پاکستان میں مزید 23 اموات، 1600 سے زائد نئے کیسز
امریکہ: جنوبی افریقہ سمیت متعدد ممالک پر سفری پابندیاں بحال کرنے کا فیصلہ
امریکہ کے صدر جو بائیڈن پیر سے برازیل، آئرلینڈ، برطانیہ اور دیگر 26 یورپی ملکوں سے آنے والے غیر ملکی شہریوں پر کرونا وائرس کی سفری پابندی باضابطہ طور پر بحال کر رہے ہیں۔
وائٹ ہاؤس کے حکام نے اپنا نام صیغہ راز میں رکھنے کی شرط پر اتوار کو بتایا ہے کہ جن ممالک پر کرونا کے سبب امریکہ کے لیے سفری پابندیاں عائد کی جا رہی ہیں ان میں جنوبی افریقہ کو بھی شامل کیا جا رہا ہے۔
بائیڈن انتظامیہ کے اس اقدام کی وجہ کرونا وائرس کی نئی قسم کے پھیلاؤ کا طرہ بتائی جاتی ہے جو جنوبی افریقہ کے اندر اور باہر پھیل چکی ہے۔
بائیڈن سابق صدر ڈونلڈ ٹرمپ کے دور کے آخری دنوں کے اس حکم نامے کو منسوخ کر رہے ہیں جو آئندہ منگل تک سفری پابندیوں میں نرمی کا متقاضی ہے۔
ٹرمپ کے حکم نامے کی منسوخی اچھنبھے کی بات نہیں۔ البتہ جنوبی افریقہ کا اس فہرست میں شامل کیا جانا ظاہر کرتا ہے کہ نئی انتظامیہ کرونا وائرس کی بدلتی ہوئی شکلوں کے بارے میں کس قدر تشویش رکھتی ہے۔
میکسیکو کے صدر کرونا وائرس کا شکار
میکسیکو کے صدر آندریس مینوئیل لوپیز اوبراڈور بھی کرونا وائرس میں مبتلا ہو گئے ہیں۔
خبر رساں ادارے ایسوسی ایٹڈ پریس کے مطابق میکسیکو کے صدر نے اتوار کو اپنے ٹوئٹر اکاؤنٹ پر جاری کردہ بیان میں 'کووڈ 19' کا شکار ہونے کی تصدیق کی۔
آندریس مینوئیل نے کہا ہے کہ ان میں کرونا وائرس کی علامات درمیانی درجے کی ہیں اور وہ زیرِ علاج ہیں۔ انہوں نے کہا کہ جب تک وہ کرونا وبا سے صحت یاب نہیں ہو جاتے، ان کی جگہ وزیرِ داخلہ اولگا سانچیز نیوز کانفرنس کریں گے۔
واضح رہے کہ آندریس مینوئیل عام طور پر روزانہ دو گھنٹے کی نیوز کانفرنس بغیر وقفے کے کرتے ہیں۔
حکام کے مطابق میکسیکن صدر کرونا وائرس کا شکار ہونے کے بعد اپنے گھر پر ہی قرنطینہ میں ہیں۔
بنگلہ دیش نے بھارت سے ویکسین کی 50 لاکھ خوراکیں حاصل کر لیں
بنگلہ دیش نے بھارت میں ایسٹرازیینکا اور آکسفورڈ یونیورسٹی کی ویکسین بنانے والے ادارے سے کرونا ویکسین کی 50 لاکھ خوراکیں حاصل کر لی ہیں۔
بنگلہ دیش نے بھارت کے سیرم انسٹیٹیوٹ سے تین کروڑ خوراکوں کی خریداری کا فیصلہ کیا ہے۔
پیر کو بنگلہ دیش کی ایک کمپنی 'بیکسیمو فارماسوٹیکل' نے بھارت سے 50 لاکھ خوراکوں کی پہلی کھیپ وصول کی ہے۔
بیکسیمو کے مینیجنگ ڈائریکٹر نظم الحسن نے کہا ہے کہ یہ ویکسین حکام کو فراہم کی جائے گی اور ملک بھر میں اس کی ترسیل کی جائے گی۔
واضح رہے کہ بنگلہ دیش کو بھارت نے ویکسین کی 20 لاکھ خوراکیں تحفتاً بھی دی ہیں جو گزشتہ جمعرات کو بنگلہ دیش نے وصول کی تھیں۔ پیر کو حاصل ہونے والی 50 لاکھ خوراکیں بنگلہ دیش نے خریدی ہیں۔
بنگلہ دیش میں بھی ویکسین سب سے پہلے فرنٹ لائن ہیلتھ ورکرز کو لگائی جائے گی۔