کرونا کے عالمی کیسز کی تعداد تین کروڑ کے قریب پہنچ گئی
دنیا بھر میں کرونا وائرس سے متاثر ہونے والوں کی تعداد تین کروڑ کے قریب پہنچ گئی ہے۔
امریکہ کی جانز ہاپکنز یونیورسٹی کے اعداد و شمار کے مطابق عالمی وبا کے آغاز سے اب تک دو کروڑ 93 لاکھ سے زائد کیسز رپورٹ ہو چکے ہیں جب کہ کووڈ 19 سے ہونے والی اموات کی تعداد نو لاکھ 28 ہزار سے زائد ہے۔
کرونا سے سب سے زیادہ متاثر ہونے والے ملکوں میں امریکہ پہلے اور بھارت دوسرے نمبر پر ہے۔ برازیل کا نمبر اس فہرست میں تیسرا ہے جب کہ روس اور پیرو بالترتیب چوتھے اور پانچویں درجے پر ہیں۔
کرونا وائرس کے نصف سے زائد عالمی کیسز ان ہی پانچ ملکوں میں رپورٹ ہوئے ہیں۔
اسکول جانے والے بچوں کو کرونا سے کیسے بچائیں؟
پاکستان میں کرونا کیسز میں کمی کے بعد تعلیمی ادارے مرحلہ وار کھلنا شروع ہو گئے ہیں۔ منگل کو پہلے مرحلے میں نویں سے بارہویں جماعت اور جامعات کے طلبہ کی کلاسز کا آغاز ہوا ہے۔ اسکول کھلنے سے کرونا وائرس پھیلنے کا خطرہ کتنا بڑھے گا اور والدین اپنے بچوں کو اس وبائی مرض سے کیسے محفوظ رکھیں؟ جانتے ہیں کچھ ڈاکٹروں کی زبانی
بھارت: کرونا کیسز 50 لاکھ کے قریب، 17 اراکینِ پارلیمنٹ بھی وائرس کا شکار
بھارت میں کم از کم 17 ممبرانِ پارلیمنٹ کا کرونا وائرس ٹیسٹ مثبت آیا ہے جب کہ حکام نے تنبیہ کی ہے کہ ملک میں کرونا کیسز کی تعداد جلد 50 لاکھ کا ہندسہ عبور کر جائے گی۔
خبر رساں ادارے 'رائٹرز' کے مطابق بھارت میں پیر کو چھ ماہ بعد پارلیمنٹ کھولنے سے قبل ممبران کے کرونا وائرس کے ٹیسٹ کیے گئے تھے۔ حکام کے مطابق ان میں سے 17 اراکین میں کرونا وائرس پایا گیا ہے۔
ان 17 ممبرانِ پارلیمنٹ میں سے 12 حکمران جماعت بھارتیہ جنتا پارٹی سے تعلق رکھتے ہیں اور تمام 17 اراکین کا تعلق ایوانِ زیریں سے ہے۔
ابھی یہ واضح نہیں ہے کہ ایوانِ بالا سے تعلق رکھنے والے اراکین میں سے کتنے افراد کا ٹیسٹ مثبت آیا ہے۔
بھارت کے وفاقی وزیرِ صحت ہرش وردھن نے کہا ہے کہ کرونا وائرس کا پھیلاؤ روکنے کے لیے حکومت وہ تمام اقدامات کر رہی ہے جو اس کے بس میں ہیں۔ ایوانِ بالا میں منگل کو خطاب کرتے ہوئے وزیرِ صحت کا کہنا تھا کہ کرونا وائرس کی جنگ ختم ہونے میں ابھی کافی وقت لگے گا۔
خیال رہے کہ بھارت کرونا وائرس سے سب سے زیادہ متاثر ہونے والے ملکوں میں امریکہ کے بعد دوسرے نمبر پر ہے۔ بھارت میں کیسز کی تعداد 49 لاکھ 30 ہزار سے زائد ہو چکی ہے جب کہ 80 ہزار سے زائد افراد اس مہلک وبا سے ہلاک ہو چکے ہیں۔