پاکستان میں صرف 13 ہزار افراد زیرِ علاج، 93 فی صد صحت یاب
پاکستان میں کرونا وائرس کے زیر علاج مریضوں کی تعداد 13633 ہے جب کہ مہلک وبا سے متاثرہ 93 فی صد سے زائد افراد صحت یاب ہو چکے ہیں۔
سرکاری اعداد و شمار کے مطابق پاکستان میں 2 لاکھ 90 ہزار کے قریب افراد وبا سے متاثر ہوئے جن میں سے 2 لاکھ 70 ہزار صحت یاب ہو چکے ہیں۔
حکام کے مطابق وائرس کے باعث 6190 افراد کی اموات ہوئیں۔ پاکستان میں وبا سے اموات کی شرح 2.1 فی صد ہے۔
پاکستان میں سب سے زیادہ کیسز ایک لاکھ 26 ہزار سندھ میں رپورٹ ہوئے، جب کہ سب سے زیادہ ہلاکتیں 2331 بھی سندھ میں ہی ہوئیں ہیں۔ صحت یاب ہونے والے سب سے زیادہ افراد کا تعلق بھی سندھ سے ہی ہے جن کی تعداد ایک لاکھ 19 ہزار ہے۔ صوبے میں اب صرف 4 ہزار کے لگ بھگ افراد زیرِ علاج ہیں۔
ملک کے آبادی کے لحاظ سے سب سے بڑے صوبے پنجاب میں ساڑھے 95 ہزار کیسز سامنے آئے، جن میں سے 2185 افراد کو جان لیوا وائرس نے نگل لیا، جب کہ 89 ہزار کے قریب مریض صحت یاب ہو چکے ہیں۔ صوبے میں اس وقت ساڑھے چار ہزار کے لگ بھگ افراد زیرِ علاج ہیں۔
خیبر پختونخوا میں 35 ہزار سے زائد کیسز رپورٹ ہوئے جن میں 1239 اموات کی تصدیق کی گئی۔ حکام کے مطابق صوبے میں 32 ہزار سے زائد افراد صحت یاب ہو چکے ہیں جب کہ 1576 مریض ابھی زیرِ علاج ہیں۔
وفاقی دارالحکومت کی انتظامیہ نے 15 ہزار افراد کے وبا سے متاثر ہونے کی تصدیق کی جب کہ 175 افراد وائرس کے باعث ہلاک ہوئے۔ اعداد و شمار کے مطابق صحت یاب ہونے والوں کی تعداد ساڑھے 13 ہزار کے لگ بھگ ہے اور 1796 متاثرہ افراد ابھی زیرِ علاج ہیں۔
بلوچستان میں 12ہزار سے زائد کیسز رپورٹ ہوئے جب کہ 11ہزار افراد کے صحت یاب ہونے کی تصدیق کی گئی۔ صوبے میں وبا سے 138 افراد کی ہلاکت ہوئی۔ اس وقت صوبے میں 1030 افراد زیر علاج ہیں۔
گلگت بلتستان میں وائرس سے متاثر ہونے والے 2538 افراد میں سے 2172 صحت یاب ہو چکے ہیں۔ جب کہ 1030 اب بھی زیرِ علاج ہیں۔ حکام نے 61 افراد کی ہلاکت کی تصدیق کی ہے۔
پاکستان کے زیرِ انتظام کشمیر میں کرونا وائرس کے 2199 کیسز سامنے آئے جن میں سے 2002 افراد تندرست ہو چکے ہیں جب کہ صرف 136 زیرِ علاج ہیں۔ حکام نے وائرس سے 61 افراد کی ہلاکت کی تصدیق کی ہے۔
نیوزی لینڈ میں کرونا کے 5 نئے کیسز، سرحد پر مزید فوج تعینات کرنے کا فیصلہ
نیوزی لینڈ میں گزشتہ چوبیس گھنٹوں میں کرونا وائرس کے مزید پانچ کیسز رپورٹ ہوئے ہیں جس کے بعد حکومت نے ملکی سرحدوں پر قائم قرنطینہ مراکز میں تعینات فوجی اہلکاروں کی تعداد میں اضافے کا اعلان کیا ہے۔
حکومت نے بدھ کو جاری ایک بیان میں کہا ہے کہ کرونا وبا کی روک تھام کے لیے سرحدوں پر قائم قرنطینہ مراکز میں مزید 500 فوجی اہلکاروں کو تعینات کیا جائے گا جس کے بعد اہلکاروں کی مجموعی تعداد 1200 ہو جائے گی۔
حکام کا کہنا ہے کہ فوجیوں کی تعیناتی کا مقصد کرونا وائرس کے مرض پر قابو پانا ہے۔
نیوزی لینڈ کی جانب سے 2000 کی دہائی کے اوائل میں بدامنی کے دوران قیام امن کی غرض سے فوجیوں کو سرحد پر تعینات کرنے کے بعد سے اب تک کا یہ سب سے بڑا فوجی دستہ ہے۔
جرمنی میں کرونا وائرس کے 1510 نئے کیسز کا اضافہ
جرمنی میں بدھ کو کرونا وائرس کے تصدیق شدہ کیسز کی تعداد میں مزید 1510 افراد کا اضافہ ہو گیا ہے۔
اس اضافے کے ساتھ ہی متاثرین کی مجموعی تعداد دو لاکھ 26 ہزار 914 ہو گئی ہے۔
رابرٹ کوچ انسٹی ٹیوٹ کی جانب سے بدھ کی صبح جاری کردہ اعداد و شمار کے مطابق جرمنی میں کرونا وائرس سے اب تک نو ہزار 243 افراد ہلاک ہو چکے ہیں۔
پاکستان میں 613 نئے کیسز اور 11 اموات
پاکستان میں گزشتہ چوبیس گھنٹوں میں کرونا وائرس کے 11 مریض دم توڑ گئے ہیں جب کہ 613 افراد میں وائرس کی تشخیص ہوئی ہے۔
پاکستان میں کرونا وائرس سے ہلاکتوں کی کل تعداد 6201 اور کیسز دو لاکھ 90 ہزار سے تجاوز کر گئے ہیں۔
حکام کا کہنا ہے کہ دو لاکھ 72 ہزار سے زیادہ مریض صحت یاب ہو چکے ہیں جب کہ 743 کی حالت اب بھی تشویشناک ہے۔
