ایران میں کیسز چار لاکھ 50 ہزار سے متجاوز
ایران میں کرونا وائرس کے کیسز کی تعداد ساڑھے چار لاکھ سے زیادہ ہو گئی ہے۔
خبر رساں ادارے 'رائٹرز' کے مطابق ایران کی وزارتِ صحت کی ترجمان سیما سادات لاری نے کہا ہے کہ گزشتہ 24 گھنٹوں میں مزید تین ہزار 600 سے زائد کیسز سامنے آئے ہیں جس کے بعد کیسز کی مجموعی تعداد چار لاکھ 53 ہزار سے زائد ہو گئی ہے۔
ایران میں کرونا وائرس سے اموات کی تعداد 25 ہزار 986 تک پہنچ گئی ہے۔
مشرقِ وسطیٰ کے ملکوں میں ایران کرونا وائرس سے ہونے والی اموات کے لحاظ سے سب سے زیادہ متاثرہ ملک ہے۔
بھارت میں چھ کروڑ افراد کرونا کے مریض ہو سکتے ہیں: تحقیق
بھارت میں ہونے والی ایک حالیہ تحقیق میں، جس کے دوران لوگوں میں اینٹی باڈیز کا جائزہ لیا گیا، کہا گیا ہے کہ ملک میں کرونا وائرس سے متاثرہ مریضوں کی تعداد چھ کروڑ سے زیادہ ہو سکتی ہے۔
یہ تعداد بھارت کے سرکاری اعداد و شمار سے 10 گنا زیادہ ہے۔ سرکاری ڈیٹا کے مطابق بھارت میں کرونا وائرس سے 61 لاکھ سے زائد افراد متاثر ہو چکے ہیں۔
لیکن اس تحقیق میں کہا گیا ہے کہ کرونا وائرس سے متاثر ہونے والوں کی تعداد سرکاری اعداد و شمار سے کہیں زیادہ ہو سکتی ہے۔
کرونا وائرس: بھارت میں کیسز 62 لاکھ سے زیادہ
بھارت میں گزشتہ 24 گھنٹوں کے دوران 80 ہزار 472 نئے کیسز سامنے آنے کے بعد کرونا کے مریضوں کی مجموعی تعداد 62 لاکھ سے زائد ہو گئی ہے۔
برطانوی خبر رساں ادارے 'رائٹرز' نے بھارتی وزارتِ صحت کے حوالے سے رپورٹ کیا ہے کہ گزشتہ 24 گھنٹوں کے دوران ملک میں کرونا سے مزید ایک ہزار 179 افراد ہلاک ہوئے جس کے بعد ہلاکتوں کی مجموعی تعداد 97 ہزار 497 تک جا پہنچی ہے۔
کرونا کیسز کی تعداد کے لحاظ سے بھارت، امریکہ کے بعد دوسرے نمبر پر ہے۔
پاکستان میں 747 نئے کیسز، پانچ اموات
