وبا کے باث ملتوی ہونے والے پی ایس ایل کے آخری مرحلے کی تیاریاں مکمل
کرونا کی وبا کے باعث ملتوی ہونے والا پاکستان سپر لیگ فائیو کا آخری مرحلہ ہفتے سے کراچی کے نیشنل اسٹیڈیم میں شروع ہو رہا ہے۔ پلے آف مرحلے میں تین میچز کھیلے جائیں گے جب کہ فائنل بھی 17 نومبر کو کراچی میں ہی کھیلا جائے گا۔ ان میچز کے بارے میں مزید جانتے ہیں نوید نسیم کی اس ڈیجیٹل رپورٹ میں
بھارت میں مزید 520 افراد ہلاک، نئی دہلی کے اسپتالوں میں بستروں کی کمی
بھارت میں گزشتہ 24 گھنٹوں کے دوران مزید 44 ہزار 684 افراد کے کرونا وائرس سے متاثر ہونے کی تصدیق ہوئی ہے۔ جب کہ مزید 520 افراد ہلاک ہوئے ہیں۔
وزارتِ صحت کے مطابق ہفتے کو رپورٹ ہونے والے کیسز میں سے سات ہزار 802 کیسز دارالحکومت نئی دہلی سے رپورٹ ہوئے۔ جہاں عالمی وبا کے سبب مزید 91 اموات بھی ہوئی ہیں۔
نئی دہلی میں حالیہ ہفتوں کے دوران بھارت کے دوسرے علاقوں کی نسبت کرونا وائرس کے کیسز میں اضافہ ہوا ہے۔
اعداد و شمار کے مطابق دہلی کے اسپتالوں میں گنجائش لگ بھگ ختم ہو چکی ہے اور اسپتالوں کے انتہائی نگہداشت کے وارڈز میں وینٹی لیٹرز کی سہولت والے بستروں کی تعداد کم ترین سطح تک پہنچ چکی ہے۔
دہلی کی مقامی حکومت نے خبردار کیا ہے کہ رواں ماہ نومبر کے آخر تک یومیہ کیسز کی تعداد 12 ہزار تک جا سکتی ہے۔
خیال رہے کہ بھارت میں کرونا وائرس سے متاثرہ افراد کی تعداد 87 لاکھ تک پہنچ چکی ہے۔ جب کہ ایک لاکھ 29 ہزار سے زائد افراد ہلاک ہوئے ہیں۔
اٹلی میں یومیہ کیسز میں اضافے کے باعث پابندیاں سخت کرنے کا فیصلہ
یورپ کے ملک اٹلی میں کرونا وائرس کے پھیلاؤ کو روکنے کے لیے متعدد علاقوں میں پابندیاں نافذ کی جا رہی ہیں۔ جب کہ دو شہروں ٹسکنی اور کمپینیا کو ریڈ زون قرار دے دیا گیا ہے۔
وزارتِ صحت کے مطابق 24 گھنٹوں میں مزید 40 ہزار 902 افراد کرونا سے متاثر ہوئے۔ جس کے بعد اٹلی میں اس وبا سے متاثرہ افراد کی تعداد 11 لاکھ سے تجاوز کر گئی ہے۔
امریکہ کی 'جان ہاپکنز یونیورسٹی' کے مطابق اٹلی میں اس وبا سے ہلاکتوں کی تعداد 44 ہزار سے زائد ہو چکی ہے۔
جرمنی: کرونا ویکسین سب سے پہلے نرسنگ ہومز میں فراہم کی جائے گی
یورپی ملک جرمنی کی چانسلر انجیلا مرکل کا کہنا ہے کہ جرمنی میں کرونا ویکسین سب سے پہلے نرسنگ ہومز میں رہائش پذیر افراد اور وہاں خدمات فراہم کرنے والے اہلکاروں کو دی جائے گی۔
ہفتے کو ہفتہ وار خطاب میں انجیلا مرکل کا کہنا تھا کہ کرونا ویکیسین دستیاب ہونے پر نرسنگ ہومز کے لوگوں کو فوقیت حاصل ہو گی۔
خیال رہے کہ جرمنی میں لگ بھگ 10 لاکھ لوگ نرسنگ اور کیئر ہومز میں رہتے ہیں۔
جرمنی فارما سوٹیکل کمپنی ‘بائیو این ٹیک’ اور امریکی کمپنی ‘فائزر’ کی تیار کردہ ویکسین کی 10 کروڑ ڈوز خریدنے کا ارادہ رکھتی ہے۔
جرمنی میں اب تک 7 لاکھ 73 ہزار سے زائد افراد میں کرونا وائرس کی تشخیص ہو چکی ہے۔ جب کہ اس وبا کے باعث 12 ہزار سے زائد اموات رپورٹ ہوئی ہیں۔