کرونا ٹیسٹ منفی آنے کے بعد صدر ٹرمپ کا فلوریڈا میں ریلی سے خطاب
امریکہ کے صدر ڈونلڈ ٹرمپ کے معالجین نے تصدیق کی ہے کہ صدر کا کرونا ٹیسٹ منفی آ گیا ہے۔ دوسری جانب صدر ٹرمپ انتخابی ریلی میں شرکت کے لیے ریاست فلوریڈا بھی گئے جہاں انہوں نے شرکا سے خطاب بھی کیا۔
وائٹ ہاؤس کی جانب سے پیر کو جاری کردہ میمو کے مطابق صدر ٹرمپ کا کرونا ٹیسٹ لگاتار دو روز منفی آیا ہے۔ تاہم اُن کے معالج نے یہ نہیں بتایا کہ صدر کے کرونا ٹیسٹ کب کیے گئے تھے۔
صدر کے معالج ڈاکٹر شان کونلی نے بتایا ہے کہ صدر ٹرمپ کے کرونا ٹیسٹ 'ایبٹ لیبارٹریز' کی نئی ریپڈ ٹیسٹںگ سہولت کے ذریعے کیے گئے۔
اُن کے بقول کرونا ٹیسٹنگ کے علاوہ صدر ٹرمپ کے چند دیگر ٹیسٹ بھی کیے گئے ہیں جس کے بعد اُن میں وائرس کی عدم موجودگی کی تصدیق ہوئی۔
صدر ٹرمپ کے معالج نے چند روز قبل ایک بیان میں کہا تھا کہ صدر سے اب دوسروں میں وائرس منتقل ہونے کا خدشہ ختم ہو چکا ہے۔
پاکستان میں اب بھی 518 افراد انتہائی نگہداشت میں زیرِ علاج
پاکستان میں کرونا وائرس کے انتہائی نگہداشت میں زیرِ علاج افراد کی تعداد 518 ہو گئی ہے جب کہ مجموعی طور پر 8782 افراد اب بھی کرونا سے متاثر ہیں۔
حکام کے مطابق پاکستان میں تین لاکھ 20 ہزار چار سو سے زائد افراد کرونا سے متاثر ہوئے تھے جن میں سے 6601 افراد وبا سے ہلاک ہوئے جب کہ تین لاکھ پانچ ہزار صحت یاب ہو چکے ہیں۔
سرکاری اعداد و شمار کے مطابق پاکستان میں وبا سے متاثرہ افراد کی نشان دہی کے لیے 39 لاکھ 43 ہزار ٹیسٹ کیے گئے۔ گزشتہ 24 گھنٹوں میں لگ بھگ 29 ہزار افراد کے ٹیسٹ ہوئے۔
حکام کے مطابق گزشتہ 24 گھنٹوں میں پاکستان میں مزید 615 افراد کے وبا سے متاثر ہونے کی تصدیق ہوئی۔ جب کہ مزید 14 افراد ہلاک ہوئے۔
کرونا بحران کے خواتین پر منفی اثرات
اقوامِ متحدہ کے مطابق نوعمر لڑکیاں ترقی کے میدان میں اس قدر پیچھے رہ گئی ہیں کہ آج وہ دنیا کے حالات کا مقابلہ کرنے کے لیے تیار نہیں۔ کرونا وائرس کی عالمی وبا نے خواتین کے لیے صورتِ حال مزید خراب کی ہے۔ اس عالمی وبا نے دنیا بھر کی خواتین کے لیے کیا چیلنجز پیدا کیے ہیں؟ دیکھیے نیلوفر مغل کی رپورٹ میں۔
چین میں مزید 20 کیسز رپورٹ
چین میں بدھ کو کرونا وائرس کے مزید 20 کیسز رپورٹ ہوئے ہیں۔ جب کہ ایک روز قبل رپورٹ ہونے والے کیسز کی تعداد 13 تھی۔
نیشنل ہیلتھ کمیشن کا کہنا ہے کہ 20 میں سے 14 نئے کیسز بیرون ملک سے چین منتقل ہوئے۔ جب کہ مقامی طور پر منتقل ہونے والے کیسز کی تعداد 6 ہے اور ان کا چنگڈو سے ہے۔
حکومت نے بیرون ملک سے منتقل ہونے والے کیسز کی بڑھتی ہوئی تعداد کے پیش نظر چنگڈو شہر میں کرونا وائرس کے ٹیسٹ کے لیے مہم شروع کر دی ہے۔
چین میں کرونا وائرس کے تصدیق شدہ کیسز کی مجموعی تعداد 85 ہزار 661 ہو گئی ہے۔ تاہم مرنے والوں کی مجموعی تعداد 4 ہزار 634 میں کوئی اضافہ نہیں ہوا ہے۔