بیجنگ میں ماسک پہننے کی پابندی ختم
چین کے دارالحکومت بیجنگ میں گزشتہ 13 روز سے کرونا وائرس کا کوئی نیا کیس سامنے نہیں آیا، جس کے بعد صحت کے حکام نے بیجنگ کے رہائشیوں کو ماسک پہننے کی پابندی سے آزاد کر دیا ہے۔
خبر رساں ادارے 'رائٹرز' کا کہنا ہے کہ ماسک پہننے کی پابندی اٹھانے کے ساتھ ساتھ کرونا وائرس کا پھیلاؤ روکنے سے متعلق عائد دیگر پابندیوں میں بھی نرمی کی جا رہی ہے۔
ماسک کی پابندی کے خاتمے کے باوجود بیجنگ کے اکثر شہری ماسک کے ساتھ ہی اپنے گھروں سے باہر نکلے۔
کچھ لوگوں کا کہنا تھا کہ ماسک پہننے سے وہ خود کو محفوظ تصور کرتے ہیں، جب کہ کئی افراد نے یہ بھی کہا کہ وہ معاشرتی دباؤ کی وجہ سے اب بھی ماسک پہن رہے ہیں۔
دنیا بھر میں کرونا متاثرین اور طبی عملے پر تشدد میں اضافہ: ریڈ کراس
انٹرنیشنل کمیٹی آف دی ریڈ کراس کا کہنا ہے کہ کرونا وائرس سے متاثر ہونے والے افراد اور ان کا علاج کرنے والے طبی عملے کے ارکان کی ایک بڑی تعداد کو تشدد کا سامنا کرنا پڑ رہا ہے۔
بدھ کو جاری ایک بیان میں ریڈ کراس کا کہنا تھا کہ فروری سے جولائی تک دنیا کے 40 ممالک میں 611 تشدد کے کیسز رپورٹ ہوئے تھے۔
رواں برس فروری میں کرونا وائرس کی وبا دنیا میں تیزی سے پھیلنا شروع ہوئی تھی۔
ریڈ کراس کے مطابق کرونا وائرس کے متاثرین اور طبی عملے پر تشدد کے زیادہ تر واقعات افغانستان، فلپائن اور کولمبیا میں پیش آئے ہیں۔
ریڈ کراس نے خدشہ ظاہر کیا ہے کہ ممکنہ طور پر تشدد کے واقعات رپورٹ ہونے والے واقعات کے مقابلے میں کئی گنا زیادہ بھی ہو سکتے ہیں۔
'پاکستان کی 11 فی صد آبادی میں کرونا کے خلاف قوت مدافعت پیدا ہو چکی ہے'
پاکستان میں حکومت کے مطابق ہر گزرتے دن کے ساتھ کرونا وائرس کی صورتِ حال میں بہتری آ رہی ہے۔ ملک میں مصدقہ کیسز میں سے تقریباً 93 فی صد افراد صحت یاب ہو چکے ہیں۔
وزارتِ صحت کی معاونت سے کی جانے والی ایک تحقیق سے معلوم ہوا ہے کہ پاکستان میں تقریباً 11 فی صد شہریوں میں کرونا وائرس کے خلاف قوتِ مدافعت پیدا ہو گئی ہے۔
آغا خان یونیورسٹی سمیت متعدد شراکت داروں اور عالمی ادارۂ صحت کی تیکنیکی مدد کے ساتھ 'ہیلتھ سروسز اکیڈمی' نے گزشتہ ماہ جولائی میں 'نیشنل سیروپریویلینس اسٹڈی' کا آغاز کیا، جس کے مطالعے میں یہ پتا چلا کہ شہری علاقوں کی آبادی اور درمیانی عمر کے افراد کرونا وائرس سے زیادہ محفوظ ہیں۔
تحقیق میں بتایا گیا ہے کہ ان علاقوں میں جہاں لوگوں میں عالمی وبا کے خلاف قوتِ مدافعت کی سطح کم ہے، وہاں مستقبل میں وبا پھیلنے کا خطرہ زیادہ ہو سکتا ہے۔
پاکستان میں وائرس سے مزید 10 افراد ہلاک، تعداد 6231 ہوگئی
پاکستان میں گزشتہ 24 گھنٹوں میں کرونا وائرس سے مزید 10 افراد ہلاک ہوئے ہیں جس کے بعد ہلاکتوں کی مجموعی تعداد 6231 ہو گئی ہے۔
ملک میں 26 فروری کو کرونا وائرس کا پہلا کیس سامنے آیا تھا جب کہ اس وبا سے پہلی ہلاکت 18 مارچ کو ہوئی تھی۔
ملک میں سب سے زیادہ کیسز جون میں سامنے آئے تھے جس میں گزشتہ ماہ کمی آئی ہے۔
سرکاری اعداد و شمار کے مطابق پاکستان میں 731 افراد انتہائی نگہداشت میں زیرِ علاج ہیں۔