یورپ: پانچ ہفتوں کے دوران کیسز کی تعداد میں دو گنا اضافہ
یورپ میں گزشتہ پانچ ہفتوں کے دوران کرونا کیسز میں دو گنا اضافہ ریکارڈ کیا گیا ہے جس کے بعد وہاں کیسز کی مجموعی تعداد ایک کروڑ سے تجاوز کر گئی ہے۔
خبر رساں ادارے 'رائٹرز' کے اعداد و شمار کے مطابق یورپ میں تقریباً نو ماہ کے دوران پچاس لاکھ کیسز ریکارڈ کیے گئے جب کہ گزشتہ ایک ماہ میں مزید پچاس لاکھ کیسز سامنے آئے ہیں۔
'رائٹرز' کے اعداد و شمار کے مطابق ایک ہفتے کے دوران یورپ میں 16 لاکھ سے زیادہ کیسز اور 16 ہزار 100 سے زیادہ اموات رپورٹ ہوئی ہیں۔
یورپ میں رپورٹ ہونے والے کیسز دنیا بھر میں رپورٹ ہونے والے کیسز کا 22 فی صد بنتے ہیں۔
وبائی مرض سے دنیا بھر میں تقریباً 12 لاکھ افراد ہلاک ہو چکے ہیں جس میں سے صرف یورپ میں اب تک دو لاکھ 69 ہزار سے زیادہ اموات ہو چکی ہیں۔
کیسز میں مسلسل اضافےکے بعد فرانس، جرمنی اور برطانیہ نے ملک بھر میں ایک ماہ کے لیے لاک ڈاؤن کا اعلان کیا ہے جب کہ پرتگال نے جزوی لاک ڈاؤن اور اسپین اور اٹلی نے پابندیوں میں مزید سختی کی ہے۔
عالمی ادارۂ صحت کے سربراہ نے خود کو قرنطینہ کر لیا
عالمی ادارۂ صحت (ڈبلیو ایچ او) کے سربراہ ٹیڈروس ایڈہینم گیبراسس نے کہا ہے کہ اُن سے ملنے والے ایک شخص کے کرونا مثبت آنے کی وجہ سے وہ خود کو قرنطینہ کر رہے ہیں۔ انہوں نے اس بات پر زور دیا کہ اُن میں کرونا کی علامات ظاہر نہیں ہوئی ہیں۔
اتوار کو اپنے ایک ٹوئٹ میں ڈبلیو ایچ او کے سربراہ نے کہا کہ ’’میرا رابطہ ایک ایسے شخص سے ہوا تھا جس کا کرونا ٹیسٹ مثبت آیا تھا۔ میں ٹھیک ہوں اور مجھ میں کوئی علامات نہیں ہیں مگر میں عالمی ادارہ صحت کے پروٹوکولز کے تحت آنے والے دنوں کے لیے خود کو قرنطینہ کر رہا ہوں، اور گھر سے کام کروں گا۔‘‘
جب سے عالمی وبا شروع ہوئی ہے اس وقت سے ٹیڈروس اس کے خلاف عالمی ادارۂ صحت کی کوششوں کی سربراہی کر رہے ہیں۔
بل گیٹس سے 'گمنام ہیرو' کا خطاب پانے والا پاکستانی
برطانیہ میں کرونا ٹیسٹ کی آزمائشی اسکیم
برطانوی حکومت کرونا وائرس کے پھیلاؤ کو روکنے کے لیے رواں ہفتے سے شہر لیورپول میں کرونا ٹیسٹوں کی آزمائشی اسکیم شروع کرے گی۔
اس اسکیم کے تحت تمام شہریوں کے کرونا ٹیسٹ کیے جائیں گے اور دیکھا جائے گا کہ اُن میں کرونا وائرس کی علامات پائی جاتی ہیں یا نہیں۔
یورپی ممالک میں کرونا وائرس کے باعث سب سے زیادہ ہلاکتیں برطانیہ میں رپورٹ ہوئی ہیں۔ وبا کی دوسری لہر کے پیشِ نظر برطانیہ میں جمعرات سے لاک ڈاؤن نافذ کیا جا رہا ہے۔
برطانیہ کا شمال مغربی علاقہ لیور پول کرونا وبا سے شدید متاثرہ علاقوں میں سے ایک ہے۔ جہاں مذکورہ اسکیم کے تحت رہائش پذیر اور کام کے لیے آنے والے افراد کے کرونا ٹیسٹ کیے جائیں گے۔
امریکہ کی جان ہاپکنز یونیورسٹی کے مطابق برطانیہ میں اب تک دس لاکھ سے زائد افراد کرونا وبا سے متاثر اور 46 ہزار سے زائد اموات رپورٹ ہو چکی ہیں۔