جنوبی افریقہ میں ویکسین کے تجربات کے دوسرے مرحلے کا آغاز
امریکہ کی ویکسین تیار کرنے والی کمپنی نووا ویکس کرونا وائرس کی ویکسین کے انسانوں پر تجربات کے دوسرے مرحلے کا آغاز کرنے جا رہی ہے۔
کمپنی نے اپنے ایک بیان میں کہا ہے کہ دو ہزار 665 صحت مند اور بالغ افراد پر ویکسین کے کلینیکل ٹرائلز ہوں گے۔
جنوبی افریقہ کرونا وائرس سے متاثرہ ممالک میں پانچویں نمبر پر ہے جہاں عالمی وبا سے متاثرہ پانچ لاکھ 83 ہزار سے زیادہ مریض موجود ہیں جب کہ 11 ہزار 600 سے زیادہ افراد ہلاک ہو چکے ہیں۔
بھارت میں 55 ہزار نئے کیسز رپورٹ
بھارت میں منگل کو کرونا وائرس کے 55 ہزار نئے کیسز رپورٹ ہوئے ہیں جس کے بعد متاثرین کی مجموعی تعداد 27 لاکھ دو ہزار سے زیادہ ہو گئی ہے۔
بھارت میں گزشتہ 24 گھنٹوں کے دوران کرونا وائرس کے شکار 876 مریض دم توڑ گئے ہیں۔ اس طرح عالمی وبا سے بھارت میں مرنے والوں کی کل تعداد 51 ہزار 797 ہو گئی ہے۔
حکام کا کہنا ہے کہ وبا سے اب تک 19 لاکھ 77 ہزار سے زیادہ مریض صحت یاب ہوچکے ہیں۔
افریقہ میں ملیریا سے اموات میں اضافے کا خدشہ
ماہرینِ صحت خبردار کر رہے ہیں کہ کرونا وائرس کی وجہ سے صحت کی سہولتوں پر جو بوجھ پڑا ہے اس سے افریقہ میں تپِ دق، ملیریا اور ایچ آئی وی ایڈز کے مریضوں کی اموات میں اضافہ ہو سکتا ہے کیوں کہ انہیں علاج کی ضروری سہولتوں تک رسائی نہیں مل رہی۔ مزید دیکھیے اس رپورٹ میں
صدر ٹرمپ کا وائرس سے متعلق دعویٰ، نیوزی لینڈ کی وزیرِ اعظم کی تنقید
نیوزی لینڈ کی وزیرِ اعظم جیسنڈا آرڈرن نے امریکی صدر ڈونلڈ ٹرمپ کے نیوزی لینڈ میں کرونا وائرس کے دوبارہ شدت اختیار کرنے کے دعوے کو غلط قرار دیا ہے۔
خبر رساں ادارے 'اے ایف پی' کے مطابق صدر ٹرمپ کے بیان پر ردِ عمل دیتے ہوئے وزیرِ اعظم جیسنڈا آرڈرن نے بیان میں کہا ہے کہ سب دیکھ رہے ہیں کہ نیوزی لینڈ میں کرونا وائرس کے روزانہ 9 نئے کیسز سامنے آ رہے ہیں جن کا امریکہ سے کوئی مقابلہ نہیں۔ کیوں کہ امریکہ میں کرونا مریضوں کی یومیہ سامنے آنی والی تعداد ہزاروں میں ہے۔ یہ واضح کرتا ہے کہ صدر ٹرمپ کا بیان قطعی طور پر غلط ہے۔
نیوزی لینڈ میں وائرس کا مقامی پھیلاؤ مکمل طور پر کنٹرول کر لیا گیا ہے اور دنیا بھر میں اسے نیوزی لینڈ کی بڑی کامیابی کے طور پر دیکھا جا رہا ہے۔
تاہم نیوزی لینڈ کے سب سے بڑے شہر آکلینڈ کے کچھ اضلاع میں کرونا کے کیسز سامنے آنے کے بعد شہر میں دوبارہ لاک ڈاؤن نافذ کیا گیا ہے۔
منی سوٹا میں پیر کو الیکشن ریلی سے خطاب میں صدر ٹرمپ نے کہا تھا کہ آپ دیکھ رہے ہیں نیوزی لینڈ میں کیا ہوا رہا ہے۔ یہ اخبار کے صفحہ اول کی خبر کی طرح تھا کہ انہوں نے کرونا کو شکست دے دی۔
نیوزی لینڈ میں کرونا وائرس کے کیسز سامنے آنے کی جانب اشارہ کرتے ہوئے صدر ٹرمپ نے کہا کہ یہ بہت خوف ناک ہے ہم ایسا نہیں چاہتے۔