نیوزی لینڈ: 100 دن میں مقامی سطح پر وائرس منتقلی کا کوئی کیس سامنے نہیں آیا
نیوزی لینڈ گزشتہ 100 دن کے دوران کرونا وائرس کا مقامی سطح پر منتقلی کا ایک بھی کیس سامنے نہیں آیا جس پر نیوزی لینڈ کو وائرس سے دنیا کا محفوظ ترین ملک بھی قرار دیا جا رہا ہے۔
نیوزی لینڈ کی آبادی 50 لاکھ ہے جب کہ ملک میں معمولات زندگی بحال ہو گئے ہیں۔
حکام نے خبردار کیا ہے کہ عوامی سطح پر احتیاطی تدابیر مکمل طور پر نظر انداز کرنے کا نتیجہ خطرناک ہو سکتا ہے۔
نیوزی لینڈ میں قرنطینہ میں موجود کرونا مریضوں کی تعداد 23 ہے جب کہ ملک بھر میں مجموعی کیسز 1219 ہیں۔
نیوزی لینڈ کے ڈائریکٹر جنرل ہیلتھ ڈاکٹر ایشلے بلوم فیلڈ کا کہنا ہے کہ 100 دن میں کرونا وائرس کی مقامی سطح پر منتقلی کا کوئی کیس بھی رپورٹ نہ ہونا بڑی کامیابی ہے۔
ان کے بقول ہم لاپروائی کے متحمل نہیں ہو سکتے۔ بہت سی ایسی جگہوں میں جہاں کرونا ختم ہو چکا تھا، وائرس نے دوبارہ سر اٹھایا ہے اس لیے احتیاط لازمی ہے۔
نیوزی لینڈ کی وزیرِ اعظم جیسنڈا آرڈرن نے انتخابی مہم شروع کرتے ہوئے آئندہ الیکشن کو کووڈ الیکشن کا نام دیا ہے۔
چین میں کرونا وائرس کے مزید 23 کیسز سامنے آگئے
چین میں کرونا وائرس کے کیسز میں کمی واقع ہوئی ہے۔ تاہم اب مزید 23 نئے کیسز سامنے آئے ہیں جب کہ اس سے ایک روز قبل بھی 31 کیسز رپورٹ ہوئے تھے۔
نیشنل ہیلتھ کمیشن نے اپنی ویب سائٹ پر شائع بیان میں کہا ہے کہ نئے کیسز میں 15 افراد کو مقامی سطح پر وائرس منتقل ہوا جب کہ بیرون ملک سے چین پہنچنے والے 8 افراد میں وائرس کی تشخیص ہوئی۔
رپورٹس کے مطابق ہفتے کو مختلف اسپتالوں سے 45 مریضوں کو صحت یاب ہونے پر فارغ کیا گیا تاہم 817 کیسز اب بھی موجود ہیں۔ ان میں سے 47 افراد کی حالت تشویش ناک بتائی گئی ہے۔
چین میں وائرس سے متاثرہ افراد کی مجموعی تعداد 84 ہزار 619 ہو گئی ہے جب کہ اب تک 4 ہزار 634 افراد ہلاک ہوچکے ہیں۔
سندھ میں کاروبار کھولنے کی اجازت
پاکستان کے صوبے سندھ میں پیر سے تمام کاروباری، تجارتی اور صنعتی سرگرمیاں بحال کی جا رہی ہیں۔
صوبائی حکومت نے 14 مارچ کو کرونا کے پھیلاؤ کو روکنے کے لیے مختلف پابندیاں عائد کی تھیں جن میں بتدریج کمی کی جا رہی ہے۔
ترجمان وزیرِ اعلیٰ ہاؤس کے مطابق ہوٹلز اور ریسٹورینٹس رات 10 بجے تک کھلے رکھے جا سکیں گی جب کہ فوڈ کورٹس کو ٹیبل سروس بھی دینے کی اجازت ہو گی۔
شادی ہالز اور تعلیمی ادارے فوری طور پر نہیں کھولے جارہے۔ اس حوالے سے فیصلہ آئندہ ماہ ہو گا۔
امریکہ میں کیسز 50 لاکھ سے تجاوز کر گئے
امریکہ میں کرونا وائرس کے کیسز کی تعداد 50 لاکھ سے تجاوز کر گئی ہے جب کہ اس وبا سے امریکہ میں اب تک ایک لاکھ 62 ہزار سے زیادہ اموات ہو چکی ہیں۔
جان ہاپکنز یونیورسٹی کے اعداد و شمار کے مطابق امریکہ میں اتوار تک کرونا وائرس کے مجموعی کیسز کی تعداد 50 لاکھ 603 تک پہنچ گئی ہے۔
امریکہ دنیا بھر میں کرونا وائرس سے سب سے زیادہ متاثرہ ملک ہے جہاں کیسز اور اموات کسی بھی ملک کے مقابلے میں سب سے زیادہ ہیں۔