صدر ٹرمپ کے چیف آف اسٹاف بھی وبا سے متاثر
امریکہ کے صدر ڈونلڈ ٹرمپ کے چیف آف اسٹاف مارک میڈوز کے بھی کرونا وائرس سے متاثر ہونے کی تصدیق ہوئی ہے۔
خبر رساں ادارے 'ایسوسی ایٹڈ پریس' کے مطابق ٹرمپ انتظامیہ کے دو اعلیٰ ترین حکام نے تصدیق کی ہے کہ مارک میڈوز کا کرونا وائرس کا ٹیسٹ مثبت آیا ہے۔
حکام نے مزید آگاہ نہیں کیا کہ صدر ٹرمپ کے چیف آف اسٹاف کب وبا سے متاثر ہوئے اور ان کا ٹیسٹ کب مثبت آیا۔
واضح رہے کہ مارک میڈوز امریکہ میں صدارتی انتخابات کی مہم کے دوران صدر ٹرمپ کے ہمراہ سفر کرتے رہے ہیں۔ جب کہ آخری بار وہ تین دن قبل بدھ تک کسی عوامی سطح پر نظر آتے رہے ہیں۔
خیال رہے کہ صدر ٹرمپ بھی کرونا وائرس سے متاثر ہوئے تھے اور گزشتہ ماہ کے آغاز میں انہوں نے کچھ دن اسپتال میں بھی گزارے تھے۔ وبا سے صحت یاب ہونے کے بعد وہ دوبارہ انتخابی مہم میں مصروف ہو گئے تھے۔
قبل ازیں نائب صدر مائیک پینس کے چیف آف اسٹاف اور عملے کے کچھ ارکان بھی وبا سے متاثر ہو چکے ہیں۔
پاکستان میں اموات کی شرح میں اضافہ
پاکستان میں کرونا وائرس سے رواں ہفتے 133 اموات ہو چکی ہیں۔ حکومت عوام سے احتیاطی تدابیر پر عمل کرنے کی مسلسل اپیل کر رہی ہے۔
سرکاری اعداد و شمار کے مطابق پاکستان میں گزشتہ 24 گھنٹوں میں مزید 25 اموات ہوئی ہیں جس کے بعد اموات کی مجموعی تعداد 6968 ہو گئی ہیں۔
واضح رہے کہ پاکستان میں کرونا وائرس سے سب سے زیادہ اموات 20 جون کو ہوئی تھیں جب حکام نے ملک بھر میں 152 افراد کے ہلاک ہونے کی تصدیق کی تھی۔
اس کے بعد پاکستان میں اموات میں کمی آنا شروع ہوئی تھیں۔ ستمبر میں وبا سے ہلاکتوں کی شرح انتہائی کمی ہو گئی تھی۔ جس کے بعد حکومت نے پابندیوں میں نرمی کرنا شروع کر دی تھی۔
گزشتہ ماہ کے آغاز سے ایک بار پھر وبا سے ہلاکتیں بڑھنا شروع ہوئی تھی۔ البتہ رواں ماہ یومیہ اموات کی شرح ایک بار پھر بڑھ چکی ہے۔
رواں ہفتے پیر کو 14، منگل کو 18، بدھ کو 26، جمعرات کو 30، جمعے کو 20 جب کہ گزشتہ روز25 اموات ہوئی ہیں۔
پاکستان میں زیرِ علاج افراد کی تعداد 18 ہزار تک پہنچ گئی
پاکستان میں کرونا وائرس کے زیرِ علاج مریضوں کی تعداد 18 ہزار تک پہنچ گئی۔ جب کہ ایک ہزار کے قریب افراد انتہائی نگہداشت میں ہیں۔
سرکاری اعداد و شمار کے مطابق پاکستان میں گزشتہ 24 گھنٹوں میں کرونا وائرس سے مزید 1436 افراد متاثر ہوئے ہیں جس کے بعد وبا سے متاثر افراد کی تعداد 3 لاکھ 43 ہزار ہو گئی ہے جن میں سے 3 لاکھ 18 ہزار افراد صحت یاب ہو چکے ہیں۔ جب کہ 6968 لوگ وبا سے ہلاک ہو چکے ہیں۔
اعداد و شمار کے مطابق ملک بھر میں اب بھی17 ہزار 804 افراد اب بھی زیرِ علاج ہیں۔ گزشتہ دو ہفتوں میں زیرِ علاج افراد کی شرح میں تیزی سے اضافہ ہوا ہے۔
حکام کے مطابق زیرِ علاج افراد میں سے 921 افراد انتہائی نگہداشت میں ہیں۔
امریکہ میں مسلسل چوتھے روز ریکارڈ یومیہ کیسز کی تصدیق
امریکہ میں مسلسل تیسرے روز میں ریکارڈ یومیہ کیسز سامنے آئے ہیں۔ جس کے بعد زیرِ علاج متاثرہ افراد کی تعداد 57 لاکھ 73 ہزار تک پہنچ گئی ہے۔
امریکہ کی 'جان ہاپکنز یونی ورسٹی' کے اعداد و شمار کے مطابق گزشتہ 24 گھنٹوں میں امریکہ میں ایک لاکھ 27 ہزار 399 افراد وبا سے متاثر ہوئے ہیں۔ جو ایک دن میں سامنے آئے والے ریکارڈ کیسز ہیں۔ اس سے ایک روز قبل بھی ریکارڈ یومیہ کیسز ایک لاکھ 26 ہزار 480 کیسز کی تصدیق ہوئی تھی۔ جب کہ اس سے ایک دن پہلے ایک لاکھ 21 ہزار 888 کیسز کا اندراج ہو تھا۔
اعداد و شمار کے مطابق گزشتہ چار روز میں مسلسل ایک لاکھ سے زائد کیسز سامنے آئے ہیں۔
امریکہ میں اب تک 98 لاکھ 61 ہزار 983 کیسز رپورٹ ہوئے ہیں۔ 'جان ہاپکنز یونی ورسٹی' کے اعداد و شمار کے مطابق متاثر افراد میں سے 38 لاکھ 51 ہزار 465 صحت یاب ہو چکے ہیں۔
اعداد و شمار کے مطابق امریکہ میں کرونا وائرس سے اب تک 2 لاکھ 37 ہزار 123 افراد ہلاک ہو چکے ہیں۔ گزشتہ 24 گھنٹوں میں ایک ہزار 40 اموات ہوئی ہیں۔
واضح رہے کہ امریکہ وبا سے سب سے زیادہ متاثر ملک ہے۔