پاکستان میں ٹیسٹ کرنے کی استعداد میں مسلسل اضافہ
پاکستان میں کرونا وائرس سے متاثرہ افراد کی نشان دہی کے لیے ٹیسٹ کرنے کی استعداد میں مسلسل اضافہ کیا جا رہا ہے۔
سرکاری اعداد و شمار کے مطابق پاکستان میں گزشتہ 24 گھنٹوں میں 40 ہزار سے زائد ٹیسٹ کیے گئے۔ جس کے بعد مجموعی طور پر کیے گئے ٹیسٹس کی تعداد 33 لاکھ 84 ہزار سے بڑھ گئی ہے۔
پاکستان میں رواں ہفتے دوسری بار 40 ہزار سے زائد افراد کے ٹیسٹ کیے گئے ہیں۔ تین روز قبل منگل کو ملک بھر میں 42 ہزار سے زائد ٹیسٹ کیے گئے تھے جو کہ پاکستان میں ایک دن میں کیے جانے والے ٹیسٹس کی سب سے زیادہ تعداد تھی۔
رواں ماہ کے آغاز تک پاکستان میں یومیہ 20 ہزار سے 24 ہزار کے درمیان ٹیسٹ کیے جا رہے تھے تاہم اب مسلسل ٹیسٹ کی استعداد میں اضافہ کیا جا رہا ہے۔
پاکستان میں مزید 566 افراد وبا سے متاثر
پاکستان میں گزشتہ 24 گھنٹوں کے دوران مزید 566 افراد کرونا وائرس سے متاثر ہونے کی تصدیق کی گئی۔
اعداد و شمار کے مطابق پاکستان میں کرونا وائرس سے تین لاکھ نو ہزار 581 افراد متاثر ہوئے۔ جب کہ ان میں سے دو لاکھ 95 ہزار 333 افراد صحت یاب ہو چکے ہیں۔ حکام نے 6451 افراد کے ہلاک ہونے کی تصدیق کی ہے۔
اعداد و شمار کے مطابق پاکستان میں اب بھی 7797 افراد زیرِ علاج ہیں جن میں سے 576 افراد کی حالت تشویش ناک بتائی جا رہی ہے۔
کرونا کے خلاف پنجاب حکومت کی حکمتِ عملی کیسی رہی؟
پاکستان میں کرونا وائرس کا زور ٹوٹنے کے بعد کاروباری سرگرمیاں بحال اور تعلیمی ادارے کھل گئے ہیں۔ آبادی کے لحاظ سے ملک کے سب سے بڑے صوبے پنجاب میں کرونا کا پھیلاؤ روکنے کے لیے کیا حکمتِ عملی اپنائی گئی اور پنجاب حکومت کی اس حکمتِ عملی کو ماہرین کیسے دیکھتے ہیں؟ جانیے ثمن خان کی رپورٹ میں
