وبا سے صحت یاب ہونے والا شخص چار ماہ میں پھر متاثر
یورپ کے ملک فرانس میں کی گئی ایک تحقیق کے مطابق ڈاکٹرز کرونا وائرس کی جنوبی افریقی قسم سے متاثر ہونے والے ایک ایسے مریض کے علاج میں کوشاں ہیں جو کہ چار ماہ پہلے وائرس سے صحت یاب ہوا تھا۔
اٹھاون سالہ شخص پچھلے سال ستمبر میں بخار اور سانس لینے میں دشواری کی شکایات کے ساتھ ڈاکٹروں کے سامنے پیش ہوا جس میں بعد ازاں کرونا وائرس کی تشخیص کی گئی۔
کرونا وائرس کی یہ علامات کچھ دن برقرار رہی تھیں اور دسمبر میں اس کے کرونا ٹیسٹ منفی آئے تھے۔
تاہم رواں سال جنوری میں مذکورہ شخص میں کرونا وائرس کی جنوبی افریقی قسم کی تشخیص ہوئی ہے۔
مریض کی حالت انتہائی پیچیدہ ہے اور اسے وینٹی لیٹر پر ڈال دیا گیا ہے۔
تحقیق کے مطابق یہ اپنی نوعیت کا پہلا کیس ہے کہ جس میں کرونا وائرس سے متاثر ہونے والا شخص چار ماہ بعد کرونا وائرس کی جنوبی افریقی قسم سے متاثر ہوا ہے۔
امریکہ میں پانچ کروڑ افراد کو ویکسین لگا دی گئی: سی ڈی سی
امریکہ میں صحتِ عامہ کے نگران ادارے، سینٹر فار ڈیزیز کنٹرول (سی ڈی سی) کا کہنا ہے کہ امریکہ میں اب تک پانچ کروڑ سے زائد افراد کو کرونا ویکسین لگ چکی ہے۔
سی ڈی سی حکام کے مطابق ہفتے کی شب تک ملک بھر میں چھ کروڑ 69 لاکھ سے زائد خوراکیں تقسیم کر دی گئی ہیں۔
حکام کے مطابق ہفتے تک ایک کروڑ 30 لاکھ افراد کو ویکسین کی دوسری خوراک بھی لگ گئی ہے۔
امریکہ میں دوا ساز کمپنیوں 'فائزر' اور 'موڈرنا' کی تیارکردہ ویکسین لگائی جا رہی ہے۔
امریکہ میں حالیہ دنوں میں کرونا کے یومیہ کیسز میں کمی کا رُحجان ہے۔
جانز ہاپکنز یونیورسٹی کے اعدادوشمار کے مطابق ملک میں اب تک دو کروڑ 75 لاکھ 75 ہزار سے کیس رپورٹ ہو چکے ہیں جب کہ اس مہلک وبا سے چار لاکھ 84 ہزار سے زائد افراد ہلاک ہو چکے ہیں۔
مقامی سطح پر تین نئے کیس، آکلینڈ میں تین روزہ لاک ڈاؤن
نیوزی لینڈ کی وزیرِ اعظم جیسنڈا آرڈرن نے مقامی سطح پر کرونا کے تین نئے کیس رپورٹ ہونے کے بعد ملک کے سب سے بڑے شہر آکلینڈ میں تین روزہ لاک ڈاؤن لگانے کا اعلان کر دیا ہے۔
جیسنڈا آرڈرن کا کہنا تھا کہ آکلینڈ میں لیول تھری پابندیاں عائد کی گئی ہیں جس کے تحت شہریوں کو صرف ضروری کام اور اشیا کی خریداری کے لیے گھر سے باہر نکلنے کی اجازت ہو گی۔
یہ اسی نوعیت کی پابندیاں ہیں جو نیوزی لینڈ نے گزشتہ سال وبا کے آغاز پر نافذ کی تھیں۔
وزیرِ اعظم آرڈرن کا کہنا تھا کہ جس طرح ہم نے ماضی میں اس وائرس کو شکست دی اس بار بھی ملک کر اسے شکست دیں گے۔
نیوزی لینڈ کے 50 لاکھ شہریوں کو کرونا ویکسین لگانے کا آغاز 20 فروری سے ہو رہا ہے۔ نیوزی لینڈ کو 'فائزر' کی تیارکردہ ویکسین کی خوراکیں موصول ہو گئی ہیں۔
پاکستانی لیب 'اسپتنک فائیو' کرونا ویکسین کمرشل بنیادوں پر لگائے گی
پاکستان میں ایک نجی لیب بہت جلد روس کی تیار کردہ'اسپتنک فائیو' کرونا ویکسین درآمد کرے گی جسے کمرشل بنیادوں پر عوام کو لگایا جائے گا۔
خیال رہے کہ سرکاری سطح پر ویکسی نیشن کے علاوہ حکومتِ پاکستان نے نجی شعبے کو بھی ویکسین درآمد کرنے کی اجازت دے رکھی ہے۔
پاکستان کی بڑی نجی ٹیسٹنگ لیبارٹریز میں شمار ہونے والی 'چغتائی لیب' کے ڈائریکٹر عمر چغتائی نے خبر رساں ادارے 'رائٹرز' کو بتایا کہ انہیں امید ہے کہ ویکسین کی ہزاروں خوراکوں پر مشتمل پہلی کھیپ انہیں اگلے ہفتے تک مل جائے گی۔
وزیرِ اعظم پاکستان کے معاونِ خصوصی برائے صحت ڈاکٹر ظفر مرزا کے مطابق وہ اس معاہدے سے براہ راست آگاہ نہیں ہیں۔
پاکستان دنیا کے اُن پہلے ممالک کی فہرست میں شامل ہو جائے گا جہاں سرکاری سطح کے علاوہ نجی شعبہ کمرشل بنیادوں پر ویکسین لگائی جائے گی۔
پاکستان میں کمرشل بنیادوں پر ویکسین کی فروخت اور ممکنہ طور پر زیادہ قیمت کی وجہ سے بعض حلقوں کی جانب سے تنقید بھی سامنے آئی ہے۔ ناقدین کا کہنا ہے کہ 22 کروڑ آبادی والا ملک جس کا بڑا حصہ کم آمدنی والے طبقات پر مشتمل ہے، یہاں ہر کسی کے لیے ویکسین خریدنا ممکن نہیں ہو گا۔