ہنگری: ماسک والی 'سانتا کلاز چاکلیٹ' کے چرچے
ہنگری کے ایک حلوائی نے کرونا وبا اور کرسمس کی آمد کے پیشِ نظر ایسی سانتا کلاز چاکلیٹ متعارف کرائی ہے جس میں سانتا کلاز نے بھی ماسک پہن رکھا ہے۔ اس منفرد چاکلیٹ کی آن لائن فروخت میں اضافہ دیکھا جا رہا ہے اور حلوائی کو طلب پوری کرنے میں مشکلات کا سامنا ہے۔
خبر رساں ادارے 'رائٹرز' سے گفتگو کرتے ہوئے ہنگری کے دارالحکومت بڈاپسٹ کے نواحی گاؤں کے حلوائی لیسلو ریموچی کا کہنا تھا کہ اُنہوں نے عالمگیر وبا کے دور میں لوگوں کا حوصلہ بلند کرنے کے لیے ایسا کیا۔
ان کا یہ بھی کہنا تھا کہ "میرا خیال ہے کرسمس کے موقع پر جب سانتا کلاز کی آمد ہوگی تو اُنہیں ماسک پہننا پڑے گا تاکہ لوگوں تک مثبت پیغام پہنچے اور اچھی مثال قائم ہو۔"
تھینکس گیونگ: دو دن میں 20 لاکھ امریکیوں کا فضائی سفر، کرونا انتباہ نظر انداز
امریکہ کے ٹرانسپورٹیشن سیکیورٹی ایڈمنسٹریشن کے مطابق جمعے اور ہفتے کو ملک بھر کے مختلف ہوائی اڈوں پر 20 لاکھ مسافروں کو اسکرین کیا گیا۔ غالب امکان ہے کہ ان میں سے بیشتر لوگوں نے تھینکس گیونگ کا تہوار اپنے خاندان کے ساتھ منانے کے لیے سفر کیا۔
تھینکس گیونگ امریکہ کا سب سے بڑا تہوار ہے جسے یومِ تشکر بھی کہا جاتا ہے۔ اس موقع پر امریکہ بھر میں لوگ دور دراز کا سفر کر کے اپنے خاندان اور دوستوں کے پاس جاتے ہیں اور ان کے ساتھ یہ تہوار مناتے ہیں۔
تھینکس گیونگ سے امریکہ میں تعطیلات کا موسم شروع ہو جاتا ہے جو نئے سال کی آمد تک جاری رہتا ہے۔ اس دوران اکثر لوگ اپنے پیاروں سے ملنے کے لیے سفر کرتے رہتے ہیں۔
رپورٹ میں بتایا گیا ہے کہ دو دنوں میں 20 لاکھ افراد کے فضائی سفر کی یہ تعداد گو کہ گزشتہ سال کے مقابلے کم ہے، لیکن کرونا وائرس کی دوسری لہر کی شدت کے باوجود جمعے کو اس سال مارچ کے بعد پہلی مرتبہ ایک روز میں 10 لاکھ سے زیادہ مسافروں نے فضائی سفر کے لیے ہوائی اڈوں کا رخ کیا۔
پاکستان میں مزید 48 اموات، 2900 سے زیادہ کیسز رپورٹ
پاکستان میں گزشتہ چوبیس گھنٹوں کے دوران کرونا وائرس کے مزید 48 مریض دم توڑ گئے ہیں جب کہ 2954 افراد میں وائرس کی تشخیص ہوئی ہے۔
پاکستان میں کرونا کیسز اور اموات کی شرح میں تیزی سے اضافہ ہو رہا ہے۔ گزشتہ روز مثبت کیسز کی شرح سات اعشاریہ پانچ چار فی صد رہی۔
حکومت نے کرونا کیسز میں اضافے کو دیکھتے ہوئے تعیلمی اداروں کی بندش اور متاثرہ علاقوں کو سیل کرنے کا فیصلہ کیا ہے۔
سرکاری اعداد و شمار کے مطابق پاکستان میں عالمی وبا سے اب تک 7744 افراد ہلاک اور تین لاکھ 79 ہزار سے زیادہ کیسز رپورٹ ہو چکے ہیں۔
حکام کے مطابق تین لاکھ 31 ہزار سے زیادہ مریض صحت یاب اور 40 ہزار سے زیادہ زیرِ علاج ہیں۔ تشویش ناک حالت میں مبتلا مریضوں کی کل تعداد ایک ہزار 751 بتائی جاتی ہے۔
چین: شنگھائی ایئرپورٹ عملے کے کرونا ٹیسٹ، سیکڑوں پروازیں منسوخ
چین کے سب سے بڑے شہر اور معاشی حب شنگھائی میں کرونا کیسز سامنے آنے کے بعد سیکڑوں پروازیں منسوخ کر دی گئی ہیں۔
چین کے محکمۂ صحت کے مطابق شنگھائی میں رپورٹ ہونے والے سات کیسز کا تعلق پوڈنگ انٹرنیشنل ایئرپورٹ کے کارگو سیکشن کے عملے کے ساتھ تھا جس کے بعد ایئرپورٹ کے ہزاروں ملازمین کے کرونا ٹیسٹ کیے گئے ہیں۔
ویری فلائٹس کے مطابق منگل کو پوڈنگ ایئرپورٹ سے شیڈول 500 فلائٹس منسوخ کی گئی ہیں جن میں سے تقریباً آدھی پروازیں اندرونِ ملک کی تھیں۔
اسی طرح تنجیان انٹرنیشنل ایئرپورٹ سے بھی روزانہ اڑنے والی تقریباً آدھی پروازیں منسوخ کی گئی ہیں۔ تنجیان میں ہفتے کو مقامی سطح پر کرونا منتقلی کے پانچ کیسز رپورٹ ہوئے تھے۔