کرونا سے متاثرہ شخص سے رابطے کا بتانے والی ایپ
امریکہ میں یونیورسٹی آف ایریزونا میں طالبِ علم اور دیگر عملہ ایسی ایپ کا استعمال کر رہے ہیں جو انہیں اس بات سے آگاہ رکھتی ہے کہ وہ کسی ایسے شخص سے رابطے میں تو نہیں آئے جسے کرونا وائرس ہو چکا ہو۔ یہ ایپ کیسے کام کرتی ہے؟ دیکھیے اس رپورٹ میں۔
رضاکار بیمار ہونے پر 'جانسن اینڈ جانسن' نے کرونا ویکسین ٹرائلز روک دیے
دوا ساز کمپنی 'جانسن اینڈ جانسن' نے اعلان کیا ہے کہ کرونا ویکسین کے آزمائشی مرحلے میں شریک ایک رضا کار کے بیمار ہونے پر فوری طور پر ٹرائلز روک دیے گئے ہیں۔
پیر کو کمپنی کی جانب سے جاری کیے گئے ایک بیان میں کہا گیا ہے کہ اس نے کرونا وائرس ویکسین کی تیاری پر عارضی طور پر کام روک دیا ہے۔ کمپنی کے مطابق اس کی وجہ ٹرائلز کے دوران ایک رضا کار میں نامعلوم بیماری کا انکشاف ہونا ہے۔
بیان میں کہا گیا ہے کہ اس رضا کار کی بیماری کا معائنہ ایک غیر جانبدار ڈیٹا اینڈ سیفٹی بورڈ کر رہا ہے۔ اس کے ساتھ ساتھ اسے کمپنی کے معالجین بھی اس معاملے کو دیکھ رہے ہیں۔
کمپنی کے مطابق کسی بھی ویکسین کی تیاری کے عمل جہاں ہزاروں افراد پر ٹرائلز کیے جا رہے ہوں وہاں ایسے واقعات معمول کا حصہ ہیں۔
کمپنی نے یہ وضاحت بھی کی ہے کہ اسے ریگولیٹری اتھارٹی کی جانب سے نہیں روکا گیا بلکہ اس نے خود ٹرائلز کے عمل کو عارضی طور پر روکا ہے۔
جانسن اینڈ جانسن کی جانب سے ٹرائلز عارضی طور پر روکنے کا واقعہ ایسے وقت میں آیا ہے جب گزشتہ ماہ دوا ساز کمپنی ایسٹرازینکا اور آکسفورڈ یونیورسٹی کے اشتراک سے ویکسین کی آزمائش ایک رضا کار میں منفی ردعمل کے بعد روک دی گئی تھی۔
کرونا بحران: 'پاکستان میں سب ہی ذہنی دباؤ کا شکار ہیں'
ذہنی صحت کے عالمی دن پر دنیا بھر میں پہلی بار چوبیس گھنٹوں کے لیے 'اسپیک یور مائنڈ' کے عنوان سے ورچوئل مارچ ہوا جس میں پاکستان کی نمائندگی کراچی کے ایک ادارے 'تسکین' نے کی۔ مارچ کی اہمیت اور پاکستان میں ذہنی صحت سے متعلق 'تسکین' سے منسلک ڈاکٹر طحٰہ صابری سے وی او اے کی نیلوفر مغل کی گفتگو۔
کرسٹیانو رونالڈو کرونا وائرس کا شکار
فٹ بال کے عالمی شہرت یافتہ کھلاڑی کرسٹیانو رونالڈو بھی کرونا وائرس سے محفوظ نہ رہ سکے اور ان کا کرونا ٹیسٹ مثبت آ گیا ہے۔
پرتگال کی ساکر فیڈریشن نے بتایا ہے کہ کرسٹیانو رونالڈو کا کرونا ٹیسٹ پازیٹو آیا ہے۔ تاہم فیڈریشن کے مطابق رونالڈو میں کوئی ظاہری علامات نہیں ہیں۔ رونالڈو کا کرونا ٹیسٹ کب پازیٹو آیا، اس بارے میں بھی تفصیلات نہیں بتائی گئیں۔
کرسٹیانو رونالڈو نے اتوار کو فرانس میں نیشل لیگ کے میچ میں حصہ لیا تھا جو صفر-صفر سے برابر رہا۔ انہوں نے گزشتہ ہفتے اسپین کے خلاف بھی ایک دوستانہ میچ کھیلا تھا۔