روس: پانچ ہزار سے زائد نئے کیسز، اموات 14 ہزار 351 تک پہنچ گئیں
روس میں گزشتہ 24 گھنٹوں کے دوران 5159 نئے کیسز سامنے آئے ہیں جس کے بعد کرونا وائرس سے متاثرہ ملکوں کی فہرست میں چوتھے نمبر پر موجود روس میں کووڈ 19 کا شکار ہونے والے افراد کی مجموعی تعداد آٹھ لاکھ 61 ہزار 423 ہو گئی ہے۔
روس میں کرونا وائرس سے متعلق قائم ادارے نے کہا ہے کہ گزشتہ 24 گھنٹوں کے دوران ملک میں 144 افراد کووڈ 19 سے ہلاک ہوئے ہیں۔ روس میں کرونا سے ہونے والی اموات کی تعداد 14 ہزار 351 ہے۔
لاطینی امریکہ میں کرونا کیسز 50 لاکھ سے متجاوز
لاطینی امریکہ میں کرونا وائرس کے کیسز کی تعداد تیزی سے بڑھ رہی ہے۔ خبر رساں ادارے 'رائٹرز' کے اعداد و شمار کے مطابق اس خطے میں کرونا وائرس کے مریضوں کی تعداد 50 لاکھ کا ہندسہ عبور کر چکی ہے۔
لاطینی امریکہ میں کرونا وائرس سے سب سے زیادہ متاثر ہونے والا ملک برازیل ہے جو دنیا بھر میں کرونا سے متاثرہ ملکوں کی فہرست میں امریکہ کے بعد دوسرے نمبر پر ہے۔
امریکہ کے پڑوسی ملک میکسیکو میں بھی کرونا وائرس کے روزانہ ہزاروں مریض سامنے آ رہے ہیں۔
کرونا وائرس سے لاطینی امریکہ میں دو لاکھ سے زائد اموات بھی ہوئی ہیں۔
بھارت: مسلسل چھٹے روز 50 ہزار سے زائد نئے کیس رپورٹ
بھارت میں مسلسل چھٹے روز کرونا وائرس کے 50 ہزار سے زائد کیس رپورٹ ہوئے ہیں۔
بھارت میں پیر کو کرونا وائرس کے 52 ہزار 50 نئے کیسز رپورٹ ہوئے جب کہ وائرس سے 803 افراد ہلاک بھی ہوئے۔
بھارت میں کرونا وائرس کے کیسز کی تعداد 18 لاکھ 55 ہزار سے تجاوز کر چکی ہے جب کہ 38 ہزار 938 افراد ہلاک بھی ہوئے ہیں۔ وبا سے صحت یاب ہونے والوں کی تعداد 12 لاکھ 30 ہزار سے زائد ہے۔
کرونا کے خاتمے کے بعد اسکولوں میں بچوں کی واپسی اولین ترجیح ہونی چاہیے: انتونیو گوتیرس
اقوامِ متحدہ کے سیکریٹری جنرل انتونیو گوتیرس کا کہنا ہے کہ کرونا وائرس کے باعث اسکول بند ہونے سے دنیا بھر میں ایک پوری نسل کو بحران کا سامنا ہے۔
انہوں نے یہ بات منگل کو "ہمارا مستقبل بچائیں" کے عنوان سے اقوامِ متحدہ کی ایک مہم کے آغاز کے موقع پر ویڈیو کانفرنس کے دوران کہی۔ اس مہم کا مقصد دنیا میں تعلیم کی بحالی کی جانب توجہ مبذول کرانا ہے۔
اقوامِ متحدہ کے سیکریٹری جنرل کا کہنا تھا کہ اس وقت 160 کے قریب ملکوں میں ایک ارب سے زائد بچے رسمی تعلیم سے محروم ہیں جب کہ کم از کم چار کروڑ بچے 'پِری اسکول' کی تعلیم شروع نہیں کر پائے ہیں۔
انہوں نے کہا کہ معذور طلبہ، اقلیتوں، پناہ گزینوں اور بے دخل افراد کے بچوں کے لیے تعلیم میں پیچھے رہ جانے کا سنگین خطرہ موجود ہے۔
سیکریٹری جنرل نے کہا کہ اس وقت دنیا بھر میں 25 کروڑ طلبہ اسکول جانے سے محروم ہیں اور یہ ایک بڑا تعلیمی بحران ہے۔ کرونا وائرس کے خاتمے کے بعد طالب علموں کی اسکولوں میں واپسی اوّلین ترجیح ہونی چاہیے۔