بلاول بھٹو زرداری کا کرونا ٹیسٹ مثبت
پاکستان میں حزبِ اختلاف کی جماعت پاکستان پیپلز پارٹی کے چیئرمین بلاول بھٹو زرداری کا کرونا ٹیسٹ بھی مثبت آیا ہے۔
بلاول نے جمعرات کو اپنے ایک ٹوئٹ میں بتایا کہ ان میں کرونا وائرس کی علامات کی تشخیص ہوئی ہے جس کے بعد وہ قرنطینہ میں چلے گئے ہیں۔
پاکستان میں تمام تعلیمی ادارے بند
کرونا وائرس کے بڑھتے کیسز کے باعث پاکستان میں جمعرات سے تمام تعلیمی ادارے بند کر دیے گئے ہیں۔
وفاقی وزیر تعلیم شفقت محمود نے 23 نومبر کو ایک ماہ کے لیے تعلیمی ادارے بند کرنے کا اعلان کیا تھا جس پر آج سے عمل درآمد ہو گیا ہے۔
حکام کا کہنا ہے کہ تعلیمی ادارے 10 جنوری تک بند رہیں گے البتہ اس دوران آن لائن تعلیمی سلسلہ جاری رہے گا۔
حکام کے مطابق آئندہ برس جنوری کے پہلے ہفتے میں تعلیمی اداروں کے کھولنے پر مشاورت ہو گی اور کرونا کی صورتِ حال بہتر ہونے پر 11 جنوری کو تعلیمی ادارے دوبارہ کھول دیے جائیں گے۔
سوڈان کے سابق وزیرِ اعظم کرونا سے چل بسے
سوڈان کے سابق وزیرِ اعظم صادق المہدی جمعرات کو کرونا وائرس کا شکار ہونے کے بعد چل بسے ہیں۔
صادق المہدی کی سیاسی جماعت امہ پارٹی نے جمعرات کو ان کے انتقال کی تصدیق کی ہے۔
تین ہفتے قبل صادق المہدی کا کرونا ٹیسٹ مثبت آیا تھا جس کے باعث وہ سوڈان کے اسپتال میں ہی زیرِ علاج تھے تاہم طبیعت بگڑنے پر انہیں متحدہ عرب امارات منتقل کیا گیا تھا۔
چراسی سالہ صادق المہدی سوڈان کے جمہوری طور پر منتخب ہونے والے آخری وزیرِ اعظم تھے جن کی حکومت کا تختہ 1989 میں الٹ دیا گیا تھا۔
یاد رہے کہ سوڈان میں اب تک کرونا وائرس کے 17 ہزار سے زیادہ کیسز اور 1200 سے زیادہ اموات رپورٹ ہو چکی ہیں۔
چھ پاکستانی کرکٹرز کرونا کا شکار
نیوزی لینڈ کا دورہ کرنے والے پاکستان کرکٹ ٹیم کے چھ کھلاڑیوں کے کرونا ٹیسٹ مثبت آئے ہیں۔
انٹرنیشنل کرکٹ کونسل نے ایک ٹوئٹ میں پاکستانی کھلاڑیوں کے کرونا ٹیسٹ مثبت آنے سے متعلق بتایا اور کہا کہ دو متاثرہ کھلاڑیوں کے کرونا ٹیسٹ 'تاریخی' ہیں جب کہ چار کھلاڑیوں کے ٹیسٹ نئے ہیں۔
پاکستان کرکٹ ٹیم پیر کی صبح لاہور سے نیوزی لینڈ کے لیے روانہ ہوئی تھی اور وہاں پہنچ کر کھلاڑیوں کو قرنطینہ میں رکھا گیا تھا۔
نیوزی لینڈ روانگی سے ایک روز قبل پاکستان کرکٹ بورڈ نے اوپننگ بلے باز فخر زمان کو بخار کی وجہ سے ٹیم سے ڈراپ کر دیا تھا۔
پی سی بی کا کہنا تھا کہ فخر زمان کا کرونا ٹیسٹ منفی آیا ہے تاہم بخار کی وجہ سے انہیں نیوزی لینڈ نہیں بھیجا جا رہا۔