نئی دہلی: آلودگی اور کرونا کی ٹینشن ساتھ ساتھ
بھارت کا شمار دنیا کے آلودہ ترین ممالک میں ہوتا ہے۔ بھارت کے دارالحکومت نئی دہلی کو ان دنوں دو طرح کے ہنگامی حالات کا سامنا ہے۔ ایک طرف شہر میں مہلک فضائی آلودگی اور اسموگ ہے تو دوسری جانب کرونا وائرس کے کیسز میں ریکارڈ اضافہ ہو رہا ہے۔ تفصیلات دیکھیے اس رپورٹ میں۔
امریکہ میں دو لاکھ نئے کیس، اسپتالوں میں 89 ہزار سے زائد مریض
امریکہ میں بدھ کو کرونا وائرس کے دو لاکھ ریکارڈ نئے کیسز کا اضافہ ہوا ہے جب کہ اسپتالوں میں داخل کرونا مریضوں کی تعداد 89 ہزار تک جا پہنچی ہے۔
طبی ماہرین جمعرات کو 'تھینکس گیونگ' کے تہوار کے موقع پر بڑی تعداد میں لوگوں کی نقل و حرکت سے وائرس کے مزید پھیلاؤ کا خدشہ ظاہر کر رہے ہیں۔
امریکہ کی بہت سی ریاستوں میں کرونا وائرس کو مزید پھیلنے سے روکنے کے لیے نئی پابندیاں عائد کی گئی ہیں۔ تاہم امریکی سپریم کورٹ نے ریاست نیو یارک کے ایسے علاقوں میں عبادت گاہوں میں آنے والے لوگوں کی تعداد کو محدود رکھنے کے اقدام کو عارضی طور پر معطل کر دیا ہے۔
دنیا بھر میں کرونا کیسز چھ کروڑ سے زائد
دنیا بھر میں کرونا وائرس سے متاثرہ کیسز کی تعداد میں تیزی سے اضافہ جاری ہے جب کہ مجموعی کیسز چھ کروڑ چار لاکھ سے بڑھ گئے ہیں۔
مہلک وائرس سے دُنیا بھر میں اب تک 14 لاکھ سے زائد اموات ہو چکی ہیں۔
جنوبی کوریا کو بھی کرونا وائرس کیسز میں شدت کا سامنا ہے جہاں 500 یومیہ نئے کیسز سامنے آ رہے ہیں۔
روس نے جمعرات کو 25 ہزار سے زائد نئے کیسز کی تصدیق کی ہے جس سے ملک بھر میں کرونا وائرس کے متاثرین کی کل تعداد 22 لاکھ تک پہنچ گئی ہے۔
جرمنی میں کووڈ۔19 سے مزید 400 اموات ہوئی ہیں جن سے اب تک ملک میں ہونے والی ہلاکتوں کی تعداد 15 ہزار تک پہنچ گئی ہے۔
آسٹریلیا: 28 روز کے دوران کوئی نیا کیس رپورٹ نہ ہوا
آسٹریلیا کی دوسری بڑی ریاست وکٹوریہ کو ملک میں کرونا وائرس کا گڑھ تصور کیا جاتا تھا لیکن اب وہاں گزشتہ 28 روز کے دوران کوئی نیا کیس سامنے نہیں آیا ہے۔
رواں ہفتے کرونا وائرس کے آخری مریض کو اسپتال سے فارغ کیے جانے کے بعد سے اب تک ریاست میں کوئی نئی سرگرمی نظر نہیں آئی۔ اگست میں ایک روز میں 700 تک نئے کیسز رپورٹ ہو رہے تھے۔
مجموعی طور پر وکٹوریہ میں فعال کیسز کی تعداد تقریباً آٹھ ہزار تک جا پہنچی تھی۔ ریاست میں تقریباً 100 روز تک لاک ڈاؤن رہا جس کے سبب وائرس کے پھیلاؤ کو روکنے میں مدد ملی۔
کسی بھی نئے کیس کے سامنے نہ آنے کے بعد وکٹوریہ اور جنوبی ریاست تسمانیہ کے درمیان واقع سرحدیں کھول دی گئی ہیں۔
تسمانیہ آخری ریاست تھی جس نے وکٹوریہ سے ملحقہ اپنی سرحدیں مارچ سے بند کی ہوئی تھیں۔
جان ہاپکنز یونیورسٹی کے اعداد و شمار کے مطابق آسٹریلیا میں کرونا وائرس کے کیسز کی کل تعداد 27 ہزار 872 ہے اور اب تک 907 افراد ہلاک ہو چکے ہیں۔
وزارتِ صحت کے مطابق کرونا وائرس سے ہلاک ہونے والوں میں سے 90 فی صد افراد کا تعلق ریاست وکٹوریہ سے تھا۔