سعودی عرب کرونا سے متاثرہ ملکوں کی فہرست میں پاکستان سے آگے
کرونا وائرس سے متاثرہ ملکوں کی فہرست میں سعودی عرب پاکستان سے آگے نکل گیا ہے۔ سعودی عرب میں کرونا وائرس کے مریضوں کی تعداد دو لاکھ 84 ہزار سے زائد ہے جب کہ پاکستان میں دو لاکھ 82 ہزار کیسز رپورٹ ہو چکے ہیں۔
پاکستان میں کرونا سے چھ ہزار اموات ہوئی ہیں جب کہ سعودی عرب میں اموات کی تعداد تین ہزار سے زائد ہے۔
افریقہ میں کرونا کیسز 10 لاکھ سے زیادہ
براعظم افریقہ کے مختلف ملکوں میں کرونا کیسز کی مجموعی تعداد 10 لاکھ سے تجاوز کر گئی ہے۔ افریقی ملکوں میں سب سے زیادہ کیسز جنوبی افریقہ سے سامنے آئے ہیں۔
خبر رساں ادارے 'رائٹرز' کے اعداد و شمار کے مطابق افریقہ بھر میں کرونا وائرس کے مریضوں کی تعداد جمعے کو 10 لاکھ 10 ہزار سے زائد ہو گئی ہے جب کہ اس خطے میں عالمی وبا کا شکار ہو کر مرنے والوں کی تعداد 22 ہزار سے زائد ہو چکی ہے۔
افغانستان میں 78 نئے کیسز، 25 ہزار مریض صحت یاب
افغان وزارتِ صحت نے جمعے کو کرونا وائرس کے 78 نئے کیس رپورٹ کیے ہیں۔ وزارتِ صحت کے اعداد و شمار کے مطابق 'کووڈ 19' سے ہونے والی اموات کی تعداد 1307 ہے جب کہ 25 ہزار 903 افراد صحت یاب ہو چکے ہیں۔
نگران وزیرِ صحت احمد جواد عثمانی نے لویہ جرگہ کے شرکا کو بتایا ہے کہ ملک میں کرونا وائرس کی صورتِ حال بہتر ہو رہی ہے اور کیسز کی تعداد کم ہو رہی ہے۔ انہوں نے جرگے کے شرکا کو بھی حفاطتی قواعد و ضوابط پر عمل کرنے کی ہدایت کی ہے۔