کرونا لاک ڈاؤن کے باوجود گرین ہاؤس گیسوں اور گلوبل وارمنگ میں اضافہ جاری
موسمیات سے متعلق عالمی تنظیم ورلڈ میٹرولوجیکل آرگنائزیشن نے کہا ہے کہ کرونا وائرس کی وجہ سے دنیا بھر میں کیے جانے والے لاک ڈاؤنز کے باوجود زمین کے کرۂ ہوائی میں گرین ہاؤس گیسوں کے اخراج میں کوئی کمی نہیں ہوئی اور یہ اخراج اپنی ریکارڈ سطح تک پہنچ گیا ہے۔
یہ انکشاف تنظیم نے فضا میں کاربن ڈائی آکسائیڈ اور دیگر گرین ہاؤس گیسوں کے حجم سے متعلق اپنی سالانہ رپورٹ میں کیا ہے۔
کرونا وائرس کی عالمی وبا سے منسلک لاک ڈاؤن کی وجہ سے بھارت، چین اور دیگر کئی ممالک کے بڑے شہروں میں ماحولیاتی آلودگی میں کچھ کمی ہوئی ہے۔ تاہم عالمی تنظیم کا کہنا ہے کہ ان اقدامات کے باوجود گرین ہاؤس گیسوں کے مسلسل اخراج میں کمی نہیں ہوئی جس سے کرہ ارض کے درجہ حرارت میں اضافہ جاری ہے۔
رپورٹ میں کہا گیا ہے کہ بڑھتے ہوئے درجہ حرارت کی وجہ سے برف کے تیزی سے پگھلنے، سمندروں میں پانی کی سطح بلند ہونے اور شدید موسمی تغیرات جیسے واقعات تواتر سے رونما ہو رہے ہیں۔
کرونا وائرس کی پہلی تین ویکسین، کتنی مختلف اور کتنی مؤثر ہیں
کرونا وائرس سے بچاؤ کے لیے تیسرے مرحلے کے انسانی تجربات کے بعد اب تک تین مؤثر ویکسینز سامنے آ چکی ہیں، جس سے یہ امید پیدا ہو گئی ہے کہ اب جلد ہی اس موذی مرض کے پھیلاؤ پر قابو پا لیا جائے گا۔
ان ویکسینز کے متعلق اب تک جتنی بھی معلومات سامنے آئی ہیں، وہ اُنہیں بنانے والی کمپنیوں کی جانب سے ہی جاری کی گئی ہیں جب کہ ان کے مکمل نتائج کی تفصیلات اب تک منظرِ عام پر نہیں آئیں۔
یہ ویکسینز دوا ساز کمپنیوں ایسٹرازینیکا، موڈرنا اور تیسری ویکسن فائزر اور بائیو این ٹیک نے مشترکہ طور پر تیار کی ہے۔
امریکہ میں کرونا کے ریکارڈ مریض اسپتالوں میں داخل
امریکہ میں ایک روز کے دوران کرونا وائرس کے ریکارڈ مریض اسپتالوں میں داخل ہوئے ہیں۔
کووڈ ٹریکنگ پروجیکٹ کے اعداد و شمار کے مطابق امریکہ میں منگل کو کرونا کے شکار 88 ہزار 80 مریض مختلف اسپتالوں میں داخل ہوئے ہیں۔ امریکہ میں عالمی وبا کے پھیلاؤ سے اب تک اسپتالوں میں داخل ہونے والے مریضوں کی یہ ریکارڈ تعداد ہے۔
منگل کو امریکہ میں 17 لاکھ 85 ہزار سے زائد افراد کے کرونا ٹیسٹ کیے گئے جن میں سے ایک لاکھ 66 ہزار سے زیادہ افراد میں وائرس کی تشخیص ہوئی ہے۔
عالمی وبا سے سب سے زیادہ متاثرہ ملک امریکہ میں اب تک ایک کروڑ 25 لاکھ سے زیادہ کیسز اور دو لاکھ 59 ہزار سے زیادہ اموات رپورٹ ہو چکی ہیں۔
پاکستان: اموات اور کیسز کی شرح میں مسلسل اضافہ
پاکستان میں کرونا کیسز اور اموات کی تعداد میں مسلسل اضافہ ہو رہا ہے۔ گزشتہ چوبیس گھنٹوں کے دوران مزید 59 مریض دم توڑ گئے جب کہ 3000 ہزار سے زیادہ افراد میں وائرس کی تشخیص ہوئی ہے۔
سرکاری اعداد و شمار کے مطابق گزشتہ چوبیس گھنٹوں میں 41 ہزار 583 ٹیسٹ کیے گئے جن میں سے مثبت کیسز کی شرح سات اعشاریہ دو چار فی صد رہی۔
پاکستان میں عالمی وبا سے اب تک 7803 افراد ہلاک ہو چکے ہیں اور 1867 مریضوں کی حالت تشویش ناک ہے۔
حکام کے مطابق ملک بھر میں اب تک 52 لاکھ 97 ہزار سے زیادہ ٹیسٹ کیے جا چکے ہیں جن میں سے تین لاکھ 82 ہزار سے زیادہ ٹیسٹ مثبت آئے تھے اور مجموعی طور پر تین لاکھ 32 ہزار سے زیادہ مریض صحت یاب ہو چکے ہیں۔
