برازیل میں 43 ہزار سے زائد نئے کیس رپورٹ
برازیل میں 24 گھنٹوں کے دوران کرونا سے مزید 855 افراد ہلاک ہو گئے ہیں۔
برازیل کی وزارت صحت کی جانب سے جاری کردہ اعدادوشمار کے مطابق اس عالمی وبا سے ہلاکتوں کی تعداد ایک لاکھ 19 ہزار سے بڑھ گئی ہے۔
دنیا بھر میں اس مہلک وبا سے امریکہ کے بعد سب سے زیادہ متاثرہ ملک برازیل میں جمعے کو کرونا وائرس کے 43 ہزار 412 نئے کیس رپورٹ ہوئے۔
برازیل میں کرونا وائرس سے اب تک 38 لاکھ سے زائد افراد متاثر ہو چکے ہیں۔
فرانس میں کرونا کے مزید سات ہزار سے زائد کیس رپورٹ
فرانس میں کرونا وائرس کیسز میں ایک بار پھر اضافہ ہو رہا ہے جمعے کو ملک میں مزید سات ہزار سے زائد کیس رپورٹ ہوئے ہیں۔
عالمی وبا سے متاثرہ افراد کی تعداد میں یہ اضافہ ایسے وقت میں سامنے آیا ہے کہ جب فرانس میں منگل سے اسکول کھولنے کا اعلان کیا گیا ہے۔
فرانس کے صدر ایمانوئل میخواں کا صحافیوں سے گفتگو میں کہنا تھا کہ وہ لاک ڈاؤن سے بچنے کے لیے خاطر خواہ اقدامات کررہے ہیں۔
وزارت صحت کا ہفتہ وار بیان میں کہنا تھا کہ فرانس میں کرونا وائرس کے پھیلاؤ میں حیران کن اضافہ دیکھا جارہا ہے۔
فرانس میں حکام لاک ڈاؤن نافذ کیے بغیر کرونا وائرس کے پھیلاؤ کو روکنے کے لیے اقدامات کررہے ہیں۔
میکسیکو میں 5 ہزار سے زائد نئے کیس، 552 اموات
میکسیکو میں کرونا وائرس کے باعث 24 گھنٹوں کے دوران مزید 552 افراد ہلاک ہوئے ہیں۔ جس کے بعد اس عالمی وبا سے میکسیکو میں ہلاکتوں کی تعداد 63 ہزار سے بڑھ گئی ہے۔
جمعے کو میکسیکو میں کرونا کے پانچ ہزار 824 نئے کیس رپورٹ کیے گئے۔
میکسیکو میں اس مہلک وبا سے متاثرہ افراد کی تعداد پانچ لاکھ 85 ہزار سے زائد ہو گئی ہے۔
سرکاری حکام کا کہنا ہے کہ کرونا وائرس سے متاثرہ افراد کی تعداد مصدقہ کیسوں کی تعداد سے ممکنہ طور پر کہیں زیادہ ہو سکتی ہے۔
پاکستان میں اموات اور متاثرہ افراد کی شرح میں کمی
پاکستان میں کرونا وائرس سے اموات کی شرح میں تیزی سے کمی آتی جا رہی ہے جب کہ وائرس ایک سے دوسرے شخص میں منتقل ہونے کی رفتار مسلسل کمی آتی جا رہی ہے۔
سرکاری طور پر جاری اعداد و شمار کے مطابق پاکستان میں گزشتہ 24 گھنٹوں میں وائرس سے صرف 4 اموات ہوئی ہیں۔ جب کہ اب تک مجموعی اموات کی تعداد 6288 ہو چکی ہے۔
دوسری جانب 24 گھنٹوں میں 21 ہزار سے زائد ٹیسٹ کیے گئے تاہم اس دوران صرف 264 افراد کے وائرس سے متاثر ہونے کی تصدیق ہوئی۔
پاکستان میں اب تک 26 لاکھ سے زائد ٹیسٹ کیے جا چکے ہیں جب کہ وائرس سے 2 لاکھ 95 ہزار افراد کے متاثر ہونے کی تصدیق ہوئی۔
حکومت کے مطابق وائرس سے متاثر ہونے والے 94 فی صد افراد صحت یاب ہو چکے ہیں۔ صحت یاب ہونے والے افراد کی تعداد 2 لاکھ 80 ہزار سے زائد ہے۔