امریکی انتخابات اور کرونا وائرس سے نمٹنے کے اقدامات
کرونا کی عالمی وبا سے نمٹنے کے اقدامات امریکی صدارتی انتخابات کے نتائج میں اہم کردار ادا کر سکتے ہیں۔ کیوں کہ اس وقت انتخابی مہم میں کرونا وائرس ہی موضوعِ بحث ہے جب کہ وہ تمام مسائل پسِ منظر میں چلے گئے ہیں جو ماضی میں انتخابات کے موقع پر اجاگر کیے جاتے تھے۔ تفصیلات اس رپورٹ میں۔
چین میں دو ماہ بعد ایک دن میں سامنے آنے والے سب سے زیادہ کیسز
چین میں گزشتہ 24 گھنٹوں کے دوران مزید 42 کیسز رپورٹ ہوئے ہیں۔ یہ چین میں گزشتہ دو ماہ میں ایک دن میں رپورٹ ہونے والے سب سے کیسز کی تعداد ہے۔
خبر رساں ادارے 'رائٹرز' کے مطابق چین میں 10 اگست کو 44 کیسز رپورٹ ہوئے تھے جس کے بعد منگل کو سب سے زیادہ کیسز سامنے آئے ہیں۔
واضح رہے کہ گزشتہ سال دسمبر میں چین کے شہر ووہان سے ہی کرونا وائرس دنیا بھر میں پھیلنا شروع ہوا تھا۔
چین میں حکام کا دعویٰ ہے کہ اب تک ملک بھر میں 91 ہزار کے لگ بھگ کیسز ہی سامنے آئے ہیں جب کہ 4739 اموات ہوئی ہیں۔
تھائی لینڈ میں ایمرجنسی میں مزید ایک ماہ کی توسیع
تھائی لینڈ میں کابینہ نے کرونا وائرس کی صورتِ حال کے باعث نافذ ہنگامی حالات کے اطلاق کی مدت مزید ایک ماہ بڑھا دی ہے۔
واضح رہے کہ ملک بھر میں وبا کے باعث مارچ میں ایمرجنسی کا نفاذ کیا گیا تھا۔
سرکاری اعداد و شمار کے مطابق تھائی لینڈ میں اب تک وبا سے 3759 افراد متاثر ہوئے ہیں جب کہ 59 اموات ہوئی ہیں۔
جنوبی افریقہ کے صدر قرنطینہ میں چلے گئے
جنوبی افریقہ کے صدر سیرل رامافوزا کرونا وائرس سے متاثرہ شخص کے ساتھ عشائیے میں شریک ہونے کے بعد قرنطینہ میں چلے گئے ہیں۔
حکام کے مطابق صدر میں کرونا وائرس سے متاثر ہونے کی علامات سامنے نہیں آئیں۔ جب کہ ان کی صحت بہتر ہے۔
جنوبی افریقہ کی حکومت کے مطابق صدر قرنطینہ میں رہتے ہوئے امور مملکت انجام دیں گے۔