آسٹریلیا: ریاست وکٹوریہ میں فوج تعینات
آسٹریلیا کی دوسری بڑی گنجان آباد ریاست وکٹوریہ میں کرونا وائرس کے پھیلاؤ کو روکنے کے لیے منگل سے فوج تعینات کر دی گئی ہے۔
حکام کا کہنا ہے کہ کرونا وائرس کے سبب گھروں میں قید رہنے کے احکامات کی خلاف ورزی کرنے والوں کو 14 ہزار امریکی ڈالرز سے زائد کا جرمانہ ادا کرنا پڑ سکتا ہے۔
ریاست وکٹوریہ کے پریمیئر ڈینئل اینڈریوز کا کہنا ہے کہ شہریوں کو گھروں تک محدود رکھنے کے لیے 500 فوجی اہلکار تعینات کیے جائیں گے۔
وکٹوریہ میں منگل کو کرونا وائرس کے 439 نئے کیس رپورٹ ہوئے ہیں جس کے بعد ریاست وکٹوریہ میں اس وبا سے متاثرہ افراد کی تعداد 12 ہزار کے قریب ہو گئی ہے۔
لاطینی امریکہ میں کیسز کی تعداد 50 لاکھ سے تجاوز کر گئی
دنیا بھر میں لاطینی امریکہ کرونا وائرس سے سب سے زیادہ متاثر ہونے والا خطہ بن گیا ہے۔ جہاں اس وبا سے متاثرہ افراد کی تعداد 50 لاکھ سے تجاوز کر گئی ہے۔
کولمبیا کی وزارتِ صحت کے مطابق لاطینی امریکہ میں پیر کو کرونا وائرس کے 10 ہزار سے زائد کیسز رپورٹ ہوئے ہیں جب کہ اس خطے میں اس وبا سے ہلاک ہونے والوں کی تعداد 2 لاکھ ہو گئی ہے۔
لاطینی امریکہ کے ملک برازیل میں ‘کووڈ 19’ کے سبب ہلاکتوں کی تعداد 96 ہزار تک پہنچ چکی ہے۔ جب کہ میکسیکو میں اس وبا سے 48 ہزار سے زائد افراد ہلاک ہوئے ہیں۔
ماہرین کے مطابق لاطینی امریکہ میں اس وبا سے متاثرہ افراد کی تعداد میں ہونے والے اضافے کی وجہ غربت اور آبادی میں اضافہ ہے۔
پنجاب کے تمام سرکاری اسپتالوں میں معمول کی سرگرمیاں شروع کرنے کا فیصلہ
پاکستان کے صوبے پنجاب کی وزیرِ صحت ڈاکٹر یاسمین راشد کی زیرِ صدارت ہونے والے اجلاس میں فیصلہ کیا گیا ہے کہ پنجاب کے تمام اسپتالوں میں معمول کی سرگرمیاں دوبارہ سے شروع کی جائیں گی۔
ڈاکٹر یاسمین راشد کا کہنا ہے کہ پنجاب میں کرونا وائرس کے مریضوں کی تعداد میں حیرت انگیز کمی واقع ہو رہی ہے۔ جس کے باعث اسپتالوں کو معمول کے مطابق کھولا جا رہا ہے۔
صوبے کے مختلف اسپتالوں میں زیرِ علاج کرونا وائرس کے مریضوں کی تفصیلات بتاتے ہوئے ڈاکٹر یاسمین راشد نے بتایا کہ بے نظیر بھٹو اسپتال میں کرونا وائرس کے 10، ملتان کے نشتر اسپتال میں 27، ڈیرہ غازی خان میں دو اور گجرات میں کرونا کے تین مریض زیرِ علاج ہیں۔
گوجرانوالہ میں گزشتہ نو روز کے دوران کرونا وائرس کا کوئی کیس رپورٹ نہیں ہوا۔
واضح رہے کرونا وائرس کے باعث صوبے بھر کے تمام سرکاری اسپتالوں میں علاج معالجے کی سہولتوں کو محدود کر دیا گیا تھا۔
کیسز اور اموات میں کمی، کیا پاکستان نے کرونا وائرس سے جنگ جیت لی؟
پاکستان میں گزشتہ چند ہفتوں سے کرونا وائرس کے مریضوں کی تعداد میں بتدریج کمی ہو رہی ہے۔ نیشنل کمانڈ اینڈ آپریشن کنٹرول اتھارٹی (این سی او سی) کے اعداد و شمار کے مطابق پاکستان میں ایک طرف نئے مریضوں کی تعداد مسلسل کم ہو رہی ہے تو وہیں کرونا کے صحت یاب مریضوں کی تعداد میں بھی اضافہ ہو رہا ہے۔
اس صورتِ حال پر ماہرینِ صحت کہتے ہیں کرونا کیسز میں کمی کی ایک وجہ ٹیسٹوں کی شرح کم کرنا ہے جب کہ بہتر حکومتی حکمتِ عملی نے بھی اپنا کردار ادا کیا ہے۔
وزیرِ اعظم کے معاونِ خصوصی اور کرونا وائرس سے متعلق فوکل پرسن ڈاکٹر فیصل سلطان کے مطابق ٹیسٹوں کی شرح میں کمی اس لیے ہو رہی ہے کیوں کہ لیبارٹریوں اور اسپتالوں میں کرونا ٹیسٹ کرانے کے لیے آنے والوں کی تعداد کم ہو گئی ہے۔
وائس آف امریکہ سے گفتگو کرتے ہوئے ڈاکٹر فیصل سلطان نے بتایا کہ کرونا وائرس کے مثبت ٹیسٹ کی شرح کئی ہفتوں سے نیچے گرتی جا رہی ہے۔ اس کے علاوہ کرونا کے جو مریض اِس وقت پاکستان کے مختلف اسپتالوں میں زیرِ علاج ہیں، خواہ وہ آکسیجن پر ہیں یا وینٹی لیٹرز پر، اُن کی تعداد میں بھی بتدریج کمی ہو رہی ہے۔
انہوں نے کہا کہ اس حساب سے صورتِ حال ابھی بہتر ہے۔ لیکن کئی ممالک میں ایسا بھی ہوا ہے کہ کرونا وائرس کی شدت کم ہونے کے بعد دوسری لہر آئی ہے۔ اس لیے ابھی احتیاط کرنا لازم ہے۔
یونیورسٹی آف ہیلتھ سائنسز (یو ایچ ایس) کے پرنسپل پروفیسر ڈاکٹر جاوید اکرام بھی ڈاکٹر فیصل سلطان سے اتفاق کرتے ہیں۔ ان کے بقول پاکستان میں کیسز اور اموات کی شرح کم ہوئی ہے لیکن یہ وائرس ابھی مکمل طور پر ختم نہیں ہوا ہے۔ ان کے بقول اس وائرس کا خطرہ برقرار رہے گا، اس لیے ہمیں بہت زیادہ محتاط رہنا چاہیے۔