چین: شادی بیاہ، تدفین اور دیگر اجتماعات پر سخت پابندی
چین کے صوبے ہیبی میں کرونا کیسز کی تعداد تیزی سے بڑھ رہی ہے جس کے پیشِ نظر شادی بیاہ، تدفین اور دیگر خاندانی اجتماعات پر سخت پابندیاں عائد کر دی گئی ہیں۔
پابندیوں کی خلاف ورزی کرنے والوں کے خلاف قانونی کارروائی کا انتباہ بھی جاری کیا گیا ہے۔
نیشنل ہیلتھ کمیشن نے پیر کو اپنے ایک بیان میں کہا ہے کہ گزشتہ چوبیس گھنٹوں میں کرونا وائرس کے 54 کیسز رپورٹ ہوئے ہیں جب کہ دارالحکومت بیجنگ میں دو کیسز کی تصدیق ہوئی ہے۔
حالیہ چند ہفتوں کے دوران ہیبی میں کرونا کیسز تیزی سے پھیلا ہے اور فروری میں نئے قمری سال کے موقع پر عام تعطیلات کے دوران وبا کے مزید پھیلنے کا خدشہ ہے۔
حکام نے شہریوں سے تعطیلات کے دوران دوسرے علاقوں میں سفر نہ کرنے کی اپیل کی ہے جب اسکولوں کو بھی چھٹیوں سے ایک ہفتے قبل بھی بند کرنے کا حکم دیا گیا ہے۔
ہیبی کے حکام نے شہریوں کے بڑے پیمانے پر کرونا ٹیسٹ کرنے کی ہدایات جاری کی ہیں۔ یہ نئی پابندیاں مرض کو مزید پھیلنے سے روکنے کے لگائی گئی ہیں۔
دنیا بھر میں دوسری بار ایک دن میں 17 ہزار سے زائد مجموعی اموات
دنیا بھر میں کرونا وائرس سے دوسری بار ایک دن میں 17 ہزار سے زائد اموات ریکارڈ کی گئی ہیں۔
امریکہ کی 'جان ہاپکنز یونیورسٹی' کے اعداد و شمار کے مطابق گزشتہ 24 گھنٹوں میں دنیا بھر میں وبا سے مجموعی طور پر 17 ہزار 66 اموات ہوئی ہیں جس کے بعد عالمی سطح پر وائرس سے ہلاک ہونے والوں کی تعداد 20 لاکھ 59 ہزار 566 ہو گئی ہے۔
واضح رہے کہ دنیا بھر میں وبا سے سب سے زیادہ 17 ہزار 330 اموات 12 جنوری 2021 کو ہوئی تھیں۔ جس کے بعد ایسا دوسری بار ہوا ہے کہ عالمی سطح پر ایک دن میں 17 ہزار سے زائد افراد وبا سے ہلاک ہوئے ہیں۔
پاکستان میں 91 فی صد متاثرہ افراد صحت یاب، سات فی صد زیرِ علاج
پاکستان میں کرونا وائرس سے متاثر ہونے والے افراد میں سے 91 فی صد صحت یاب، دو فی صد ہلاک جب کہ لگ بھگ سات فی صد زیرِ علاج ہیں۔
پاکستان میں کرونا وائرس سے گزشتہ 24 گھنٹوں میں مزید 1772 افراد متاثر ہوئے ہیں جس کے بعد متاثرہ افراد کی مجموعی تعداد 5 لاکھ 24 ہزار سے زائد ہو گئی ہے۔ جن میں سے 11ہزار 103 افراد ہلاک جب کہ 4 لاکھ 78 ہزار سے زائد صحت یاب ہو چکے ہیں۔
سرکاری اعداد و شمار کے مطابق پاکستان میں اب بھی 35 ہزار 163 افراد زیرِ علاج ہیں۔ جن میں سے 2368 مریض انتہائی نگہداشت میں ہیں۔
حکام کے مطابق ملک بھر میں اب تک 74 لاکھ 84 ہزار ٹیسٹ کیے جا چکے ہیں۔