق گزشتہ دو ماہ کے مقابلے میں کرونا وائرس کے نئے مثبت کیسز کی شرح میں کمی ہوئی ہے۔
نگران وزیرِ صحت ڈاکٹر احمد جواد عثمانی نے خبردار کیا ہے کہ اگر احتیاطی تدابیر کا خیال نہ رکھا گیا تو کیسز کی تعداد میں دوبارہ اضافہ ہو سکتا ہے۔
انہوں نے اندیشہ ظاہر کیا کہ عید پر جانوروں کی قربانیوں پر کانگو بخار کی وبا پھیل سکتی ہے۔
قربانی کے جانوروں کی آن لائن خریداری
پاکستان میں اس سال عید الاضحیٰ کی رونقیں بھی کرونا وائرس کی وجہ سے کچھ ماند پڑ گئی ہیں۔ سب سے زیادہ متاثر ہونے والا معاملہ قربانی کے جانوروں کی خریداری ہے۔ جانوروں کی آن لائن خریداری پاکستان میں کتنی مقبول ہے، کھلی مویشی منڈیوں سے کون خریداری کر رہا ہے اور علماء آن لائن قربانی کے اس طریقے کو کیسے دیکھ رہے ہیں؟ دیکھیے گیتی آرا انیس کی اس رپورٹ میں
