میکسیکو میں کرونا کے مزید پانچ ہزار سے زائد کیس رپورٹ
میکسیکو میں جمعے کو کرونا وائرس کے مزید 5 ہزار سے زائد نئے کیس اور 615 ہلاکتیں رپورٹ ہوئی ہیں۔
میکسیکو میں اب تک پانچ لاکھ 11 ہزار 369 مصدقہ کیسز رپورٹ ہو چکے ہیں جب کہ اس عالمی وبا سے 55 ہزار سے زائد افراد ہلاک ہوئے ہیں۔
حکومت کا کہنا ہے کہ کرونا وائرس سے متاثرہ افراد کی تعداد، مصدقہ کیسز کی تعداد سے ممکنہ طور پر کافی زیادہ ہو سکتی ہے۔
یورپ میں کرونا وائرس کیسز میں اضافہ، کئی ملکوں میں دوبارہ پابندیاں عائد
کئی یورپی ممالک میں ایک بار پھر کرونا وائرس زور پکڑ رہا ہے، جس کی وجہ سے حکام نے دوبارہ پابندیاں عائد کرتے ہوئے ریستوران، نائٹ کلبز اور دیگر عوامی مقامات بند کر دیے ہیں۔ کئی ممالک میں ماسک کی پابندی بھی لازمی قرار دے دی گئی ہے۔
نئی پابندیوں کی وجہ سے یورپ کے کئی ملکوں میں موسمِ گرما کی تعطیلات میں سیاحتی مقامات پر رش روکنے کے لیے بھی اقدامات کیے جا رہے ہیں۔
وائرس کے دوبارہ پھیلاؤ نے یورپی ملکوں میں خطرے کی گھنٹی بجا دی ہے جب کہ برطانیہ، فرانس، اٹلی اور اسپین میں اب تک مجموعی طور پر ایک لاکھ 40 ہزار سے زائد اموات ہو چکی ہیں۔
خبر رساں ادارے 'ایسوسی ایٹڈ پریس' کے مطابق برطانیہ کی جانب سے عائد کی گئی نئی پابندیوں کی وجہ سے سیاحت کے لیے فرانس جانے والے سیاحوں کو وطن واپسی پر قرنطینہ میں رہنے کی ہدایت کی گئی ہے۔
سب سے سخت پابندیاں اسپین میں عائد کی گئی ہیں جہاں گزشتہ 14 روز کے دوران 50 ہزار نئے کیس رپورٹ ہوئے ہیں۔
اسپین میں محکمہ صحت کے حکام کا کہنا ہے کہ ملک میں ایسے عوامی مقامات بند کر دیے گئے ہیں جہاں دو میٹر کا فاصلہ نہیں رکھا جا رہا۔
پاکستان میں 24 گھنٹوں میں 24 ہزار ٹیسٹ، صرف 670 نئے کیسز کا اضافہ
پاکستان میں کرونا وائرس کے کیسز کی تعداد دو لاکھ 85 ہزار سے تجاوز کر گئی ہے۔
سرکاری اعداد و شمار کے مطابق گزشتہ 24 گھنٹوں میں کرونا وائرس کے مزید 670 کیسز سامنے آئے۔ جب کہ حکام نے مریضوں کی تشخیص کے لیے 24 ہزار سے زائد ٹیسٹ کیے۔
پاکستان میں اب تک 22 لاکھ 77 ہزار سے زائد افراد کے کرونا وائرس کے ٹیسٹ کیے جا چکے ہیں۔
حکام کے مطابق گزشتہ 24 گھنٹوں میں صرف 6 افراد وبا کے باعث ہلاک ہوئے۔
سرکاری اعداد و شمار کے مطابق پاکستان میں اب تک وبا سے 6168 افراد ہلاک ہو چکے ہیں۔
خیال رہے کہ ملک بھر میں وائرس سے متاثر ہونے والے 90 فی صد یعنی دو لاکھ 66 ہزار افراد صحت یاب ہو چکے ہیں۔
حکام کے مطابق اب صرف 769 افراد انتہائی نگہداشت میں ہیں۔ جن کا علاج جاری ہے۔
بھارت میں وبا سے لگ بھگ 50 ہزار ہلاکتیں
بھارت میں کرونا وائرس کے سبب ہلاکتوں کی تعداد 50 ہزار تک پہنچ گئی ہے۔ جب کہ کیسز میں بھی تیزی سے اضافہ ہو رہا ہے۔
بھارت کی وزارتِ صحت کے جاری کردہ اعداد و شمار کے مطابق ملک بھر میں وبا سے اموات کی مجموعی تعداد 49 ہزار 980 ہو گئی ہے۔
وزارتِ صحت کا کہنا ہے کہ عالمی وبا سے بھارت میں 25 لاکھ 90 ہزار سے زائد افراد متاثر ہو چکے ہیں۔
حکام کے مطابق صحت یاب ہونے والے مریضوں کی تعداد 18 لاکھ ہے۔
گزشتہ 24 گھنٹوں کے دوران بھارت میں 63 ہزار 489 افراد کے وائرس سے متاثر ہونے کی تشخیص ہوئی۔
اعداد و شمار کے مطابق گزشتہ 24 گھنٹوں میں مزید 944 افراد وبا سے ہلاک ہوئے۔