نیوزی لینڈ: کرونا وائرس کے چار کیس رپورٹ ہونے پر دوبارہ لاک ڈاؤن نافذ
نیوزی لینڈ کے سب سے بڑے شہر آکلینڈ میں منگل کو کرونا وائرس کے چار کیسز سامنے آنے کے بعد تین روز کے لیے لاک ڈاؤن نافذ کر دیا گیا ہے۔
آکلینڈ میں ایک ہی خاندان کے چار افراد میں کرونا وائرس کی تشخیص ہوئی تھی۔ جن میں سے کسی بھی فرد نے حال ہی میں سفر نہیں کیا ہے۔
نیوزی لینڈ میں 102 روز کے بعد مقامی منتقلی کے نئے کیسز سامنے آئے ہیں جس کے بعد بدھ سے آکلینڈ میں دوبارہ لاک ڈاؤن کیا گیا ہے۔
نیوزی لینڈ کی وزیرِ اعظم جیسنڈا آرڈرن نے نئے کیسز رپورٹ ہونے کی وجہ سے پارلیمنٹ کی تحلیل بھی پیر تک کے لیے ملتوی کر دی ہے۔
لاہور: تاریخی قلعہ سیاحوں کے لیے کھول دیا گیا
حکومت پنجاب کی ہدایت پر 'والڈ سٹی آف لاہور اتھارٹی' نے سیاحوں کے لیے قواعد و ضوابط کے ساتھ لاہور قلعہ کھول دیا ہے۔
لاہور کا یہ تاریخی شاہی قلعہ صبح آٹھ بجے سے شام سات بجے تک سیاحوں کے لیے کھلا رہے گا۔
صوبائی حکومت کی طرف سے جاری کردہ ہدایات کے مطابق لاہور کے قلعے میں آنے والے تمام سیاح فیس ماسک پہننے اور فاصلہ برقرار رکھنے کی ہدایات کو یقنی بنائیں گے۔
والڈ سٹی آف لاہور اتھارٹی کا عملہ اس بات کو یقینی بنائے گا کہ سیاح قواعد و ضوابط کی پاسداری کریں۔
بھارت میں 60 ہزار سے زائد نئے کیسز، 834 اموات
بھارت میں گزشتہ 24 گھنٹوں کے دوران کرونا وائرس کے 60 ہزار سے زائد نئے کیسز رپورٹ ہوئے ہیں جب کہ اس وبا سے مزید 834 افراد ہلاک ہوئے ہیں۔
عالمی وبا سے بھارت میں اب تک 23 لاکھ 29 ہزار سے زائد افراد متاثر ہو چکے ہیں جب کہ کرونا وائرس سے بھارت میں 46 ہزار سے زائد اموات بھی ہوئی ہیں۔
ملک میں کرونا وائرس سے صحت یاب ہونے والوں کی تعداد 16 لاکھ سے زائد ہے جب کہ چھ لاکھ 43 ہزار سے زائد مریض زیر علاج ہیں۔
کاغذ کے ہزاروں پرندوں سے کرونا کے علاج کے لیے فنڈ ریزنگ
بیلجیم کے شہر برسلز میں ایک گرجا گھر میں کاغذ سے بنے 20 ہزار پرندوں کو لٹکایا گیا ہے۔
گرجا گھر میں کاغذ سے بنے پرندے لٹکانے کا مقصد مقامی اسپتال میں کرونا وائرس کے علاج کے دو یونٹس کے لیے فنڈز جمع کرنا ہے۔
قرون وسطیٰ کے سینٹ مائیکل اینڈ سینٹ گوڈلا گرجا گھر میں چھت سے باریک تاروں کی مدد سے کاغذ سے بنے ہوئے ان پرندوں کو لٹکایا گیا ہے۔
بیلجیم کے ایک فن کار چارلس کائسن نے لوگوں سے کہا تھا کہ وہ گھروں میں کاغذ کے پرندے بنا کر ارسال کریں۔
انہوں نے برسلز میں بھی 160 دکانوں میں ڈبے رکھے تھے جہاں شہریوں نے کاغذ کے پرندے بنا کر ڈالے تھے۔
گرجے میں لٹکائے گئے ان پرندوں کے لیے ہانگ کانگ، نیو یارک اور ٹوکیو سمیت دیگر مقامات سے بھی لوگوں نے کاغذ کے پرندے بنا کر بھیجے ہیں۔