دنیا بھر میں کرونا وائرس کی دوسری لہر میں شدت، نئے لاک ڈاؤن متوقع
دنیا بھر میں کرونا وائرس کی نئی لہر کے شدت اختیار کر جانے کے بعد مختلف ملکوں میں پابندیاں دوبارہ سخت کرنے کے اقدامات کیے جا رہے ہیں تاکہ وائرس کو پھیلاؤ سے روکا جا سکے۔
برطانیہ کے وزیر خارجہ ڈومینک راب نے جمعہ کو 'بی بی سی' کو انٹرویو دیتے ہوئے کہا ہے کہ ملک بھر میں لاک ڈاؤن کی پابندیاں عائد کرنا غیر یقینی ہو گا اور اس کے بجائے مقامی سطح پر اقدامات زیادہ اہم ہوں گے۔ اس لیے لوگ ہدایات پر پابندی کے ساتھ عمل کریں۔
برطانوی وزیر خارجہ کے اس بیان سے قبل فرانس اور جرمنی کے سربراہوں نے نئی پابندیاں نافذ کرنے کا اعلان کیا تھا۔
بھارت میں وبا سے مزید 48 ہزار سے زائد افراد متاثر
بھارت میں کرونا وائرس کے یومیہ کیسز میں کمی دیکھی جا رہی ہے۔ سرکاری اعداد و شمار کے مطابق گزشتہ 24 گھنٹوں کے دوران عالمی وبا سے مزید 48 ہزار 268 افراد متاثر ہوئے ہیں۔
وزارتِ صحت کے اعداد و شمار کے مطابق جمعے کو وبا سے 551 ہلاکتوں کے بعد بھارت میں وبا سے اموات کی تعداد ایک لاکھ 21 ہزار 641 ہو گئی ہے۔
امریکہ کے بعد کرونا وائرس سے سب سے زیادہ متاثرہ ملک بھارت میں اب تک 81 لاکھ سے زائد افراد متاثر ہو چکے ہیں۔ جب کہ حکام نے 74 لاکھ سے زائد افراد کے صحت یاب ہونے کی تصدیق کی ہے۔
خیال رہے کہ بھارت میں گزشتہ دو ہفتوں کے دوران یومیہ کیسز 60 ہزار سے کم رہے ہیں۔ قبل ازیں بھارت میں یومیہ کیسز 80 ہزار سے بھی زائد رپورٹ ہوتے رہے ہیں۔
ماہرین کا ماننا ہے کہ بھارت میں کرونا وائرس اپنی بلند ترین سطح تک پہنچ چکا ہے۔ جب کہ کچھ ماہرین نے ٹیسٹوں سے متعلق سوالات اٹھائے ہیں اور خبردار کیا ہے کہ موسم سرما یا آئندہ چند ہفتوں میں ہونے والے تہواروں کے سبب کیسز میں اضافہ ہو سکتا ہے۔
خیبر پختونخوا میں وائرس سے ڈاکٹر ہلاک
خیبر پختونخوا کے خیبر میڈیکل کالج کے سینئر ڈین آف فیکلٹی ڈاکٹر سلطان زیب کی ہفتے کی صبح کرونا وائرس کے سبب موت کی تصدیق کی گئی ہے۔
ڈاکٹر سلطان زیب کا تعلق ضلع بنیر کی تحصیل خدوخیل کے قصبے طوطالئی سے تھا اور وہ کرونا وائرس کے باعث پشاور کے حیات آباد میڈیکل کمپلیکس میں زیرِ علاج تھے۔
محکمہ صحت کے مطابق خیبر پختونخوا میں کرونا وائرس کے باعث 20 ڈاکٹرز ہلاک ہو چکے ہیں۔
وبا کے سبب ایک درجن سے زائد طبی عملے کے افراد کی بھی اموات ہو چکی ہیں۔
فرانس میں دوبارہ لاک ڈاؤن، غیر ضروری باہر نکلنے والوں پر جرمانہ ہوگا
فرانس میں کرونا وائرس کے بڑھتے ہوئے کیسز کے باعث جمعے سے دوبارہ لاک ڈاؤن نافذ کر دیا گیا ہے۔
حکام کے مطابق لاک ڈاؤن کا نفاذ رواں سال یکم دسمبر تک ہو گا۔ جب کہ ماہرین کا کہنا ہے کہ صورتِ حال کو دیکھتے ہوئے لاک ڈاؤن میں توسیع کی جا سکتی ہے۔
فرانس کے وزیر اعظم جین کیسٹیکس کا صحافیوں سے گفتگو میں کہنا تھا کہ لاک ڈاؤن کے دوران لوگ صرف ورزش کرنے کے لیے اپنے گھروں سے ایک کلو میٹر دور تک صرف ایک گھنٹے کے لیے نکل سکیں گے۔
لاک ڈاؤن کے دوران گھروں سے باہر نکلنے والے افراد کو باہر نکلنے سے متعلق دستاویزات دکھانی ہوں گی۔ بصورت دیگر انہیں 135 یوروز (157 ڈالرز) جرمانہ ادا کرنا ہو گا۔
دوسری طرف فرانس کے صدر ایمانوئل میخواں نے خبردار کیا ہے کہ کرونا وائرس کی دوسری لہر، پہلی لہر کی نسبت زیادہ مہلک ہو سکتی ہے۔
امریکہ کی 'جان ہاپکنز یونیورسٹی' کے مطابق فرانس میں اب تک 13 لاکھ سے زائد افراد وبا سے متاثر ہو چکے ہیں۔ جب کہ 36 ہزار سے زائد اموات ہوئی ہیں۔