کرونا وائرس: ایران میں ہلاکتوں کی تعداد 20 ہزار سے تجاوز کر گئی
ایران میں کرونا وائرس سے ہلاک ہونے والے مریضوں کی تعداد 20 ہزار سے تجاوز کر گئی ہے۔
کرونا وائرس کے باعث مشرق وسطیٰ کے کسی بھی ملک کے مقابلے میں سب سے زیادہ اموات ایران میں ریکارڈ کی گئی ہیں۔
ایران کی وزارتِ صحت کی ترجمان سیما سعادت لاری نے بدھ کو بتایا کہ ملک بھر میں کرونا کیسز کی تعداد تین لاکھ 50 ہزار سے زیادہ ہو گئی ہے۔
ایران میں کرونا وائرس کا پہلا کیس فروری میں رپورٹ ہوا تھا جس کے بعد سب سے زیادہ یومیہ کیسز جون اور ریکارڈ یومیہ اموات جولائی میں رپورٹ ہوئی تھیں۔
روس میں کرونا وائرس ویکسین کی پروڈکشن شروع
امریکہ: کرونا بحران کے باعث چھت چھن جانے کا ڈر
امریکہ میں کرونا وائرس کے بحران کے دوران ٹرمپ انتظامیہ کی جانب سے بے روزگاری الاؤنس پیکج کے تحت لاکھوں لوگوں کو مالی امداد دی جا رہی تھی جس کا گزشتہ ماہ اختتام ہو گیا ہے۔ نئے امدادی پیکج پر ری پبلکنز اور ڈیموکریٹس کے درمیان اختلافات کی وجہ سے کرائے پر رہنے والوں کے بے گھر ہونے کا خدشہ بڑھ رہا ہے۔
بھارت میں یومیہ ریکارڈ کیسز رپورٹ
بھارت میں گزشتہ چوبیس گھنٹوں کے دوران 69 ہزار 652 کیسز رپورٹ ہوئے ہیں۔ بھارت میں ایک روز میں رپورٹ ہونے والے کیسز کی یہ ریکارڈ تعداد ہے۔
بھارت کے محکمۂ صحت کے مطابق کرونا وائرس کے شکار مزید 977 مریض دم توڑ گئے ہیں جس کے بعد ملک بھر میں عالمی وبا کا شکار ہو کر مرنے والوں کی کل تعداد 53 ہزار 866 تک پہنچ گئی ہے۔
بھارت ایشیا کا کرونا وائرس سے سب سے زیادہ متاثرہ ملک ہے جب کہ عالمی سطح پر کیسز کے اعتبار سے امریکہ اور برازیل کے بعد تیسرا متاثرہ ملک ہے۔