پاکستان میں 2500 سے زیادہ کیسز رپورٹ
پاکستان میں گزشتہ چوبیس گھنٹوں کے دوران کرونا وائرس سے متاثرہ مزید 18 مریض دم توڑ گئے جب کہ 2547 افراد میں وائرس کی تشخیص ہوئی ہے۔
سرکاری اعداد و شمار کے مطابق ملک بھر میں بدھ کو 36 ہزار 899 ٹیسٹ کیے گئے، اس طرح ملک میں مثبت کیسز کی شرح چھ اعشاریہ نو فی صد رہی۔
پاکستان میں عالمی وبا سے اب تک 7248 افراد ہلاک اور تین لاکھ 65 ہزار سے زیادہ کیسز رپورٹ ہو چکے ہیں جب کہ حکام کے مطابق تین لاکھ 26 ہزار سے زیادہ متاثرہ افراد صحت یاب بھی ہو چکے ہیں۔
حکام کے مطابق کرونا سے متاثرہ 1535 مریضوں کی حالت اب بھی تشویش ناک ہے۔
سعودی عرب میں سات ماہ بعد 300 سے کم کیس رپورٹ
سعودی عرب میں کرونا وبا کا زور ٹوٹ رہا ہے اور جمعرات کو سات ماہ بعد 300 سے کم کیس رپورٹ ہوئے ہیں۔
سعودی وزارتِ صحت کے مطابق جمعرات کو ملک بھر میں صرف 290 کیس رپورٹ ہوئے جن میں 63 ریاض جب کہ 29 کیس مدینہ میں رپورٹ ہوئے ہیں۔
سعودی عرب میں مجموعی طور پر تین لاکھ 54 ہزار سے زائد کیس جب کہ اس مہلک وائرس سے 5700 سے زائد افراد ہلاک ہو چکے ہیں۔
حکام کا کہنا ہے کہ گزشتہ 24 گھنٹوں کے دوران مزید 411 افراد اس مرض سے صحت یاب ہوئے ہیں جس کے بعد مجموعی طور پر صحت یاب ہونے والوں کی تعداد 3 لاکھ 41 ہزار سے زائد ہو گئی ہے۔
براعظم افریقہ میں کرونا کیسز 20 لاکھ سے متجاوز
افریقی ممالک میں کرونا وائرس کے مجموعی کیسز کی تعداد 20 لاکھ سے بڑھ گئی ہے جب کہ طبی ماہرین کا کہنا ہے 54 ممالک پر مشتمل براعظم کو وائرس کی دوسری لہر کا سامنا ہے۔
افریقہ سینٹر فار ڈیزیز کنٹرول کے مطابق مجموعی طور پر افریقی ممالک میں اب تک 48 ہزار سے زائد افراد ہلاک ہو چکے ہیں جو دنیا بھر میں کرونا سے ہونے والی اموات کا چار فی صد ہے۔
ایک ارب 30 کروڑ نفوس پر مشتمل افریقی ممالک کو وائرس کی دوسری لہر کا سامنا کرنے میں مشکل کا سامنا ہے۔ کیوں کہ معاشی صورتِ حال کے باعث کئی ممالک نے پابندیاں ہٹا لی ہیں۔
افریقہ سینٹر فار ڈیزیز کنٹرول کے حکام کا کہنا ہے کہ ویکسین کے کامیاب ٹرائلز کی خبریں خوش آئند ہیں۔ تاہم اُن کے بقول افریقی ممالک تک اس کی ترسیل میں مشکلات کا سامنا ہو گا کیوں کہ یہاں سہولیات کا فقدان ہے۔
ایک لاکھ سے زیادہ اموات کے ساتھ میکسیکو دنیا کا چوتھا ملک بن گیا
میکسیکو میں کرونا وائرس سے اموات کی کل تعداد ایک لاکھ سے تجاوز کر گئی ہے جس کے بعد میکسیکو ہلاکتوں کے اعتبار سے دنیا کا چوتھا ملک بن گیا ہے جہاں ایک لاکھ سے اموات ہوئی ہیں۔
عالمی وبا سے جن دیگر ملکوں میں ایک لاکھ سے زیادہ اموات رپورٹ ہوئی ہیں ان میں امریکہ، برازیل اور بھارت بالترتیب پہلے، دوسرے اور تیسرے نمبر پر ہیں۔
میکسیکو کے وزیرِ صحت ہیوگو لوپیز نے جمعرات کو نیوز بریفنگ کے دوران بتایا کہ کرونا سے مزید 576 مریض ہلاک ہوئے ہیں جس کے بعد اموات کی کل تعداد ایک لاکھ 104 تک پہنچ گئی ہے۔
میکسیکو میں اب تک 10 لاکھ سے زیادہ کیسز رپورٹ ہو چکے ہیں جس میں مسلسل اضافہ ہو رہا ہے۔
حکام کا کہنا ہے کہ گزشتہ چند ہفتوں کے دوران اموات کی شرح میں کمی آئی ہے تاہم کیسز میں مسلسل اضافہ ہو رہا ہے۔