پاکستان میں کرونا سے مزید 72 اموات
پاکستان میں گزشتہ 24 گھنٹوں کے دوران کرونا وبا سے مزید 72 افراد ہلاک جب کہ مہلک وائرس کے مزید 3369 کیسز رپورٹ ہوئے ہیں۔
نیشنل کمانڈ اینڈ آپریشن سینٹر (این سی او سی) کے مطابق ملک بھر میں مجموعی کیسز کی تعداد چار لاکھ 38 ہزار سے بڑھ گئی ہے جب کہ اموات کی تعداد آٹھ ہزار 796 ہو گئی ہے۔
حکام ک مطابق وائرس سے اب تک تین لاکھ 83 ہزار مریض صحت یاب بھی ہو چکے ہیں۔
پاکستان میں مجموعی طور پر کرونا کے 60 لاکھ سے زائد ٹیسٹس کیے جا چکے ہیں ملک بھر میں زیادہ بیمار مریضوں کی تعداد 2471 ہے۔
چین میں کرونا کے مزید 24 نئے کیس رپورٹ
چین میں ہفتے کو کرونا وائرس کے مزید 24 نئے کیسز رپورٹ ہوئے ہیں جس کے بعد کیسز کی مجموعی تعداد 86 ہزار 725 ہو گئی ہے جب کہ اس وائرس سے اب تک 4634 اموات ہو چکی ہیں۔
چین کی وزارِتِ صحت کے حکام کا کہنا ہے کہ رپورٹ ہونے والے کیسز میں سے پانچ مقامی طور جب کہ 19 افراد میں وائرس سے باہر سے آنے والوں کے ذریعے منتقل ہوا۔
چین میں بغیر علامات کے مثبت آنے والے کیسز کو مصدقہ کیسز میں شمار میں نہیں کیا جاتا۔ ہفتے کو ایسے 17 افراد کا کرونا ٹیسٹ مثبت آیا جب کہ جمعے کو ایسے افراد کی تعداد 14 تھی۔
امریکہ میں کرونا ویکسین کی ترسیل پیر سے شروع ہو گی
امریکہ میں حکام کا کہنا ہے کہ ریاستوں میں کرونا ویکسین پیر کی صبح پہنچنا شروع ہو جائے گی۔ ابتداً لگ بھگ 30 لاکھ خوراکیں ملک بھر میں پہنچائی جائیں گی۔
امریکی دوا ساز کمپنی 'فائزر' اور جرمن کمپنی 'بائیو این ٹیک' کے اشتراک سے بنائی گئی کرونا ویکسین کی منظوری فوڈ اینڈ ڈرگ ایڈمنسٹریشن (ایف ڈی اے) نے جمعے کو دی تھی۔
خیال رہے کہ اس عالمی وبا سے امریکہ میں لگ بھگ تین لاکھ افراد ہلاک اور ایک کروڑ 60 لاکھ سے زائد افراد متاثر ہوئے ہیں۔
امریکی خبر رساں ادارے 'ایسوسی ایٹڈ پریس' کے مطابق کرونا وبا سے نمٹنے کے لیے ٹرمپ انتظامیہ کے 'آپریشن وارپ اسپیڈ' کے تحت ویکسین ڈویلپمنٹ پروگرام سے منسلک جنرل گسٹو پڑنا کا ہفتے کو کہنا تھا کہ شپنگ کمپنیز ‘یو پی ایس' اور 'فیڈ ایکس' کے ٹرک پیر کو مختلف ریاستوں میں قائم لگ بھگ 150 ڈسٹری بیوشن سینٹرز میں ویکسین پہنچائیں گے۔
جنرل پڑنا کا مزید کہنا تھا کہ 425 سینٹرز میں منگل جب کہ 66 سینٹرز کو بدھ تک ویکسین پہنچا دی جائے گی۔
اگرچہ طبی عملے اور نرسنگ ہومز کے عملے کو ترجیحی بنیادوں پر کرونا ویکسین دی جانی ہے۔ تاہم جنرل پڑنا کا کہنا تھا کہ اس کا حتمی فیصلہ محکمہ صحت کے حکام کریں گے۔
اطلاعات کے مطابق کرونا ویکسین کی اتنی ہی خوراکیں، ویکسین کی پہلی خوراک وصول کرنے والوں کی دوسری خوراک کے لیے رکھی جائیں گی جو کہ کرونا وائرس سے مکمل طور پر محفوظ رہنے کے لیے درکار ہوتی ہے۔
ماہرہ خان کا کرونا ٹیسٹ بھی مثبت آ گیا
پاکستان کی معروف اداکارہ ماہرہ خان کا کرونا ٹیسٹ مثبت آ گیا ہے جس کے بعد اداکارہ نے خود کو قرنطینہ کر لیا ہے۔
ماہرہ خان نے کرونا وائرس میں مبتلا ہونے کی تصدیق اپنے انسٹا گرام اکاؤنٹ سے کی۔
ماہرہ نے بتایا کہ اُن کا کرونا ٹیسٹ مثبت آیا ہے، لہذٰا وہ اُن افراد سے احتیاطی تدابیر اختیار کرنے کا کہتی ہیں جو گزشتہ ایک ہفتے سے اُن سے ملتے رہے ہیں۔
ماہرہ خان نے کہا کہ یہ ایک مشکل وقت ہے لیکن بہت جلد سب ٹھیک ہو جائے گا۔
ماہرہ نے اپنے مداحوں سے اپیل کی کہ وہ ماسک ضرور پہنیں اور اس وبا سے بچاؤ کے لیے تمام احتیاطی تدابیر اختیار کرتے رہیں۔