امریکی صدر ٹرمپ کا بیٹا کرونا کا شکار ہونے کے بعد صحت یاب
امریکی خاتونِ اوّل میلانیا ٹرمپ نے کہا ہے کہ صدر ٹرمپ اور ان کے 14 سالہ بیٹے بیرن ٹرمپ بھی کرونا وائرس کا شکار ہوئے تھے۔ البتہ اب وہ صحت یاب ہو چکے ہیں۔
میلانیا ٹرمپ نے بدھ کو اپنے ایک طویل نوٹ میں کرونا وائرس کا شکار ہونے کے بعد اپنے ذاتی تجربے اور احساسات کو بیان کیا۔ اسی نوٹ میں انہوں نے اپنے بیٹے بیرن ٹرمپ کے کرونا وائرس کا شکار ہونے کا بھی انکشاف کیا۔
خاتونِ اول نے کہا کہ جب وہ اور امریکی صدر کرونا وائرس میں مبتلا ہوئے تھے تو وائٹ ہاؤس نے بیرن ٹرمپ کا ٹیسٹ منفی آنے کی اطلاع دی تھی۔ لیکن بعد میں ان کا ٹیسٹ مثبت آیا۔ البتہ بیرن ٹرمپ میں وائرس کی کوئی علامات ظاہر نہیں ہوئیں۔
خاتونِ اول نے کہا ہے کہ ان کا اور بیرن ٹرمپ کا ٹیسٹ اب منفی آ چکا ہے اور وہ دونوں کرونا سے صحت یاب ہو چکے ہیں۔
پاکستان میں 40 لاکھ سے زائد ٹیسٹ
پاکستان میں کرونا وائرس سے مزید 659 افراد کے متاثر ہونے کی تصدیق ہوئی ہے۔ جب کہ گزشتہ 24 گھنٹوں میں سات اموات ہوئی ہیں۔
سرکاری اعداد و شمار کے مطابق پاکستان میں کرونا وائرس سے متاثر ہونے والے تین لاکھ 21 ہزار 877 افراد میں سے تین لاکھ پانچ ہزار 835 افراد صحت یاب ہو چکے ہیں جب کہ 6621 افراد کی وبا سے موت ہوئی ہے۔
ملک بھر میں اب بھی نو ہزار 421 افراد زیرِ علاج ہیں جن میں سے 529 انتہائی نگہداشت میں ہیں۔
حکام کے مطابق پاکستان 40 لاکھ نو ہزار 497 ٹیسٹ کیے جا چکے ہیں۔ جب کہ گزشتہ 24 گھنٹوں میں 33 ہزار 901 ٹیسٹ کیے گئے۔
امریکہ میں ایک بار پھر کیسز میں اضافہ ہونے لگا: رپورٹ
امریکہ میں کرونا وائرس کے کیسز میں ایک بار پھر اضافہ ہونے لگا ہے ۔
امریکی اخبار 'وال اسٹریٹ جرنل' کی رپورٹ کے مطابق رواں ماہ امریکہ میں آٹھ دن ایسے گزرے ہیں جب ملک بھر میں یومیہ کیسز 50 ہزار سے زائد رپورٹ ہوئے ہیں۔
رپورٹ کے مطابق گزشتہ ایک ہفتے میں 40 ریاستوں میں سامنے آنے والے کیسز کی تعداد اس سے قبل 14 دن کے کیسز سے زیادہ رہی ہے۔
واضح رہے کہ وال اسٹریٹ جرنل نے جان ہاپکنز یونیورسٹی کے اعداد و شمار کا جائزہ لے کر رپورٹ ترتیب دی ہے۔
رپورٹ میں مزید کہا گیا ہے کہ اگر گزشتہ ایک ہفتے کے اوسط کیسز کی تعداد 14 دن کے کیسز کی اوسط سے زیادہ ہے تو واضح ہو رہا ہے کہ امریکہ میں کیسز بڑھ رہے ہیں۔
حالیہ ہفتوں میں امریکہ میں اسپتالوں میں بھی مریضوں کی تعداد بڑھی ہے۔
البتہ وبا سے اموات کی شرح میں کمی واقع ہوئی ہے۔ اعداد و شمار سے واضح ہو رہا ہے کہ گزشتہ تین ہفتوں میں اوسطاََ 700 اموات ہوئی ہیں جب کہ دو ماہ قبل یہ شرح 1000 تک تھی۔
واضح رہے کہ امریکہ میں کرونا وائرس سے دو لاکھ 17 ہزار سے زائد اموات ہو چکی ہیں۔