یمن میں ڈاکٹرز اور نرسز کا احتجاج
یمن کے دارالحکومت صنعا میں ڈاکٹر اور نرسیں اقوامِ متحدہ کے دفتر کے باہر تیل کی قلت سے ہیلتھ کیئر سروسز متاثر ہونے کے خلاف احتجاج کر رہے ہیں۔
سندھ میں طبی عملے کے 979 ارکان کو ویکسی نیشن
پاکستان میں طبی عملے کے ارکان کو ویکسین لگانے کے عمل کا باقاعدہ آغاز ہو چکا ہے۔ سندھ میں 11 طبی مراکز کے عملے کو پہلے دن ویکسین لگائی گئی۔
سندھ کے محکمۂ صحت کے جاری کردہ اعداد و شمار کے مطابق صوبے میں ویکسی نیشن کے پہلے روز طبی عملے کے 979 افراد کو ویکسین لگائی گئی۔
اعداد و شمار کے مطابق ضلع شہید بینظیر آباد میں قاضی احمد روڑ پر واقع ایم سی ایچ اسپتال میں سب سے زیادہ 186 افراد کو ویکسین لگائی گئی۔
پنجاب کے مختلف اضلاع میں ویکسین تقسیم
پنجاب کے سیکریٹری پرائمری اینڈ سیکنڈری ہیلتھ کیئر محمد عثمان نے کہا ہے کہ پنجاب میں پہلے مرحلے میں صرف فرنٹ لائن ورکرز کو ہی ویکسین لگائی جا رہی ہے۔
مختلف اضلاع میں بھیجی جانے والی ویکسین کی تفصیلات بتاتے ہوئے محمد عثمان نے کہا کہ لاہور میں 23 ہزار 435، فیصل آباد میں 6096، گوجرانوالہ میں 3063، راولپنڈی میں4437، سرگودھا میں 1390،سیالکوٹ میں 940،ملتان میں 5855، اٹک میں 970، جھنگ میں 1006 ویکسین و ائلز منتقل کی گئی ہیں۔
انہوں نے دیگر اضلاع کی بھی تفصیلات سے آگاہ کیا۔
محمد عثمان نے بتایا کہ ویکسین مینجمنٹ سسٹم پر گزشتہ اتوار تک رجسٹر ہونے والے فرنٹ لائن لائن ہیلتھ ورکرز کی تعداد کے مطابق ہی ویکسین تقسیم کی گئی ہے۔
امریکہ میں اموات ساڑھے چار لاکھ سے متجاوز
امریکہ میں کرونا وائرس سے اموات ساڑھے چار لاکھ سے تجاوز کر گئی ہیں۔
'جان ہاپکنز یونیورسٹی' کے اعداد و شمار کے مطابق امریکہ میں گزشتہ 24 گھنٹوں میں وبا سے مزید 3912 افراد ہلاک ہوئے ہیں جس کے بعد اموات کی مجموعی تعداد چار لاکھ 50 ہزار 805 ہو گئی ہیں۔
واضح رہے کہ امریکہ میں جنوری میں وبا سے 95 ہزار افراد ہلاک ہوئے تھے۔
اعداد و شمار کے مطابق جنوری کا مہینہ امریکہ میں وبا کے حوالے سے ہلاکت خیز ثابت ہوا تھا اور یومیہ اوسطاََ تین ہزار سے زائد اموات ہوئی تھیں۔
رواں ماہ کے آغاز پر بھی امریکہ میں اموات کی شرح بلند ہے۔ جب کہ ملک بھر میں وبا کو کنٹرول کرنے کے لیے ویکسی نیشن کا آغاز کیا جا چکا ہے۔